Ilungiselelo LeSifundo Sencwadi Sebandla
Icandelo 5: Ukutyelela Komveleli Wenkonzo
1 Umveleli wenkonzo ufanele abe ngumshumayeli weendaba ezilungileyo nonobuchule bokufundisa. Unendima eyintloko ekuncedeni ibandla ukuba liphumeze imbopheleleko yokushumayela nokufundisa iindaba ezilungileyo kwintsimi eliyabelweyo. (Marko 13:10) Xa eyithabatha nzulu imbopheleleko yakhe yaye bonke besebenzisana naye, abavakalisi baya kuvelisa ubuchule obungakumbi ekuvakaliseni iindaba ezilungileyo yaye iya kugutyungelwa ngokucokiseke ngakumbi intsimi.
2 Umveleli wenkonzo unikel’ ingqalelo ekukhuthazeni ukuba kwenziwe umsebenzi ongakumbi kubulungiseleli basentsimini. Oku kufezwa ngokuyintloko ngeSifundo Sencwadi Sebandla. Ngokuqhelekileyo, umveleli wenkonzo wabelwa ukuqhuba isifundo sencwadi, kodwa kanye nyanga nganye umncedisi wakhe unokuthabath’ indawo yakhe ngoxa etyelele elinye iqela.—kmXO 12/81 iphe. 1, 8.
3 Ukulungiselela Utyelelo: Kwiveki eyandulela eyotyelelo, umveleli wenkonzo ufanele ahlole amakhadi eNgxelo Yomvakalisi Webandla abo bakwelo qela. Kwakhona ufanele alungiselele ukudibana nomqhubi baze bahlolisise umsebenzi wabavakalisi ababelwe kwelo qela. Umqhubi unokwazisa umveleli wenkonzo ngazo naziphi na iingxaki ezinokuthanani nenkonzo okanye iintswelo ezisenokungaboniswa ngamakhadi engxelo. Umqhubi wesifundo ufanele akhunjuzwe ukuba isifundo sifanele siqhutywe ngemizuzu engama-45 kuphela ukuvumela ixesha lentetho yenkonzo yemizuzu eli-15 enikelwa ngumveleli wenkonzo.
4 Injongo yale ntetho iya kuba kukwakha uxabiso olungakumbi ngobulungiseleli. Ukuba abavakalisi bafuna uncedo kwiinkalo ezithile zobulungiseleli, umveleli wenkonzo ufanele anikele amacebiso asebenzisekayo endlela ekunokuphuculwa ngayo. Amagqabaza akhe afanele abe ngawakhayo nakhuthazayo ukuze kungabikho namnye oziva ephoxekile okanye edimazekile ngamagqabaza akhe agxekayo. Oku kuya kuyiphuthisa injongo yokutyelela kwakhe. Intetho yakhe ifanele ikhuthaze bonke ukuba benze uphuculo.
5 Umveleli wenkonzo uzabalazela ukunikela ingqalelo yobuqu kubazalwana noodade abaninzi kangangoko ucwangciso lwakhe lumvumela. Unokulungiselela ukusebenza nabahlukahlukeneyo enkonzweni. Ngoxa esebenza nabavakalisi kwindlu ngendlu, unokunikela amacebiso ambalwa asebenzisekayo ngendlela yokuphucula iintshumayelo zabo. Oku akafanele akwenze ngokugxeka kodwa ngomnqweno wokwenene wokufuna ukunceda. Kwakhona usenokupheleka abavakalisi kumabuyelo nakwizifundo zeBhayibhile. Ukuba kwelo qela kukho nabaphi na abafuna uncedo lobuqu, usenokwenza utyelelo lokwalusa ebudeni baloo veki ukuze abancede. Emva koko, unokwazisa umqhubi ngamacebiso awanikeleyo. Le ngqalelo efudumeleyo yobuqu iye yalukhuthazo kwabathile abeberhoxobisa kwinkonzo yabo yasentsimini.
6 Intlanganiso Yenkonzo: Iintlanganiso zenkonzo yasentsimini ngaloo veki zifanele ziqhutywe ngumveleli wenkonzo. Zifanele ziqalise ngexesha nokuba bambalwa abakhoyo. Le ntlanganiso ayifanele ibe ngaphezu kwemizuzu eli-10 ukuya kweli-15. Akunyanzelekanga ukuba kuqwalaselwe iSibhalo setekisi yosuku. Ngaphambi kokuba iqela lichithakale, ngamnye ufanele ayazi indawo kunye nomntu aza kusebenza naye. (1 Kor. 14:33, 40) Umveleli wenkonzo ufanele abakhuthaze bonke ukuba bahambe baye enkonzweni yasentsimini ngaphandle kokulibazisa.
7 Ukuwatyelela komveleli wenkonzo ngokuthe rhoqo amaqela ezifundo zencwadi kunokuba yintsikelelo yokwenene ebandleni. Ngokusebenzisana kwakhe ngamnye wethu kunye naye xa etyelele, ubulungiseleli bethu buya kuba bobulungeleleneyo nobunempumelelo. Ngokungakumbi, uya kuwunandipha umsebenzi wakhe. (Heb. 13:17) Ababumvu baya kuhlanganiswa, yaye siya kuvuyiswa kukwazi ukuba silufezile uthumo lwethu lokushumayela kubo bonke abaya kusiphulaphula.—Isa. 61:1, 2; Hez. 9:11; Yoh. 17:26.