Esona Siganeko Sibalulekileyo Kwimbali Yoluntu
1 UYesu weza emhlabeni ngokomyalelo kaYise ukuze angqinele inyaniso eyayiya kusikhokelela kubomi obungunaphakade. (Yoh. 18:37) Ukuthembeka kwakhe kude kuse ekufeni kwazisa uzuko kuYehova, kwangcwalisa igama likaThixo, kwaza kwalungiselela intlawulelo. (Yoh. 17:4, 6) Oku kuko okwenza ukufa kukaYesu kwaba sesona siganeko sibalulekileyo kuyo yonke imbali yoluntu.
2 Ukususela ekudalweni kuka-Adam, mabini kuphela amadoda afezekileyo akhe aphila kulo mhlaba. UAdam wayemele azisele abantwana bakhe ababengekazalwa iintsikelelo. Kunoko, ngokuzingca wavukela, ebafaka ebugxwayibeni obabuya kuphelela ekufeni. Xa uYesu wafikayo, wabonisa ukunyaniseka nokuthobela okugqibeleleyo, evulela bonke ababonakalisa ukholo ithuba lobomi obungunaphakade.—Yoh. 3:16; Roma 5:12.
3 Asikho esinye isiganeko esinokuthelekiswa nokufa kukaYesu okulidini. Kwayiguqula imbali yoluntu. Kwanikela isizinzi sokuvuswa kwamawaka ezigidi zabantu ekufeni. Kwabeka isiseko soBukumkani obungunaphakade obuya kuphelisa bonke ubungendawo buze benze umhlaba ube yiparadisi. Ekugqibeleni buya kukhulula lonke uluntu kuyo yonke ingcinezelo nobukhoboka.—INdu. 37:11; IZe. 24:15; Roma 8:21, 22.
4 Konke oku kusinceda siqonde isizathu sokuba uYesu wafundisa abalandeli bakhe ukuba bakhumbuze ukufa kwakhe ngokwenza iSikhumbuzo nyaka ngamnye. (Luka 22:19) Kuba siyiqonda intsingiselo yaso, sikhangele phambili ekuhlanganisaneni namabandla amaNgqina kaYehova ehlabathini lonke emva kokutshona kwelanga ngoLwesihlanu, ngoAprili 14. Ngaphambi kwelo xesha, kuya kuba kuhle ukufunda kunye njengentsapho ingxelo yeBhayibhile engeentsuku zokugqibela zikaYesu emhlabeni nokumela kwakhe inyaniso ngenkalipho. (Iindinyana ezicetyiswayo ziboniswe kwiKhalenda yethu Yowe-1995, ngoAprili 9-14.) Wasimisela umzekelo wokuzinikela kuMdali wethu. (1 Pet. 2:21) Masenze okusemandleni ethu simeme abahlobo neentsapho, kunye nabo sibaqhubela izifundo zeBhayibhile nabanye abantu abanomdla, kule ntlanganiso ibalulekileyo. Bachazele kwangaphambili ngoko kuza kwenzeka nentsingiselo yemifuziselo.—1 Kor. 11:23-26.
5 Abadala bafanele bacebe kwangaphambili ukuze baqiniseke ukuba iHolo yoBukumkani icocekile. Kufanele kwenziwe amalungiselelo okuba umntu othile alungiselele imifuziselo. Indlela yokuhanjiswa kwemifuziselo ifanele icwangciswe kakuhle. Amacebiso aluncedo angendlela esinokuyibonakalisa ngayo intlonelo ngeSidlo SeNkosi Sangokuhlwa anikelwa kwiMboniselo kaFebruwari 15, 1985, iphepha 19. Kuya kuba kokufaneleke gqitha ukuba amabandla alungiselele ukuya kwinkonzo yasentsimini ithuba elongezelelekileyo ebudeni beentsuku eziliqela ngaphambi kwesikhumbuzo nakwiintsuku ezimbalwa emva kwaso.
6 Kunyaka ophelileyo, kwihlabathi lonke bekukho abazizi-12 288 917 abebeze kwisikhumbuzo sesi siganeko sikhethekileyo. Ekubeni olu ilolona suku lubalulekileyo kwiikhalenda zethu, sonke sifanele sibekho.