Isingxobo Semibuzo

◼Abantwana abaselula abanabazali abangamaKristu banokuba nesabelo ukusa kuwuphi umkhamo kubulungiseleli basentsimini ngaphambi kokuba bagqalwe njengabavakalisi abangabhaptizwanga?

Abazali abangamaKristu bafuna ukuba abantwana babo babe ngabakhonzi bakaYehova abaqolileyo nabazinikeleyo. (1 Sam. 2:18, 26; Luka 2:40) Besebancinane, abantwana abakwiintsapho zamaKristu bafanele bakwazi ukuthetha ngokucacileyo bekhusela ukholo lwabo olusekelwe eBhayibhileni. Abantwana bakhula msinya ngokomoya xa bepheleka abazali babo kubulungiseleli basentsimini kwasebusaneni. Kodwa kubalulekile ukuba abaselula bashukunyiswe ngokusuka entliziyweni yabo ukuba baza kuyinandipha inkonzo yasentsimini, ukuba baza kuba nomnqweno wokuba ngabavakalisi abangabhaptizwanga nokuba baza kuqhubeka benesabelo kumsebenzi wokushumayela uBukumkani. Kufuneka baqeqeshwe ngenyameko ngabazali babo. (1 Tim. 4:6; 2 Tim. 2:15) Maxa wambi abanye abavakalisi abafanelekileyo basenokunceda ukuba abazali babo bayavuma.—Bona incwadi ethi Ubulungiseleli Bethu, iphepha 99-100.

Njengoko abantwana abanembeko bepheleka abazali babo abangamaKristu kumsebenzi wendlu ngendlu, bafunda indlela yokuba nesabelo kubulungiseleli. Kodwa abasayi kugqalwa njengabavakalisi abangabhaptizwanga de bavelise umlinganiselo othile woko banokukwenza nobuchule abanabo. Abazali abangamaKristu basenokugqiba ngomkhamo umntwana anokuba nesabelo ukufikelela kuwo ekunikeleni ubungqina njengoko besebenza kunye. Abantwana abangekagqalwa njengabavakalisi abangabhaptizwanga abafanele bahambe bodwa okanye bapheleke abanye abantwana kwinkonzo yasentsimini. Abazali banokulungiselela ukuba abantwana babo baye kwinkonzo yasentsimini baze babavumele ukuba babe nenxaxheba ngeendlela ezahlukahlukeneyo, njengokufunda isibhalo, ukunikela iphecana okanye iphephancwadi, okanye ukubonisa umninimzi umfanekiso okwenye yeempapasho. Njengoko umntwana ekhula, usenokukwazi ukuba nenxaxheba kwingxubusho ukusa kumlinganiselo omkhulu ngakumbi.

Ngoqeqesho olufanelekileyo, abaselula bafunda ukubuxabisa ubunzulu bobulungiseleli njengoko besabela kukhokelo lwabazali babo yaye benehambo elungeleleneyo. Abazali abafanele babashiye abantwana babo abangekagqalwa njengabavakalisi abangabhaptizwanga kwintlanganiso yenkonzo yasentsimini, belindele ukuba abanye babanyamekele. Abazali abanenkxalabo bayayiqonda imbopheleleko yabo yobuqu yokuba neliso kumsebenzi wabantwana babo. Kambe ke, abanye abavakalisi abanenkathalo basenokukulungela ukunceda ekuqeqesheni abantwana abancinane ebandleni ababonakalisa umdla wokwenene ekukhonzeni uYehova kubulungiseleli.