UYehova Unika Amandla
1 Njengabantu bakaYehova, sinikwe isabelo sokushumayela iindaba ezilungileyo ngoxa sihlala sinehambo ‘entle phakathi kweentlanga.’ (1 Pet. 2:12; Mat. 24:14) Ngenxa yamaxesha anomngcipheko kunye nobuthathaka neentsilelo zethu, asinakuze siwufeze sisedwa lo msebenzi. (2 Tim. 3:1-5) Hayi indlela esivuya ngayo kuba sinokulindela uncedo kuYehova!
2 Umpostile uPawulos wanyamezela izilingo ezininzi. (2 Kor. 11:23-27) Wakwazi njani ukuhlangabezana nazo aze awuphumeze umsebenzi awayewabelwe? UYehova wamnika “incamisa yamandla.” (2 Kor. 4:7) UPawulos waluvuma olo ncedo lukaThixo xa wabhala wathi: “Ndinokuzenza izinto zonke, ndikulowo undomelezayo.” (Fil. 4:13) Nathi uYehova uya kusinceda ngokufanayo. Sinokulufumana njani olu ncedo?
3 Ngokuthandaza Singayeki: UYesu wasibongoza ukuba siqhubeke ‘sicela, sifuna, yaye sinkqonkqoza,’ yaye singanikezeli. (Luka 11:5-10) Ukuzingisa kwethu emthandazweni kubonisa uYehova indlela esixhalabe ngayo, indlela esikufuna ngokunzulu ngayo esikucelayo nokunyaniseka kweentshukumisa zethu. (INdu. 55:17; 88:1, 13; Roma 1:9-11) UPawulos wakuqonda ukubaluleka kokuzingisa emthandazweni xa wayesibongoza ukuba ‘sithandaze singayeki.’ (1 Tes. 5:17) Umthandazo yenye yeendlela eziyintloko esilufumana ngazo uncedo lukaYehova.
4 Ngokulandela Ulwalathiso Lobuthixo: Igama elithi “ulawulo lobuthixo” lithetha “ukulawulwa nguThixo,” oluthando. Siyangenelwa kulawulo lwakhe ngokwamkela igunya lakhe nokulandela imiyalelo yakhe kwizigqibo ezikhulu nezincinane. ‘Umkhonzi othembekileyo noqondayo’ umela ulawulo lobuthixo kulo mhlaba. (Mat. 24:45-47) Ukusebenzisana nentlangano esetyenziswa ngulo “mkhonzi” kubalulekile ukuba siza kufumana iintsikelelo zikaYehova. (Thelekisa amaHebhere 13:17.) UYehova uya kusivuza ngokunyaniseka nokuvuma kwethu ukuthobela imithetho yakhe ngokusinika amandla esiwafunayo ngexesha elifanelekileyo.—Heb. 4:16.
5 Ngokuhlala Sisondele Kubazalwana Bethu: Uthando luphawu olufanisa abafundi bakaYesu. (Yoh. 13:34, 35) Ngenxa yokwahluka kweempawu zobuntu, sisenokungquzulana ngenxa yoko kwahluka. Kufuneka sibe nemfesane kakhulu, sixolelana. (Efe. 4:32) Oku kusenza sikwazi ukuhlala sisondele kubazalwana bethu esikholwa nabo size sikhuthazwe kukunyamezela kwabo ngokomelela ngoxa bevavanywa. ‘Ekubeni sisazi ukuba kwaezo ntlungu ziyenzeka kubo abazalwana bethu abasehlabathini,’ sinamandla esiwanikwe nguThixo okuhlangabezana neengcinezelo ezinjalo.—1 Pet. 5:9.
6 Ngokuhlala Sinomzila Omhle Wocwangciso Lofundisiso Lobuqu: Ukomeleza iingqondo neentliziyo zethu ngokomoya kusenza silwe nohlaselo lukaSathana. (1 Pet. 5:8) Umzila omhle wofundisiso lobuqu uya kongezelela kuvimba wethu wolwazi lobuthixo. Sinokukhupha kulo vimba xa sijamelene neemvavanyo zemihla ngemihla. UPawulos wabethelela ukuba “ulwazi oluchanileyo” lunendima ebalulekileyo ekuzuzeni usindiso. (1 Tim. 2:3, 4, NW) Kubalulekile ukuzondla ngokudla kokomoya rhoqo.
7 Onke amalungiselelo afunekayo okusinceda sihlale somelele ayafumaneka kwibandla lobuKristu. Ukuyixhasa ngomphefumlo uphela imisebenzi yalo kuya kuqinisekisa ukuba ‘siya kuhamba singatyhafi.’—Isa. 40:29-31.