Ukunikela Iindaba Ezilungileyo—Ukuqalisa Izifundo ZeBhayibhile Zamakhaya
1 Isihlomelo soBulungiseleli Bethu BoBukumkani buka-Agasti 1991 sisikhumbuze ngembopheleleko yethu yokutyala nokunkcenkceshela kwinkqubo yokwenza abafundi bakaKristu. Sisibonise ukuba sifanele sishukunyiselwe ukuqhuba izifundo zeBhayibhile ngenxa yothando lwethu ngabantu abasamkelayo isigidimi soBukumkani. Ukuqalisa izifundo zeBhayibhile zamakhaya kuya kusenza silufeze uthumo lwethu lokwenza abafundi.—Mat. 28:19, 20.
2 Kuhle ukubona ukuba abaninzi bethu baye baqalisa ukulusebenzisa ukhuthazo oluhle olunikelweyo. Iingxelo zibonisa ukuba kuqhutywa izifundo zeBhayibhile ezininzi ngakumbi. Inani lezifundo zeBhayibhile eziye zabikwa kuMzantsi Afrika lande malunga nesithandathu ekhulwini ngowe-1991 xa lithelekiswa nelonyaka wenkonzo we-1990. Ngokuqinisekileyo abo baye baqalisa ukuqhuba izifundo okokuqala ngqa bayayivuyela inxaxheba abanayo kumsebenzi wokwenza abafundi. Kodwa abangakumbi banokuba nesabelo njani ku-le nkalo enomvuzo yobulungiseleli bethu?
3 Sebenzisa Umnikelo Wenyanga: Ngokuqinisekileyo uNovemba uyinyanga efanelekileyo yokufuna ukuqalisa izifundo zeBhayibhile ezitsha. Siya kube sinikela incwadi ethi IBhayibhile—Ngaba Ililizwi LikaThixo Okanye Lomntu? Indlela entle yokuvuselela umdla womninimzi iya kuba kukusebenzisa amacebiso afumaneka kwincwadi Ukuqiqa.
4 Sinokubalaselisa iBhayibhile ngokusebenzisa iintshayelelo ezicetyisiweyo kwiphepha 10 lencwadi Ukuqiqa. Kudweliswe iindlela ezintlanu ezahlukeneyo zokwalathisela ingqalelo eBhayibhileni. Ukukhuthaza abantu ukuba bazifune eBhayibhileni iimpendulo zemibuzo engobomi kunokuvulel’ indlela isifundo seBhayibhile.
5 Phantsi komxholwana othi “Isifundo SeBhayibhile Sekhaya” kwiphepha 11 lencwadi Ukuqiqa, kukho amacebiso amabini anokuba luncedo ekwalathiseleni ingqalelo kwincwadi ethi Ililizwi LikaThixo. Omabini akhuthaza ukusebenzisa incwadi kwinkqubo yofundisiso oluthe rhoqo. Ukuba uqalisa isifundo seBhayibhile ngokusicela ngokungqalileyo, unokusebenzisa amacebiso amahle aqulethwe kuBulungiseleli Bethu BoBukumkani bukaSeptemba 1991.
6 Kholosa NgoYehova: Ukuze siphumelele kumsebenzi wokwenza izifundo zeBhayibhile, simele sikhumbule ukuba impumelelo ekuqaliseni izifundo zeBhayibhile zamakhaya inokufunyanwa kuphela ngoncedo lukaYehova. Unendima eyintloko kwimigudu yethu yokunceda abantu. (1 Kor. 3:6) Ngoko ke, sifanele sithandazele kungekuphela nje ukufumana umntu esinokufundisisa naye kodwa kwanenkqubela yabanomdla esibafumeneyo. (Yoh. 16:23) Simele sikhumbule ukuba “singabasebenzisi bakaThixo.”—1 Kor. 3:9.