Ukwenza Amabuyelo Ngendlela Elula Nephumelelayo
1 Ngaba wenza amabuyelo rhoqo, okanye ngaba usoloko ukufumanisa kunzima ngenxa yokungakwazi oko uza kukuthetha? Akukho mfuneko yokuba woyike. Nazi izinto ezintathu eziya kukunceda uphumelele: (1) ukulungiselela kakuhle; (2) ubuchule bokuxubusha ingongoma enye okanye ezimbini kwimibandela elula embalwa yeBhayibhile; kunye (3) nokukulungela ukuphulaphula imbono yomninimzi.
2 Xa ulungiselela ukwenza ibuyelo, qwalasela umbandela oya kufaneleka ukuba ungawuxubusha nomninimzi. Ngaba ngumntwana wesikolo? Abantwana besikolo abaninzi baya kuba nexesha elongezelelekileyo kule nyanga lokuxubusha imixholo yeBhayibhile ekubeni besafumene ikhefu kwizifundo zabo. Usenokufumana abanye babo bekulungele ukuphulaphula isigidimi soBukumkani. Ngaba kutyelelo lwakho lokugqibela uye waqukumbela ngokubuza umbuzo, okanye ngaba umninimzi uye wabonakalisa umdla kumbandela othile? Hlolisisa amanqaku akho, yaye sebenzisa incwadi Ukuqiqa ukuze ufumane inkcazelo oya kuyisebenzisa ekwenzeni ibuyelo elinempumelelo. Xa ukutyelelo lokubuyela, yiba nobubele nobuhlobo. Mbulise umninimzi umbiza ngegama lakhe.
3 Ukuba ubuhambise IMboniselo noVukani! kumninimzi, utyelelo lwakho lokubuyela unokulusekela kwingongoma enye okanye ezimbini oye wazikhetha kwiphephancwadi. Ukuba ubuhambise iphecana kutyelelo lokuqala, usenokugqabaza ngephecana elo okanye ubuyele ngokubhekisela kwingongoma efanelekileyo kwiphephancwadi okanye kwincwadana enemifanekiso.
4 Ukuba ubuhambise iphecana elithi “Ubomi Kwihlabathi Elitsha Elinoxolo,” usenokuthi:
◼ “Kwixesha elidluleyo xa bendilapha, sithethe ngedinga likaThixo lehlabathi elitsha elinoxolo. Njengoko siye saxubusha, iimeko ezilunge ngakumbi ziya kuziswa buBukumkani bukaThixo. Yintoni ocinga ukuba kufuneka siyenze ukuze sibe yinxalenye yelo hlabathi litsha linoxolo?” Vumela umninimzi aphendule, wandule wabelane naye ngengcamango ekwiNdumiso 37:9, 11, 29.
5 Ukuba ubuhambise iphecana elithi “Liyintoni Ithemba Ngabafileyo Obathandayo?,” la magqabaza mafutshane asenokwenza kuqaliswe ingxubusho:
◼ “Kwixesha elidluleyo xa besincokola, ndikushiyele eli phecana linomxholo othi Liyintoni Ithemba Ngabafileyo Obathandayo? Isiqendu sesithathu sibuza imibuzo ebangel’ umdla: ‘Kutheni abantu besifa nje? Baphi abafileyo? Ibe sinokuqiniseka njani ukuba banokuphila kwakhona?’ Umxholwana olandelayo, onomxholo othi ‘Ukufa, Noko Kwenzekayo Xa Sisifa,’ uphendula umbuzo ngamnye. Ndinawo omnye umbhalo wephecana apha kum. Phawula oko likuthethayo kwisiqendu sesine.” Yandula ke njengokuba umninimzi naye ejonge kwelakhe, ufunde esi siqendu, kuquka nezibhalo ezibini uze ubuze imbono yomninimzi. Kuphulaphule ngenyameko oko akuthethayo uze uthethe ngokuvisisana nako.
6 Ebudeni bengxubusho, umninimzi usenokuchaza iimbono eziliqela ezingachananga. Akuyomfuneko ukuba wenze imbambano ngako konke akuthethayo. Kunoko, hlala kumxholo eniwuxubushayo. Naziphi na iimbono ezingezozazibhalo asenokuba nazo zinokulungiswa kumatyelelo okubuyela alandelayo.
7 Ceba kangangoko unako ukulandela nawuphi na umdla ngokwenza amabuyelo ngendlela elula nephumelelayo ebudeni buka-Aprili.