“Yakha Intsapho Yakho”
1 Ngokungathandabuzekiyo, kuzo zonke iindawo ezisehlabathini, ubomi bentsapho buyawohloka. Ihlabathi likaSathana lizaliswe yinkohliso nakukuziphatha okubi. (1 Yoh. 5:19) Oku kubalaselisa ukungxamiseka kokuba ‘sakhe iintsapho zethu’ size sifundise nabanye indlela yokwenza okufanayo kwezabo.—IMize. 24:3, 27, NW.
2 Imigaqo YeBhayibhile Iyasilondoloza: Imfihlelo yolonwabo lokwenene lwentsapho ifumaneka ekusebenziseni imigaqo yeBhayibhile. Ezi nyaniso zibalaseleyo zinceda onke amalungu entsapho kuzo zonke iinkalo zobomi. Intsapho ezisebenzisayo iya konwaba ize inandiphe uxolo lobuthixo.—Thelekisa uIsaya 32:17, 18.
3 Imigaqo enokusinceda sakhe iintsapho zethu siyibekelwe kakuhle kwincwadi entsha ethi, Imfihlelo Yolonwabo Lwentsapho. Isahluko ngasinye siqukumbela ngebhokisi eluncedo yokufundisa ebalaselisa imigaqo efanele ikhunjulwe ngamalungu entsapho. Inkoliso yezi bhokisi iqala ngombuzo othi, “Le migaqo yeBhayibhile ingasinceda njani . . . ?” Oku kutsalel’ ingqalelo kwiingcinga zikaThixo ukuze sicinge ngendlela acinga ngayo ngombandela oxutyushwayo.—Isa. 48:17.
4 Yazi kakuhle le ncwadi. Funda ukufumana imigaqo enokukunceda xa kuvela iingxaki ezahlukahlukeneyo. Le ncwadi ixubusha ngemibandela enjengale: oko ubani amele akujonge kulowo uza kuba liqabane lakhe lomtshato (isahluko 2), izitshixo ezibalulekileyo zokuvula umnyango osa kulonwabo lomtshato ohlala uhleli (isahluko 3), indlela abazali abanokubakhulisa ngayo abantwana babo abakwishumi elivisayo babe ngabantu abakhulileyo abaqolileyo, naboyik’ uThixo (isahluko 6), indlela onokuyikhusela ngayo intsapho yakho kwiimpembelelo ezitshabalalisayo (isahluko 8), imigaqo enokunceda iintsapho ezinomzali ongenaqabane lomtshato ziphumelele (isahluko 9), uncedo lokomoya kwiintsapho ezinekhoboka lotywala nogonyamelo (isahluko 12), oko umele ukwenze xa amaqhina omtshato esecicini lokuqhawuka (isahluko 13), oko kunokwenziwa ukubeka abazali abakhulileyo (isahluko 15), nendlela yokuzuzela intsapho yakho ikamva elihlala lihleli (isahluko 16).
5 Yisebenzise Kakuhle Le Ncwadi Intsha: Ukuba anikakwenzi oko, kutheni ningaqalisi ukuyifundisisa kunye njengentsapho le ncwadi ithi Ulonwabo Lwentsapho? Kwakhona, nanini na intsapho idibana neengxaki okanye ucelomngeni olutsha, hlolisisani izahluko zale ncwadi ezixubusha ngalo, nize ngomthandazo nicinge ngendlela eninokusisebenzisa ngayo eso siluleko. Ukongezelela, ngoMatshi, ziphe ixesha elininzi kucwangciso lwakho lobulungiseleli basentsimini ukuze uzabalazele ukunika abantu abaninzi kangangoko kunokwenzeka incwadi ethi Imfihlelo Yolonwabo Lwentsapho.
6 Iintsapho eziqhelisela uzinikelo lobuthixo ziya komelezwa ngokomoya zize zimanyane yaye ziya kukuxhotyiselwa kakuhle ukujamelana neentlaselo zikaSathana. (1 Tim. 4:7, 8; 1 Pet. 5:8, 9) Hayi indlela esinombulelo ngayo kukuba nemfundiso yobuthixo evela kuMsunguli wentsapho!