Kutheni Siqhubeka Sibuyela?
1 Ngaba wakha wazibuza lo mbuzo, mhlawumbi xa wawulungiselela usuku enkonzweni? Kwimimandla apho intsimi yethu isetyenzwa ngokuphindaphindiweyo, abaninimzi basenokuba bayasazi yaye basenokusibhebhetha ngokukhawuleza. Yimbinana nje kuphela esabela kakuhle. Ukanti, sinezizathu ezininzi nezinamandla zokuba siqhubeke sibuyela.
2 Okokuqala, siyalelwe ukuba siqhubeke sishumayela isigidimi soBukumkani de kufike isiphelo. (Mat. 24:14; 28:19, 20) Umprofeti uIsaya wakha wabuza ukuba kuya kude kube nini na eqhubeka nomsebenzi wakhe wokushumayela. Impendulo awayinikwayo ifumaneka kuIsaya 6:11. Akukho mathandabuzo ngako oku—waxelelwa ukuba aqhubeke ebuyela ebantwini ngesigidimi sikaThixo. Kunjalo nanamhlanje, nakuba nje besenokusibhebhetha, uYehova ulindele ukuba siqhubeke sibuyela kubantu abahlala kwintsimi yethu. (Hez. 3:10, 11) Le yimbopheleleko engcwele esiyithwalisiweyo.—1 Kor. 9:17.
3 Esinye isizathu sokuba siqhubeke sibuyela kukuba oku kusivulel’ ithuba lokubonisa ubunzulu bozinikelo lwethu kuYehova. (1 Yoh. 5:3) Ngaphezu koko, xa sicamngca ngoko ikamva elingekude likufumbathele uluntu, singarhoxobisa njani ekuzameni ngothando ukulumkisa abamelwane bethu? (2 Tim. 4:2; Yak. 2:8) Ukuthembeka kwethu ekuphumezeni isabelo sethu kubanika amathuba amaninzi okuba basabele kwisigidimi sikaThixo sosindiso, ukuze bangathi abazange balunyukiswe.—Hez. 5:13.
4 Ukongezelela, asinakuze siyazi into yokuba ziya kuguquka nini na iintliziyo zabantu. Zisenokuguquka ngenxa yokuguquka kweemeko zabo, intlekele kwintsapho yabo, okanye iimeko zehlabathi ezibenza bacinge nzulu ngekamva labo. Kwakhona, into esiyithethayo ezindlwini zabo isenokubenza basabele kakuhle. (INtshu. 9:11; 1 Kor. 7:31) Kwakhona, abantu bayafuduka. Sisenokufumana abahlali abafikayo kwintsimi yethu abaya kusabela kwiindaba ezilungileyo—mhlawumbi abantu abaselula abanemizi yabo nabacinga nzulu ngenjongo yabo ebomini.
5 Ngaba siya kuqhubeka sibuyela? Ewe! IZibhalo zisinika izizathu ezininzi zokubuyela ngokuphindaphindiweyo ebantwini. Ekugqibeleni, xa umsebenzi wokushumayela ugqityiwe, uYehova uya kusisikelela ngenxa yokuqhubeka sisenza umgudu kubulungiseleli, yaye uya kubasikelela abo baye basabela kakuhle kwiindaba ezilungileyo zoBukumkani.—1 Tim. 4:16.