Indibano YeSithili “Yabathwali Bokukhanya” Yowe-1992

¹ UYesu wathi abalandeli bakhe babeya kuba “lukhanyiselo lwehlabathi.” (Mat. 5:14) Ngokwahlukileyo koko, suku ngalunye oludlulayo ihlabathi liya lisiba kubumnyama obungakumbi bokomoya nobokuziphatha. (Isa. 60:2; Roma 1:21) Imbopheleleko yethu njengabathwali bokukhanya iya isiba nentsingiselo engakumbi njengoko sisondela kwisiphelo sale nkqubo. Siqonda indima ebalulekileyo esinayo koku, sijonge phambili ngolangazelelo ekubeni sibekho kwiNdibano YeSithili “Yabathwali Bokukhanya” Yowe-1992. Eyokuqala kolu ngcelele iya kuqalisa ngoLwesihlanu ngoDisemba 4.

² Indibano Yeentsuku Ezintathu: Kulo nyaka sicebe ukuqhuba iindibano ezingama-23 eMzantsi Afrika nakumazwe akufuphi. Ngaphandle kwesiNgesi, kuya kuqhutywa ucwangciso olupheleleyo ngesiBhulu, isiPedi, isiPhuthukezi, isiSuthu, isiTsonga, isiTswana, isiXhosa nesiZulu, neenxalenye ezithile ngesiGrike nangesiVenda. EThekwini naseRhawutini, kuya kuguqulelwa ngentetho yezandla. Ucwangciso luya kuqalisa nge-10:20 kusasa ngoLwesihlanu luze luqukunjelwe ngengoma nomthandazo malunga ne-4:15 emva kwemini ngeCawa. Amasango aya kuvulwa nge-7:30 kusasa, yaye akukho mntu uya kuvunyelwa ukuba angene ngaphambi kwelo xesha ngaphandle kokuba wabelwe ukuba asebenze. Bonke abantu bakaYehova kuya kufuneka babekho kulo lonke ucwangciso. Ngaba sele usenzile isigqibo sobuqu sokubakho kuzo zontathu ezo ntsuku? Qiniseka ukuba uthandazela intsikelelo kaYehova kwimigudu yakho.

³ Ukususela kwintetho yokuvula kusasa ngoLwesihlanu kude kube ngamagqabaza okuqukumbela emva kwemini ngeCawa, sifanele sinikele ingqalelo epheleleyo kulo lonke ucwangciso. Kuya kunikelwa inkcazelo ebangel’ umdla kwiintetho, imiboniso, udliwano-ndlebe nakumdlalo. Lungiselela ukuba ube sesihlalweni sakho ngaphambi kokuba ucwangciso luqalise ngoLwesihlanu. Ngokuqhelekileyo, kusuku lokuqala kufuneka ixesha elingakumbi lokumisa iinqwelo-mafutha, ukufumana izihlalo, njalo njalo. Ngoko zinike ixesha elaneleyo. Ngokubakho kulo lonke ucwangciso size sihlale kude kube yingoma nomthandazo wokuqukumbela, singenelwa ngokuzeleyo kucwangciso yaye sibonakalisa uxabiso lwethu ngelungelo lethu lokukhonza njengabathwali bokukhanya.

⁴ Phulaphula Ngenyameko: Umdumisi wavakalisa oku: “Mna ndigqale izingqiniso zakho. Hayi, ukuwuthanda kwam umyalelo wakho! Imini le yonke ndiyacamngca ngawo.” (INdu. 119:95b, 97) Sihlandlo ngasinye esihlanganisana ngaso ukuze siyalelwe nguYehova, kufuneka sinikel’ ingqalelo size siphulaphule kungekuphela nje ngeendlebe kodwa kwanangentliziyo yethu. Noko ke, oku kubalaluleke kakhulu xa sisiya kwiindibano ezinkulu njengendibano yesithili. Kukho okuninzi okunokubonwa ngamehlo nokunokuviwa ziindlebe. Enjani yona ilahleko yobuqu ebekuya kuba yiyo ukuba besiziqwebele ixesha nemali ukuze sibekho endibanweni size sibuyele ekhaya sinokuncinane esikuzuzileyo kwiingongoma ezintle ezingeendlela esinokuphucula ngazo njengabathwali bokukhanya! Simele senze unako nako ukuba singaphazanyiswa ukuze singenelwe ngokuzeleyo kucwangciso. Sinokuqinisekisa njani ukuba inkcazelo yendele nzulu entliziyweni nasengqondweni yethu ekuqukunjelweni kocwangciso lwendibano?

⁵ Ukuphulaphula bubuchule obufanele buhlakulelwe buze busetyenziswe. Igama elithi “phulaphula” lithetha “ukuva ngengqalelo enyamekileyo.” Khawuqwalasele la macebiso ambalwa: (1) Yenza unako nako ukuba ufike kwindawo enendibano uphumle ngokwaneleyo ntsasa nganye. Oku kufuna ukuceba nentsebenziswano yentsapho. Ukuba utyhafile ngenxa yokungalali ngokwaneleyo okanye ulambile ngenxa yokuba ungakhange ufumane isidlo sakusasa, okanye ukuba imithambo-luvo yakho iphazamisekile kuba bekufuneka ugxabhagxabhisile, akuyi kuzuza kangako kucwangciso. (2) Yiba nolangazelelo ngendlela eya kunikelwa ngayo intetho ethile. Kwiiveki ezithile ngaphambi kwendibano, kutheni ungabeli ilungu ngalinye lentsapho yakho njengenxalenye yesifundo sakho sentsapho ukuba ligqabaze ngoko kuthethwa kukuba ngumthwali wokukhanya kulo. Ngoxa usendibanweni, hlolisisa kwangaphambili inxalenye nganye yolo suku ngaphambi kokuba ucwangciso luqalise. (3) Nxiba ngokufanelekileyo, yaye ungatyi uze usele ebudeni bocwangciso. Kuye kwaphawulwa abambalwa kwiindawo ekuhlalwa kuzo kwiiholo okanye kumabala emidlalo besitya okanye besela ebudeni bocwangciso. Oku kukungabi nantlonelo, kuphazamisa abanye, yaye kubonakalisa ukuswela ukuzeyisa.—Bona IMboniselo kaNovemba 15, 1991, iphepha 8-18.

⁶ Sifanele sinikele ingqalelo ekhethekileyo kumbandela wokubhala amanqaku. Xa oku kusenziwa kakuhle, kuya kukunceda uhambisane nezithethi ngenyameko uze ugcine oko ukuvayo. Ekubeni sicinga ngesantya esiphindwe kane ngaphezu kokuba sithetha, eyona ndlela ilungileyo yokuthintela ukubhadula kwengqondo kukubhala amanqaku. Kunjengokuba omnye umbhali watshoyo, “Ngokufuthi kunzima ngakumbi ukuphulaphula intetho kunokuyinikela.” Usenokukhumbula ukuba amaKristu okuqala ayesaziwa ngokuthabatha amacwecwe aqhekekileyo ezinto ezazenziwe ngodongwe aye nawo kwiintlanganiso aze abhale kuwo izibhalo esebenzisa i-inki. Okusivuyisayo kukuba, thina singakwenza kakuhle gqitha oko kwincwadana encinane yamanqaku ngosiba okanye ipensile. Ukuba nobuchule ekubhaleni amanqaku kuthetha ukubhala kuphela okwaneleyo ukuze sifumane ingcamango eyintloko kodwa singabhali into eninzi ngokokude sihlale siqolozele encwadini. Oku kungayonakalisa injongo yethu kuze kubangele ukuba silahlekelwe ziingongoma ezibalulekileyo ezigutyungelwa sisithethi. Bhala amabinzana aziintloko, uze usebenzise izifinyezo. Amanqaku owabhalileyo aya kukunceda gqitha ukuba uyawahlolisisa kwakhona kwangolo rhatya wandule ke uphinde uwahlolisise ngaphambi kwengxubusho yebandla yeengongoma zocwangciso kwiNtlanganiso Yenkonzo.

⁷ Ingoma Nomthandazo Osuk’ entliziyweni: Ukuvumela uYehova iindumiso nokuthetha naye ngentlonelo emthandazweni yinxalenye ebalulekileyo yonqulo lwethu. (2 Kron. 30:21, 27) Ezi ziimbalasane zendibano esinokuba nenxaxheba sonke kuzo. Ebudeni beentsuku ezintathu zeNdibano YeSithili “Yabathwali Bokukhanya” esiza kuba nayo, siya kuvuma iingoma ezili-18 zokudumisa uYehova size simanyane kwimithandazo esibhozo eya kuBawo wethu wasezulwini. Ngokwenyaniso la ngamalungelo axabiseke gqitha. UYehova usinika imfundo noqeqesho lokomoya olungaphezu kweeyure ezili-12. Ebudeni bemizuzu embalwa eyabelwe ingoma nomthandazo, sibulela uYehova ngezipho zakhe zobubele yaye siyamdumisa. Ekubeni sisiya phambi koYehova ngomthandazo sisisihlwele esihlanganiseneyo, ngaba sinokufuna ukuba asijonge njengabantu abazingcayo nabangenambulelo ngenxa yokuba singatheleli kwingoma nomthandazo kuba nje singalungiselelanga kakuhle? Kwakhona, kulo nyaka kufanele kubekho izixa ezaneleyo zoncwadi kwindibano nganye, ngoko abo bahlala ngokufanelekileyo kwizihlalo zabo de ucwangciso luqukunjelwe baya kulufumana uncwadi. Ngokufanayo, akukho bani ufanele ahambe ngaphambi kokuphela kocwangciso ukuze abe ngowokuqala kumgca wokutya.—Mat. 7:12; Rom. 12:10; Fil. 2:1-4.

⁸ Izinto Zonke Zenzele Ukuba Kudunyiswe UThixo: Nyaka ngamnye sikhunjuzwa ngothando ngokubaluleka kwesimilo nehambo efanelekileyo endibanweni. Abaninzi bamele banconywe ngokuzithobela ngenyameko ezi zikhumbuzo. Njengokuba le nkqubo isondela esiphelweni, siyaqhubeka sinyanzeleka ukuba emsebenzini nasesikolweni sinxulumane nabantu abanehambo efana naleyo yaxelwa kwangaphambili kweyesi-2 kuTimoti 3:1-5. Olu nxulumano lunokuba nempembelelo embi kuthi ukuba asiphaphanga. Asifuni ukuba nabani na abe nesizathu ‘sokuthetha okubi ngathi, ngathi singabenzi bokubi.’ (1 Pet. 2:12) Oku kufuna ukuba sinikele ingqalelo engakumbi kubuntu bethu bobuKristu. Bonke bafanele bayiphaphele ihambo yabo endibanweni nakwezinye iindawo zikawonke wonke, njengakwiihotele nakwiivenkile zokutyela. Abadala babakhathalele bonke abazalwana babo. (Fil. 2:4) Bafanele babe luncedo baze babancome abanye ngehambo yabo entle. Kwakhona xa kuyimfuneko abadala bafanele bazive bekhululekile ukunika umzalwana okanye udade othile isiluleko sothando, enoba abaqhelananga ngokobuqu. Nayiphi na ingxaki enzulu ephawuliweyo ifanele ixelwe kwiOfisi Yolawulo endibanweni.

⁹ Ubuntu obutsha obukhankanywe kwabase-Efese 4:24, (NW) bufaniswa nengubo ubani ayambathayo emva kokulahla ubuntu obudala. Oku kuguquka kobuntu kufanele kubonakale nakwiimpahla zethu zokoqobo. Bambi abazalwana noodade, ngokukodwa abaselula, baye babonwa benxibe ngendlela engafanelekanga, maxa wambi ngokungandilisekanga. Abanye bakhulula izihlangu zabo baze babeke iinyawo zabo kumva wesihlalo esiphambi kwabo okanye bahambahambe benxibe iikawusi. Ngaba siziphatha ngale ndlela kwiHolo yoBukumkani? Kwakhona, amanye amalungu obhaptizo aye anxiba iiT-shirts ezinemibhalo ezukisa izinto zehlabathi okanye ezibhalwe izibhengezo zeemveliso ezahlukahlukeneyo. Abadala abahlolisisa imibuzo nabo balungiselela ukubhaptizwa bafanele baqinisekise ukuba abo baza kubhaptizwa bayasiqonda isinxibo esiya kugqalwa njengesifanelekileyo ngeso sihlandlo.—Bona IMboniselo kaJuni 1, 1985, iphepha 30, neyesiNgesi ka-Aprili 15, 1973, iphepha 254-5.

¹⁰ Izixhobo Zokurekhoda: Nangona iikhamera zevideo zivunyelwe, sibongoza abo bazisebenzisayo ukuba bacingele abanye, bakukhethe oko bakufotayo, yaye babahlonele abo basenokungathandi ukufotwa ngoxa besitya, bephulaphule ucwangciso, okanye xa kuthandazwa. Nabani na ofota ngevideo okanye osebenzisa iteyiphu yokurekhoda ufanele angatsal’ ingqalelo yabaphulaphuli okanye aphazamise. Akuchasekanga ukurekhoda inxalenye yocwangciso uhleli esihlalweni sakho. Kodwa ebudeni bocwangciso, akuyi kufaneleka ukuba nabani na ahambahambe kwindlela ephakathi kwezihlalo naphambi kwabaphulaphuli erekhoda ucwangciso. Ukuba kuyimfuneko, abalindi bafanele bathethe naye nabani na ongalubonakalisiyo uthando lobuzalwana ngalo mbandela. Ncedani nikhumbule ukuba akukho zikhamera okanye izixhobo zokurekhoda ezifanele zixokonyezelwe kumbane okanye kumatshini wesandisi-lizwi osetyenziswa endibanweni, yaye akufanele kubekwe nasiphi na isixhobo kwindlela ephakathi kwezihlalo okanye kwiindawo ekuhanjwa kuzo.

¹¹ Kubazali: Sithanda ukubethelela kwakhona ukubaluleka kokuba abazali bajonge abantwana babo ngawo onke amaxesha, enoba kungaphakathi kumabala endibano okanye kwiindawo abahlala kuzo. (IMize. 29:15b; Luka 2:48) Ngoxa kuqhubeka ucwangciso qiniseka ukuba abantwana bakho banikele ingqalelo yaye babhala amanqaku. Ebudeni bonqumamo kukho amathuba okutyelela kunye nabahlobo abasuka kwamanye amabandla.

¹² Ukubonisa ukubaluleka kokwazi indawo abakuyo abantwana bakho ngawo onke amaxesha, omnye umqhubi weteksi kwesinye isixeko esasinendibano waxelela omnye umzalwana ukuba wakhwelisa amantombazana aselula amabini kwindawo eyayinendibano. Kuyabonakala ukuba ayeceba ukuzikhupha ngaloo mva kwemini yaye axelela umqhubi ukuba unina wayengazukubona ukuba ayengekho de kube ngeye-5:00 ngenjikalanga. Lo mqhubi weteksi wayexhalabile ngempilo-ntle yawo, kodwa kuthekani ngonina? Enjani yona intlekele ekwakuza kuba yiyo ukuba ayehlelwe yingozi, singasathethi ke ngogculelo oko okwakuya kuba lulo kwigama nakubantu bakaThixo!

¹³ Intsebenziswano Yenu Epheleleyo Iyaxatyiswa: Kubaluleke kangakanani ukuba ngamnye kuthi asebenzisane nolwalathiso loMbutho ngokuphathelele ukuya kwindibano elabelwe kuyo ibandla lethu? Ukuceba ngenyameko koMbutho nabazalwana abanembopheleleko kwisixeko ngasinye esinendibano kubandakanya ukulungiselela indibano nganye. Kubandakanya ukufumana izihlalo, ukutya, uncwadi olwaneleyo, njalo njalo. Ukuba abazalwana abaninzi baya kwiindibano abangabelwanga kuzo, oku kunokubangela ubunzima. Kusenokuba, abambalwa baza kunyanzelwa ziimeko ukuba baye kwenye indibano. Ezinye iindawo ezinendibano zisenokubonakala zinomtsalane ngezizathu ezahlukahlukeneyo, kodwa ukuba abazalwana abaninzi baya kwindawo abazikhethele ukuya kuyo, loo nto inokuphazamisa kakhulu.

¹⁴ Kucelwa intsebenziswano yenu kumbandela wokubekelana izihlalo. Nceda ukhumbule ukuba IZIHLALO ZISENOKUGCINELWA KUPHELA AMALUNGU ENTSAPHO YAKHO NABASENOKUBA BAHAMBA NAWE KWINQWELO-MAFUTHA YAKHO. Kwiindawo ezininzi kuya kubakho iindawo ezikhethekileyo ezenzelwe abalupheleyo nabaneziphene. Sicela ukuba wonk’ ubani ajonge imiqondiso ngenyameko aze athobele ulwalathiso lwabalindi. Bambi abazalwana abalupheleyo kuye kwafuneka bakhangele izihlalo kwiindawo abafika nzima kuzo ngenxa yokuba abaselula bazalisa kwiindawo ezilungiselelwe abalupheleyo. Ncedani nibacingele abalupheleyo. Sibuhlungu kuba singenako ukulungiselela abo bacela iindawo okanye amagumbi awahlukileyo kuba impilo yabo ingadibani nezinto ezithile.

¹⁵ Kucetyiswa ukuba xa nisiza endibanweni ningaphathi izinto ezininzi zobuqu. Ukuba into ethile ayaneli ngaphantsi kwesihlalo sakho, kusenokuba kuhle ukuyishiya ekhaya. Iibhaskiti ezinkulu zokugcina ukutya azivunyelwanga ukuba zibekwe kwindlela ephakathi kwezihlalo ngenxa yezizathu zokhuseleko, yaye ukuba uzibeka kwizihlalo ezisecaleni kwakho, kusenokwenzeka ukuba umntu othile angasifumani isihlalo.

¹⁶ Abantu bakaYehova bayakuxabisa ukuhlanganisana ndawonye kwiindawo ezisemgangathweni ukuze bangenelwe kucwangciso lokomoya olulungiselelweyo. Siyawaxabisa namalungiselelo amaninzi nezinye izinto eziluncedo ezilungiselelweyo kwiindawo ezinjalo. Ngenyameko nangeendleko ezinkulu zoMbutho, kwenziwa amalungiselelo okuba kubekho izihlalo ezaneleyo, ukufakelwa kwezixhobo zesandisi-lizwi ezibiz’ imali eninzi, ukwenziwa kwezinto ngokutyibilikayo kwiSebe Lokutya namanye amalungiselelo amaninzi aluncedo ukuze siyinandiphe indibano size sihlaziyeke ngokomoya.

¹⁷ Kuya kwenziwa amalungiselelo okutya kuzo zonke iindibano. Sithanda ukukhuthaza bonke abakhoyo endibanweni ukuba bawasebenzise amalungiselelo okutya. Kuzo zonke iindibano kwenziwa amalungiselelo okuqinisekisa ukuba abantu abeze endibanweni bafumana ukutya okwaneleyo. Apho uninzi lwabo beze endibanweni luhlala ezikolweni ikomiti yendibano iya kuqwalasela umbandela wokulungiselela isixhaso ngorhatya nesidlo sakusasa. Oku kufanele kwenze kungabi yomfuneko ngabo beze endibanweni ukuba baphathe izitovu zegesi nezeparafini. Njengoko ezi zitovu zisenokubangela ingozi yomlilo kwiindawo abahlala kuzo abo beze endibanweni. Sinqwenela ukunikhuthaza nonke ukuba niwaxhase ngentliziyo iphela amalungiselelo okutya. Ukongezelela koku, ngenxa yokuphakama kwamaxabiso eendawo ekuqhutyelwa kuzo iindibano kuye kwanzima ngamaSebe Okutya ukuhlangabezana nazo zonke iindleko zeendawo ekuqhutyelwa kuzo iindibano. Ngenxa yoku usenokunqwenela ukuthumela umnikelo kusengaphambili kwisixeko esinendibano eliza kuya kuso ibandla okulo. Ukuba unqwenela ukuthumela itsheke unokuphawula ukuba mayihlawulwe kwi-“Watch Tower Convention.” Yonke iminikelo ixatyiswa gqitha yaye uMbutho unqwenela ukunibulela kusengaphambili ngokuxhasa kwenu ngobubele nangokumanyeneyo izilangazelelo zoBukumkani ngolu hlobo.—Luka 6:38.

¹⁸ Yibakho KwiNdibano YeSithili “Yabathwali Bokukhanya”: Ngokubakho kwiNdibano YeSithili “Yabathwali Bokukhanya” siya kuchwayitiswa kukuva isizathu sokuba kuluzuko nelungelo elibalaseleyo ukuba ngabathwali bokukhanya. Siya kukhunjuzwa ukuba oku kukwayimbopheleleko enzulu. Ngokunikela ingqalelo engakumbi endibanweni, siya kuphucula ubuchule bethu size sandise noxabiso lwethu ngendima yethu njengabathwali bokukhanya. Yenza amalungiselelo kwangoku okubakho kulo lonke ucwangciso, ukususela kwingoma yokuvula ngoLwesihlanu kude kube ngumthandazo wokuqukumbela emva kwemini ngeCawa.

[Box on page 10]

Emasikukhumbule NgeNdibano YeSithili

Amagumbi: Abavakalisi abaninzi baya kuzenzela ngokwabo amalungiselelo eendawo zokulala. Noko ke, ukuba ufuna ikomiti yendibano ikulungiselele iindawo yokulala, usenokufumana iFomu Yesicelo Samagumbi kunobhala webandla. Uya kwandula ke unobhala webandla ayithumele ngokukhawuleza ifomu ezalisiweyo kwikhelingi echanileyo yendawo enendibano. Kwezinye iindibano kuya kusiba nzima ukubafumanela indawo yokulala abantu abaninzi abeze endibanweni. Ukuze kupheliswe obo bunzima iikomiti zendibano ziya kulungiselela ukuqesha izikolo zasekuhlaleni njengokuba bekusenziwa ngaphambili. Noko ke, ngenxa yokwanda kwabo bafuna iindawo zokulala ezilolo hlobo ngoku siya kusebenzisa oko kubizwa ngokuba ‘yinkqubo yokulala ngokwamaqela.’ Ngamanye amazwi, oodade baza kuhlala kwamanye amagumbi baze abazalwana bahlale kwamanye. Ngoko, akusayi kuvunyelwa ukuba iintsapho zilale ndawonye kwigumbi elinye. (Ncedani nibone uVukani! kaJanuwari 8, 1992, iphepha 29.) Maxa wambi oku kuya kuniphazamisa kodwa seyisekile lelokuba nonke niya kusiqonda isizathu soku. Eli lungiselelo sele lisetyenziswa ngokuphumelelayo gqitha kwiindibano ezithile.

Iinqwelwana Zabantwana (Iipremu): ISebe Lomlilo lincomela ukuba kungaziwa nezi nqwelwana kumabala endibano zize zimiswe ezipasejini naphakathi kwezihlalo. Ekubeni ubukho bezihlwele ngezihlwele busenokubangela ukuxinana, ezi nqwelwana zabantwana zisenokuba yingozi kungekuphela nje kusana ngokwalo kodwa nakumntu onokukhubeka kuzo. Ngoko ncedani ningezi nazo kumabala endibano. Noko ke, izihlalo zeentsana okanye ezo zilungiselelwe iinqwelo-mafutha zamkelekile, ekubeni ezi zisenokubotshelelwa ezihlalweni ecaleni kwabazali. Intsebenziswano yenu kulo mbandela iya kuxatyiswa. Ukuba kunokwenzeka iKomiti Yendibano iya kuzama ukulungiselela igumbi oomama abanokunyamekela kulo iintsana zabo, xa oko kuyimfuneko.

Ubhaptizo: Abo baza kubhaptizwa bafanele bazabalazele ukuba kwizihlalo zabo kwindawo abayilungiselelweyo ngaphambi kokuqalisa kocwangciso lwakusasa ngoMgqibelo. Umntu ngamnye oceba ukubhaptizwa ufanele eze nempahla endilisekileyo yokungena emanzini netawuli. Emva kwentetho yobhaptizo nomthandazo oya kwenziwa sisithethi, usihlalo wocwangciso uya kunikela imiyalelo emifutshane kwabo baza kubhaptizwa aze emva koko achaze ingoma eza kuculwa. Emva kokuculwa komgca wokugqibela, abalindi baya kwalathisa abo baza kubhaptizwa kwindawo yokuntywilisela okanye kwiinqwelo-mafutha eziya kubasa kuyo. Ekubeni ubhaptizo olufuzisela uzahlulelo lukabani lungumcimbi wolwalamano olusondeleyo lobuqu phakathi komntu lowo noYehova, akukho lungiselelo loko kubizwa ngokuba lubhaptizo njengamaqabane ekuya kuthi ababini abaza kubhaptizwa okanye abangaphezu koko bagonane okanye babambane ngezandla ngoxa bebhaptizwa. Akuyomfuneko ukuba abo baza kubhaptizwa bakhuphe ileta ebhalwe ngabadala nechaza ukuba bayakufanelekela ukubhaptizwa. Kwaye akuyomfuneko ukuba abadala bazise uludwe lwamagama abo baza kubhaptizwa.

Inkonzo Yamatsha-ntliziyo: Uncedo lwamatsha-ntliziyo luyafuneka ukuze indibano yesithili iqhubeke ngokutyibilikayo. Enoba unokusebenza kuphela kwithuba elithile lendibano, inkonzo yakho iya kuxatyiswa. Ukuba unako ukunceda, nceda ubhalise kwiSebe Lenkonzo Yamatsha-ntliziyo xa ufika endibanweni. Abantwana abaneminyaka engaphantsi kweli-16 ubudala nabo banokuba negalelo ekuphumeleleni kwendibano, kodwa kufuneka basebenze phantsi kweliso lomzali okanye omnye umntu omdala. Sikhuthaza onke amatsha-ntliziyo ukuba afike ngexesha kwizabelo zawo. Kubaluleke gqitha ukuba abaveleli bamasebe okanye bamacandelo amasebe babe ngabokuqala ukufika kwizabelo zabo. Ukuba ngenxa yesizathu esithile basenokulibaziseka mabancede bazise umveleli wendibano.

Amaqweqwe Eebheji: Ncedani nifake iqweqwe lebheji eyenziwe ngokukhethekileyo endibanweni kwanaxa nisiya naxa nibuya kwibala lendibano. Oku ngokufuthi kusenza sikwazi ukunikela ubungqina obuhle ngoxa siseluhambeni. Nifanele niwafumane amaqweqwe eebheji ngebandla lenu, njengoko engasayi kufumaneka ezindibanweni.

Iingoma: Njengoko ukucula kuyinxalenye yonqulo lwethu sinikhuthaza nonke ukuba niqhelisele ezi ngoma zilandelayo eziya kuba yinxalenye yocwangciso: 33, 91, 111, 38, 221, 217, 43, 128, 152, 177, 207, 201, 35, 89, 50, 168, 42, 45. Xa niqhelisela ezi ngoma, sicebisa ukuba nisebenzise iikhasethi zoMbutho.

Intlanganiso YaseBheteli: Kusuku lwesibini kuya kuqhutywa intlanganiso yabo nabaphi na abavakalisi ababhaptiziweyo abaphakathi kweminyaka eli-19 nengama-35 ubudala abangathanda ukungenela inkonzo yaseBheteli. Kuya kwenziwa izaziso endibanweni ngokuphathelele ixesha nendawo eya kuqhutyelwa kuyo le ntlanganiso.

Ufaniso Lobuvulindlela: Bonke oovulindlela abathe ngxi nabakhethekileyo, abaveleli abahambahambayo, abavangeli basemazweni, nabo bakwinkonzo yaseBheteli okanye abakumsebenzi wokwakha eBheteli bafanele beze neqweqwe labo elithi Iqweqwe Lofaniso Lenkonzo Yobuvulindlela (S-202) endibanweni. Abo bakuluhlu loovulindlela abathe ngxi nabakhethekileyo iinyanga ezintandathu baya kufumana amatikiti okutya axabisa ama-R22 ngokuvelisa iqweqwe labo. Bonke abanye abasebenzi bexesha elizeleyo abakhankanywe ngasentla baya kufumana amatikiti okutya alinganayo kungakhathaliseki ukuba baqalise nini kwinkonzo yabo yexesha elizeleyo. Iqweqwe lakho Lofaniso liphathe njengemali kuba akuyi kunikwa elinye ngoxa usendibanweni. Naziphi na iincwadi ezikhutshwayo zesisa okanye olunye uncwadi lwamaxabiso oovulindlela luya kufunyanwa ngoovulindlela kwigumbi leencwadi kuphela. Ncedani nikhumbule ukuphatha Iqweqwe Lofaniso Lenkonzo Yobuvulindlela lenu.

Isilumkiso: Kungakhathaliseki indawo oyimise kuyo inqwelo-mafutha yakho, ufanele uyitshixe ngamaxesha onke yaye ungaze ushiye nantoni na ibonakala ngaphakathi. Izinto zakho zigcine zitshixelwe kwindawo yemithwalo ukuba kunokwenzeka. Kwakhona, lumkela amasela nabakhuthuzi, abazithandayo iindawo ezinabantu abaninzi. Oku kuquka ukungashiyi nantoni na exabisekileyo ingajongwanga esihlalweni endibanweni. Kuye kwakho neengxelo eziliqela zabantu abangathembekanga abazama ukulukuhla abantwana abaselula ukuba bahambe kwindawo enendibano. Ncedani nilumke.