Ukuhlangabezana Nocelomngeni Lobulungiseleli Bendlu Ngendlu
1 Ingcamango yokuya kwindlu ngendlu, ukutyelela abantu ongabaziyo, kulucelomngeni lokwenene kwabaninzi abakunqulo olunyulu. Kodwa uthando lokwenene ngoYehova luyamnceda ubani ahlangabezane nolu celomngeni, yaye kwanabo baneentloni kakhulu ngokwemvelo baye baphucula ukusa kwinqanaba lokuba ngabavakalisi bexesha elizeleyo beendaba ezilungileyo.
2 Ngokutsho kweBhayibhile licacile elokuba amaKristu okuqala abelana nabanye ngeendaba ezilungileyo zoBukumkani bukaThixo ngokuya kwindlu ngendlu. (IZe. 5:42; 20:20, 21) NjengamaKristu kule nkulungwane yama-20, nathi sinesabelo kulo msebenzi. Uthando lwethu ngoThixo nangabamelwane bethu lusishukumisela ukuba siwenze lo msebenzi kwanaxa abantu besenokungabi namdla, bacaphuke, bangasihloneli, okanye basichase ngokungqalileyo.
3 Oko Kuphunyezwa Kukuhlangabezana Nolu Celomngeni: Sihlandlo ngasinye sityelela, senza unako nako wokuhlwayela intwana yembewu yenyaniso, sisazi ukuba ekugqibeleni xa intshulile isenokuphumela ekuvelisweni kwesiqhamo soBukumkani. (INtshu. 11:6) Iimeko zabantu ziyaguquka. Kusenokwenzeka into ethile enokubangela umninimzi acinge ngoko bekuthethwe ngomnye wethu endlwini yakhe, yaye kwisihlandlo esilandelayo usenokuphulaphula ngokungakumbi.
4 Ubulungiseleli bethu bendlu ngendlu bunika abo batyekele enyanisweni nasebulungiseni ithuba lokufunda ngoYehova nangeenjongo zakhe, bubaqalisa kwindlela esa ebomini obungunaphakade. Ngaloo ndlela abo basukela uyolo lwehlabathi ngothando balunyukiswa ukuba baguquke ukuze banandiphe inkoliseko kaYehova. Kwakhona obu bulungiseleli benza kwaziwe igama likaYehova buze buzise uzuko kuye, enoba abaninimzi bayaphulaphula okanye abenjinjalo.—Hez. 3:11.
5 Ukusebenza kubulungiseleli kusinceda sivelise iziqhamo zomoya, ezinjengothando lokungazingci, uvuyo, uxolo nokuzeka kade umsindo. (Gal. 5:22) Kusinceda sithobeke yaye sibe novelwano, ekubeni kubandakanya ukwenzela abanye okulungileyo. Ukuqhubeka sixakekile emsebenzini kaYehova kuyasikhusela kwihlabathi.—1 Kor. 15:58.
6 Uncedo Lokuhlangabezana Nolu Celomngeni: Abasebatsha kufuneka bafunde indlela yokuba nesabelo kulo msebenzi ungowona uchwayitisayo. Ngokufuthi abazithembanga yaye ngenxa yoko basenokudinyazwa nje kukucinga ngokuya kwindlu ngendlu. Sinokuxubusha nabo amazwi enkcaso aqhelekileyo nangendlela esinokuwaphendula ngayo. Sinokuqhelisela ukusebenzisa amanye amacebiso amahle akwincwadi ethi Ukuqiqa aphathelele ukusabela kumazwi anokuthintela incoko. Kutheni ungabancedi balungiselele inkonzo yasentsimini? Kwakhona banokufumana uncedo olungakumbi ngokubakho rhoqo kwiintlanganiso zenkonzo yasentsimini baze emva koko basebenze nabavakalisi abanamava ngakumbi. Ukusebenza neqela kunokubomeleza gqitha.
7 Njengokuba sisiya kwindlu ngendlu, sinelungelo lokumela uThixo wethu, uYehova. Luluphi uzuko ubani anokuba nalo oludlula ukusebenza noThixo? (1 Kor. 3:9) Ukuba sithembela kuye, umoya wakhe uya kusinceda sihlangabezane nocelomngeni lobulungiseleli bendlu ngendlu.—2 Kor. 3:5.