Kutheni Uqhubeka Ushumayela?
1 Ngaba sele kushunyayelwe ixesha elide ngoBukumkani kwindawo yenu? (Mat. 24:14) Ukuba kunjalo, usenokuvakalelwa kukuba intsimi yebandla lenu igutyungelwe ngokucokisekileyo. Mhlawumbi, ngoku xa ushumayela inkoliso yabantu odibana nabo ibonakala ingenamdla kwisigidimi soBukumkani. Kodwa, phawula oko kuthethwa ngabafundi bakaYesu kwiphepha 141 lencwadi ethi Isiprofeto SikaIsaya II: “Kwezinye iindawo, ubulungiseleli babo busenokubonakala bunemiphumo emincinane kakhulu xa buthelekiswa nobukhulu bomsebenzi nemigudu abayenzayo. Sekunjalo bayanyamezela.” Kodwa kutheni beqhubeka beshumayela?
2 Khumbula UYeremiya: Ukunyamezela kwethu ngokuthembeka kumsebenzi wokushumayela akufanele kuxhomekeke ekubeni abantu bayaphulaphula okanye akunjalo. UYeremiya washumayela iminyaka engama-40 kwintsimi enye nangona babembalwa gqitha abantu abaphulaphulayo yaye abaninzi babesichasile isigidimi sakhe. Kwakutheni ukuze anyamezele uYeremiya? Kungenxa yokuba wayesenza umsebenzi awayewuyalelwe nguThixo nokwazi oko kwakuza kwenzeka kwixesha elizayo kwamshukumisela ukuba athethe ngenkalipho.—Yer. 1:17; 20:9.
3 Imeko yethu iyafana. UYesu “wasiyalela ukuba sishumayele ebantwini nokuba sinikele ubungqina obucokisekileyo bokuba nguye Lowo umiswe nguThixo ukuba abe ngumgwebi wabaphilayo nabafileyo.” (IZe. 10:42) Isigidimi esisishumayelayo sithetha ukufa nokuphila kwabo basiphulaphulayo. Abantu baya kugwetywa ngokwesizinzi sokusabela kwabo kwiindaba ezilungileyo. Ekubeni kunjalo, imbopheleleko yethu kukuba senze kanye oko siyalelwe ukuba sikwenze. Kwanaxa abantu bengafuni ukuphulaphula, oku kusinika ithuba lokuba sibonise ubunzulu bothando lwethu ngabo nokuzinikela kwethu kuYehova ngokuzingisa ekwenzeni oko simele sikwenze. Kodwa kukho okungakumbi.
4 Siyangenelwa: Ukwenza ukuthanda kukaThixo, enokuba injani intsabelo entsimini, kusinika uxolo lwangaphakathi, ulwaneliseko nolonwabo, zinto ezo ezingenakufumaneka ngenye indlela. (INdu. 40:8) Ubomi bethu buba nentsingiselo yokwenene. Okukhona sisiba nesabelo kubulungiseleli, kokukhona iintliziyo neengqondo zethu zicamngca ngethemba novuyo lokuphila kwihlabathi elitsha likaThixo. Ukucamngca ngezi zithembiso zeZibhalo kukhulisa uthando lwethu ngezinto zokomoya kuze komeleze ulwalamano lwethu noYehova.
5 Nokuba asiyiboni kwangoko imiphumo kumsebenzi wethu wokushumayela, imbewu yenyaniso isenokuba iye yatyaleka entliziyweni yaloo mntu yaye iya kuhluma ngexesha elifanelekileyo likaYehova. (Yoh. 6:44; 1 Kor. 3:6) Akakho kuthi owaziyo ukuba bangaphi abantu abaza kufunda inyaniso yoBukumkani ngemigudu yabantu bakaYehova, enoba kusentsimini yethu okanye kweyehlabathi lonke.
6 Sifanele sithobele umyalelo kaYesu ngokungxamisekileyo othi: “Hlalani nikhangele, hlalani niphaphile, kuba anazi ukuba ixesha elimisiweyo linini na. Kodwa oko ndikutsho kuni ndikutsho kubo bonke.” (Marko 13:33, 37) Ngoko ke, ngamana sonke singahlala sivakalisa iindaba ezilungileyo zoBukumkani, sivuyise intliziyo kaYehova njengokuba sinesabelo ekungcwaliseni igama lakhe elikhulu nelingcwele.