Ukuzisebenzisa Kakuhle Iincwadi Zethu
1 UYehova usinike ukutya kokomoya okuyintabalala. Inkoliso yoku kudla ibikwiincwadi ezinamaphepha ali-192. Ebudeni bukaJanuwari siza kuhambisa iincwadi ezinamaphepha ali-192 eziliqela. Ngaba unazo ezinye zazo ezisekwimeko entle ekhayeni lakho? Ngaba ibandla linazo esitokhweni? Ukuba kunjalo, kuya kuba kuhle ukuhlolisisa umbandela wazo uze ukhethe iingongoma onokuthetha ngazo onokuzisebenzisa kwintshumayelo yakho.
2 Ukuba usebenzisa incwadi ethi “Iindaba Ezilungileyo—Zokonwabisa Wena,” usenokuqala ngokuthi:
◼ “Ndiqinisekile ukuba uya kuvumelana nam kwelokuba akubonakali kunokwenzeka ukunandipha ulonwabo lokwenene emhlabeni enoba lixeshana nje elifutshane ngenxa yazo zonke iingxaki esijamelene nazo ezinjengokugula, ukwaluphala, indlala, ulwaphulo-mthetho nokunganqabiseki. [Vumela umninimzi agqabaze.] Kukho izizathu ezivakalayo zokukholelwa kwelokuba kunokwenzeka ngokwenene ukuba siphile ngonaphakade ngolonwabo emhlabeni. Esinye isizathu kukuba nguThixo othembisa oko. Phawula okuthethwa yiNdumiso 37:29. [Yifunde.] Kodwa kuthekani ngoonobangela bokungonwabi esibakhankanyileyo? KwiSityhilelo 21:3, 4 uThixo uthembisa ukubaphelisa. [Sifunde.] Ndiyazi ukuba ungathanda ukufunda okungakumbi, yaye ukuze ndikuncede wenjenjalo, sihambisa le mpapasho.” Yandula ke ubonise umninimzi ingongoma ekwincwadi ethi Iindaba Ezilungileyo.
3 Ngokufuthi sidla ngokufumana abantu abaselula ezindlwini. Wasebenzise amathuba anjalo ukuze uhambise incwadi ethi, “Ubutsha Bakho—Ukufumana Okona Kulungileyo Kubo.”
Usenokuthi:
◼ “Ndiyavuyiswa kukufumana ithuba lokuthetha nawe kuba ndingathanda ukuva imbono yomntu oselula. UThixo wathetha okuthile eBhayibhileni okubhekiswe ngokukodwa kubantu abaselula njengawe. [Funda INtshumayeli 12:1.] Ibonisa ukuba simele sikhumbule uThixo ebutsheni bethu ukuba sifuna ikamva elonwabisayo. Ngaba uvakalelwa kukuba umntu oselula ufanele abe nomdla kuThixo, uMdali wethu? Ngaba oku kunento yokwenza nokonwaba kwethu? [Vumela impendulo.] Mandikubonise amagqabaza akule ncwadi.” Tyhila kwiphepha 191, isiqendu 15 uze ufunde izivakalisi zokuqala ezibini. Yandula ke ubuyele kwiziqulatho uze umbonise imixholo embalwa ulutsha olufuna amagqabaza angqalileyo nokuncedwa kuyo. Hambisa incwadi ethi Ubutsha nge-R1,00.
4 Usenokukhetha ukusebenzisa incwadana enemifanekiso ethi “Ngaba Ngokwenene UThixo Usikhathalele?” Ukuba kunjalo, unokuthetha oku:
◼ “Abantu abaninzi bazibuza isizathu sokuba uThixo avumele ukubandezeleka okungaka ehlabathini. Ekubeni engusomandla, kutheni engathabathi manyathelo ukuze aphelise ukubandezeleka kwethu? Uvakalelwa njani koko? [Vumela impendulo.] IBhayibhile isiqinisekisa ukuba uThixo akasilahlanga.” Tyhila kwiphepha 27, isiqendu 22, uze ufunde INdumiso 37:11, 29. Mbonise imifanekiso enomtsalane ebonisa oko sinokukhangela phambili kuko. Ukuba le ncwadana inemifanekiso iyamkelwa, thembisa ukubuyela ukuze ubonise indlela enokusetyenziswa ngayo kwisifundo seBhayibhile.
5 Uncwadi lwethu lushukumisele amawaka abantu ukuba ahlolisise iBhayibhile ngakumbi. Abakufundileyo kubazisele ithemba lekamva elonwabisayo. (INdu. 146:5) Sinelungelo lokubanceda.