Yiba Nombulelo
1 Nangona siphila ‘kumaxesha amanqam ekunzima ukujamelana nawo,’ sinezizathu ezininzi zokumbulela uYehova. (2 Tim. 3:1) Esona sizathu siyintloko sokuba sibe nombulelo sisipho soNyana wakhe. (Yoh. 3:16) Ukongezelela koko, ngoxa abo bakunqulo lobuxoki bebethwaxwa linxele likaKhetsekile ngokomoya, thina sinandipha intabalala yokutya kokomoya. (Isa. 65:13) Siyinxalenye yobuzalwana behlabathi lonke yaye sivuyiswa lilungelo lokuba nenxaxheba ekwandeni konqulo lokwenyaniso. (Isa. 2:3, 4; 60:4-10, 22) Sinokuwubonakalisa njani umbulelo wethu kuYehova ngeentsikelelo asivava ngazo?—Kol. 3:15, 17.
2 Inkonzo Evuyisayo Yomphefumlo Uphela: Xeshikweni umpostile uPawulos wayexubusha ngeminikelo wabhala wathi: “UThixo uthanda umphi ochwayitileyo.” (2 Kor. 9:7) Lo mgaqo ukwasebenza nakwinkonzo yethu kuThixo. Umbulelo ubonakala ngehlombe esinalo ngenyaniso, uvuyo lwethu kwiintlanganiso zamaKristu, inzondelelo yethu kubulungiseleli basentsimini nehlombe esilibonakalisayo xa siphumeza ukuthanda kukaThixo.—INdu. 107:21, 22; 119:14; 122:1; Roma 12:8, 11.
3 KuSirayeli wamandulo uMthetho wawungenamimiselo ingqalileyo kwiminikelo ethile. Umnquli ngamnye wayenokubonisa umbulelo wakhe ngokunikela ‘ngokwentsikelelo ayinikwe nguYehova.’ (Dut. 16:16, 17) Ngokufanayo namhlanje, intliziyo enombulelo iya kusishukumisela ukuba senze ngokokuvuma kweemeko zethu kumsebenzi wokushumayela ngoBukumkani nowokwenza abafundi. Abanye baye basebenzise amaxesha okuvala emsebenzini okanye esikolweni ukuze bandise ixesha abalichitha kwinkonzo yasentsimini, bambi bade babe ngoovulindlela.
4 Ukuphuphuma Ngumbulelo: Eyona ndlela sibonisa ngayo ukuba nombulelo kuYehova ngumthandazo. (1 Tes. 5:17, 18) ILizwi likaThixo lisibongoza ukuba ‘siphuphume lukholo sinombulelo.’ (Kol. 2:7) Kwanaxa sixakekile okanye sicinezelekile, sifanele siquke nombulelo kwimithandazo yethu yemihla ngemihla. (Fil. 4:6) Ewe, ngobulungiseleli bethu nangemithandazo yethu, ngamana ‘singatyeba ngeembonakaliso ezininzi zombulelo kuThixo.’—2 Kor. 9:12.