Isizathu Sokuba Siyiphindaphinde Intsimi
1. Nguwuphi umbuzo esinokuzibuza wona ngokuphathelele umsebenzi wethu wokushumayela?
1 Kwiindawo ezininzi, siyigubungela kaninzi intsimi yethu. Siphinda siye kwizindlu ezifanayo, nangona umninimzi esenokuba usixelele ukuba akanamdla. Kutheni siqhubeka sithetha nabantu abangakhange basabele kakuhle kwixa elidluleyo?
2. Sisiphi esona sizathu siyintloko sokuzingisa entsimini?
2 Ukuthanda UYehova Nabantu: Esona sizathu siyintloko sokuzingisa entsimini kukuba siyamthanda uYehova. Iintliziyo zethu zisibangela ukuba sithethe nabanye ngoThixo wethu omkhulu. (Luka 6:45) Ngenxa yokuba simthanda, siyayithobela imiyalelo yakhe size sincede nabanye benjenjalo. (IMize. 27:11; 1 Yoh. 5:3) Asixhomekekanga kwindlela abantu abasabela ngayo ukuze sinyamezele ngokuthembekileyo kulo msebenzi. Kwanaxa amaKristu enkulungwane yokuqala ayetshutshiswa, aqhubeka eshumayela “ngaphandle kokuyekelela.” (IZe. 5:42) Xa abantu bengafuni ukuphulaphula, kunokuba sikuvumele oku kusidimaze, sihlala siqinile, sibonakalisa indlela esimthanda ngayo uYehova.
3. Ukuthanda kwethu abantu kunokusinceda njani siqhubeke sishumayela?
3 Kwakhona siyazingisa kuba sibathanda abamelwane bethu. (Luka 10:27) UYehova akafuni nabani na ukuba atshabalale. (2 Pet. 3:9) Nakwintsimi esetyenzwa rhoqo, sisabafumana abantu abafuna ukukhonza uYehova. Ngokomzekelo, eGuadeloupe, umntu omnye kwabangama-56 liNgqina likaYehova, yaye kuye kwabhaptizwa abangama-214 kunyaka ophelileyo. Bamalunga nama-20 000 abaye beza eSikhumbuzweni, lowo ngumlinganiselo womntu omnye kwabangama-22 eGuadeloupe!
4. Batshintsha njani abantu entsimini?
4 Ukutshintsha Kwentsimi: Intsimi yethu iyatshintshatshintsha. Xa uphinda ufika kwindlu obungamkelwanga kakuhle kuyo, usenokudibana nelinye ilungu lentsapho—mhlawumbi elingazange lasiva isigidimi sethu ngaphambili—yaye linokuphulaphula. Okanye sinokufumana abantu abasandul’ ukufudukela apho abanomdla. Abantwana abanabazali abachasayo bayakhula baze balishiye ikhaya. Abo bantwana basenokufuna ukuphulaphula isigidimi soBukumkani.
5. Yintoni enokubangela abantu basabele kakuhle?
5 Nabantu bayatshintsha. Umpostile uPawulos ‘wayengumnyelisi, umtshutshisi nomntu osileyo.’ (1 Tim. 1:13) Ngokufanayo, abaninzi abakhonza uYehova namhlanje ngaxa lithile babekhe ababi namdla enyanisweni. Kusenokwenzeka ukuba abanye babezichasile iindaba ezilungileyo. Njengoko iimeko zehlabathi ziguquka, abanye abachasi okanye abo babengakhathali basenokufuna ukuphulaphula. Abanye basenokusabela kakuhle xa bekwimeko elusizi, njengokufelwa lilungu lentsapho, ukuphelelwa ngumsebenzi, ingxaki yemali okanye eyempilo.
6. Kutheni simele siqhubeke sishumayela ngenzondelelo?
6 Le nkqubo yezinto iyaphela, kodwa umsebenzi wethu wokushumayela nowokufundisa uyakhawuleza. (Isa. 60:22) Ngoko ke, siqhubeka sishumayela ngenzondelelo size sizabalazele ukuhlala sinesimo sengqondo esihle. Abantu esithetha nabo basenokusiphulaphula. Ngoko simele siqhubeke sishumayela. ‘Ngokwenza oko siya kuzisindisa thina nabo basiphulaphulayo.’—1 Tim. 4:16.