Simele Sibe Nombulelo Ngoko Sinako
1 “Ke yena uThixo uqondakalisa okwakhe ukusithanda ngokuthi, sakubon’ ukuba sisengaboni, uKristu asifele.” (Roma 5:8) Hayi indlela esifanele sonke sibe nombulelo ngayo ngedini elibalaseleyo elenziwa nguYehova uThixo noNyana wakhe besenzela thina! Ngegazi likaKristu elaphalalayo, sinikwe ithuba lobomi obungunaphakade, nto leyo abangenakuze basinike yona abanye abantu.
2 Sinokulubonakalisa njani uxabiso lwethu? Kukho abantu abaninzi abanxanelwe ulwazi oluyinyaniso, olunokufunyanwa kwiLizwi likaThixo eliNgcwele kuphela. Ukuthanda kukaYehova kukuba bafikelele ekuyazini inyaniso. (1 Tim. 2:4) Uxabiso lwethu ngenyaniso silubonakalisa ‘ngokuvakalisa iindaba ezilungileyo zoBukumkani bukaThixo.’ (Luka 4:43) Ukuba nenxaxheba ngentliziyo iphela kulo msebenzi kubonisa ukuba siyakuxabisa ukuba uKristu wasifela ibe sifuna ukumxelisa ngokuwuthobela ngokuthembekileyo umyalelo wakhe wokwenza abanye babe ngabafundi.—Mat. 28:19, 20.
3 Ziziphi ezinye iindlela zokushumayela esinethuba lazo? Ngaba singakwazi ukuba ngamathuba athile sibhalise njengoovulindlela abangabancedani? Bakuba bebale iindleko, abanye basenokukwazi ukuthabatha inkonzo yobuvulindlela obuthe ngxi. Ngokuxhakamfula la mathuba mahle, sinokwandisa umlinganiselo wexesha esilichithela ekusasazeni iindaba ezilungileyo zoBukumkani. Mhlawumbi kwixa elidluleyo uye wacinga ngokubhalisa, kodwa kwakho imiqobo. Mhlawumbi iimeko zakho zitshintshile. Ukuba kunjalo, ngaba ukhe wacingisisa nzulu ngokungenela inkonzo yobuvulindlela okanye ukukhonza njengovulindlela ongumncedani?
4 Umbulelo wethu uba mkhulu ngakumbi xa sijonga izinto ezenzekayo apho sikhoyo. Kukho ugonyamelo, intiyo neziphithiphithi ezandayo ehlabathini lonke. UPawulos wawachaza kakuhle amaxesha ethu wathi “anomngcipheko” yaye “kunzima ukuqhubana nawo.” (2 Tim. 3:1, NW) Kwezi meko zidimazayo, sineendaba ezilungileyo ezininzi esinokwabelana ngazo nabanye. Sinamaphephancwadi amabini amahle, IMboniselo noVukani! Ebudeni buka-Aprili siya kuhambisa umrhumo wephephancwadi IMboniselo. Apho abantu bangawamkelanga lo mnikelo, sinokubashiyela amaphephancwadi amabini. Kwakhona sineencwadana ezinemifanekiso ezinemibandela eliqela. Ezi mpapasho zinokubahlaziya ngokwenene abazifundayo. Ukuba nombulelo kwethu ngoko sinako kufanele kusishukumisele ekubeni sabelane nabanye ngako ngobubele.—Heb. 13:16.
5 Kusenokwenzeka ukuba kwindawo ohlala kuyo, abantu ababonisi mdla ungako kwizinto zokomoya. Ngokwahlukileyo koko, kukho imihlaba evelisa iziqhamo. Kwintsimi yethu yabantsundu kukho umdla omkhulu gqitha. Ukuba uyakwazi ukuthetha iilwimi zabantsundu ezingakumbi, ngaba kunokwenzeka ukuba ukhonze kwindawo ekweli lizwe apho lufunwa ngokwenene uncedo lwakho? Umveleli wakho wesiphaluka usenokukunika amacebiso kulo mbandela, okanye unokubhalela kwiofisi yesebe.
6 Sinezizathu ezininzi zokuba nombulelo ngoko sinako, eneneni sinentabalala yezinto ezintle. Eyona ndlela sinokuwubonakalisa ngayo umbulelo wethu kuYehova kukwazisa igama lakhe neenjongo zakhe kwabanye.—Isa. 12:4, 5.