Qhubeka Ushumayela!
1 Kukuthanda kukaThixo ukuba “zonke iintlobo zabantu zisindiswe zize zifikelele elwazini oluchanileyo lwenyaniso.” (1 Tim. 2:4) Ngenxa yesi sizathu, usinike isabelo sokuba sishumayele iindaba ezilungileyo. (Mat. 24:14) Ukuba siyasiqonda isizathu sokuba siqhubeke sishumayela, nakuphi na ukudimazeka okanye izinto eziphazamisayo azisayi kusiyekisa.
2 Kutheni Sizingisa Nje? Zininzi izinto eziphazamisayo kweli hlabathi ezenza abantu bakulibale okanye bangakusi so oko sibaxelela kona. Ngoko ke, simele siqhubeke sibakhumbuza ngesigidimi sikaThixo sosindiso. (Mat. 24:38, 39) Ukongezelela, iimeko zobomi babantu zisoloko ziguquka. Kwaneemeko zehlabathi zinokuguquka ngokuphawulekayo ngobusuku nje obunye. (1 Kor. 7:31) Ngomso, kwiveki ezayo okanye kwinyanga ezayo, abantu esishumayela kubo banokujamelana neengxaki ezintsha okanye amaxhala abenza banikele ingqalelo engakumbi kwiindaba ezilungileyo esibaphathela zona. Ngaba akunambulelo ngokuzingisa kweNgqina elakuzisela inyaniso?
3 Ukuxelisa Inceba KaThixo: Ngomonde uYehova uye wavumela ukuba kudlule ixesha elithile ngaphambi kokuba aphumeze umgwebo kubantu abangendawo. Esebenzisa thina uye waqhubeka ebongoza abantliziyo zinyanisekileyo ukuba babuyele kuye ukuze basindiswe. (2 Pet. 3:9) Siya kuba netyala legazi ukuba asiqhubeki sivakalisa isigidimi sikaThixo senceba ebantwini yaye sibalumkise ngokuphunyezwa komgwebo wakhe kubo bonke abangazishiyiyo iindlela zabo ezimbi. (Hez. 33:1-11) Nangona umsebenzi wethu wokushumayela ungasoloko usamkelwa ngobubele, singaze siyekelele ekwenzeni umgudu wokunceda abanyanisekileyo baxabise inceba enkulu kaThixo.—IZe. 20:26, 27; Roma 12:11.
4 Ukubonisa Uthando Lwethu: NguYehova uThixo, ngoYesu Kristu, oyalele ukuba iindaba ezilungileyo zishunyayelwe emhlabeni wonke. (Mat. 28:19, 20) Kwanokuba abantu bayala ukusiphulaphula, sinethuba lokubonisa uthando lwethu nokuzinikela kuThixo ngokuzingisa ekwenzeni oko kulungileyo.—1 Yohane 5:3.
5 Ngamana singazimisela ukuqhubeka sishumayela! Masenjenjalo ngenzondelelo ngoxa ‘iseyimini kaYehova yosindiso.’—2 Kor. 6:2.