‘Nityebe Emisebenzini Emihle’

¹ Ebudeni beminyaka yokugqibela enenzondelelo kubulungiseleli bakhe, umpostile uPawulos wayesebenza ngokusondeleyo noTimoti noTito. Bobabini wababhalela amazwi afanayo okhuthazo. Waxelela uTito ukuba “abo bakholiweyo kuThixo” bafanele “bagcine iingqondo zabo zikwimisebenzi emihle.” (Tito 3:8) Waxelela uTimoti ukuba abo babeke ithemba labo kuThixo bafanele “batyebe emisebenzini emihle.” (1 Tim. 6:17, 18) Eli licebiso elisemagqabini kuthi sonke! Kodwa ke yintoni eya kusishukumisela ekubeni senze imisebenzi emihle ebomini bethu? Kwaye ngokukodwa yiyiphi imisebenzi esinokuyenza kwezi ntsuku zizayo?

² Intshukumisa yokuba sityebe emisebenzini elungileyo isuka ekukholelweni nasekuthandeni uYehova nakwithemba elimangalisayo asinike lona. (1 Tim. 6:19; Tito 2:11) Ngokukodwa kweli xesha lonyaka, sikhunjuzwa ukuba uYehova wathumela uNyana wakhe emhlabeni ukuze uYesu athethelele uYise kwaye avule indlela esa ebomini kubo bonke abantu abafanelekayo. (Mat. 20:28; Yoh. 3:16) Oku kuya kucaciswa kakuhle kwiSikhumbuzo sokufa kukaKristu esiza kuba ngoMatshi 28. Ngenxa yethemba esinalo lokufumana ubomi obungunaphakade, ngaba asishukunyiselwa ukuba senze konke esinokukwenza ukuze ‘sityebe emisebenzini emihle’? Kunjalo kanye! Yiyiphi ke imisebenzi esinokuyenza ngoku?

³ Imisebenzi Emihle Esinokuyenza Ukususela NgoMatshi: Ngokuqinisekileyo siza kuya eSikhumbuzweni—esona siganeko sibalulekileyo kunyaka wamaNgqina kaYehova ehlabathini lonke. (Luka 22:19) Kodwa sifuna ukwabelana nabaninzi kangangoko kunokwenzeka ngovuyo lweso siganeko. Khawukhangele ingxelo yenkonzo ekwiNcwadi Yonyaka Yowama-2002, ibe uya kubona ukuba kunyaka ophelileyo kumazwe amaninzi asemhlabeni wonke, inani labantu ababezile eSikhumbuzweni beliliphindaphinda kathathu, kane, kahlanu okanye nangaphezulu inani labavakalisi. Ngokuqinisekileyo kuye kwafuneka onke amabandla enze umgudu onyanisekileyo ukuze azihambise kakhulu izimemo zeSikhumbuzo kwintsimi yawo. Ngoko ke, sifuna ukuchitha ixesha elingakumbi kangangoko sinako ukususela ngoku ukuya kutsho kuMatshi 28 simemela abantu eSikhumbuzweni, sibanceda ukuba bafunde ngethemba losindiso.

⁴ Ebudeni buka-Aprili imozulu idla ngokuba isentle. Singalisebenzisa kakuhle njani elo thuba ukuze ‘sityebe emisebenzini emihle’? Ngokuqhubeka sinesabelo ngenzondelelo kumsebenzi wokushumayela iindaba ezilungileyo, “sizondelela imisebenzi emihle.” (Tito 2:14; Mat. 24:14) Ukuba akukwazanga ukuba nguvulindlela ongumncedani ngoMatshi, akungezami uAprili noMeyi okanye ke ibe nye kwezi nyanga? Ukuba uthabatha ubuvulindlela ngoMatshi, ngaba unokuqhubeka?

⁵ Abanye abantu abaphangelayo bafumanisa ukuba banokuchitha ubuncinane iyure ibe nye enkonzweni xa besiya emsebenzini, benikela ubungqina esitratweni okanye betyelela abantu abasebenza kumashishini avula kwakusasa. Abanye baceba ukunikela ubungqina ngeyure yekhefu lasemini. Abanye baye bafumanisa ukuba banako ukuqhuba isifundo seBhayibhile nomntu abasebenza naye ebudeni belo xesha. Oodade abatshatileyo abaninzi abangaphangeliyo baye bakwazi ukubekela bucala ixesha lobulungiseleli basentsimini xa abantwana babo besesikolweni. Ngokuvuka kwakusasa ngezinye iimini ukuze benze imisetyenzana yasekhaya, baba nexesha elingakumbi ebudeni bemini lokuya kumsebenzi wokushumayela nowokwenza abafundi.—Efe. 5:15, 16.

⁶ Kwanokuba akukwazi ukuba nguvulindlela ongumncedani, usenokuzenzela ucwangciso lobuqu ukuze ube nesabelo esingakumbi kubulungiseleli, usenza konke okusemandleni ukuze ‘wenze okulungileyo, utyebe emisebenzini emihle, ungagogotyi lutho, ulungele ukwabelana,’ nabanye ngenyaniso.—1 Tim. 6:18.

⁷ Ungawulibali Umsebenzi Omhle Wokwenza Abafundi: Nyaka ngamnye kubakho abantu abanomdla abeza eSikhumbuzweni. Ngaba akunakwenzeka ukuba abanye ebandleni banikele ingqalelo kwabo bezileyo kodwa abangaqhutyelwa sifundo? Ngaba kunokwenziwa amabuyelo kubo ngenjongo yokubanceda benze inkqubela ngokomoya? Kusenokwenzeka ukuba bambi kwaba beze eSikhumbuzweni bazizalamane zamaNgqina. Abanye basenokuba bebekhe bafundelwa ngaphambili yaye bafuna nje ukukhuthazwa ukuba baphinde baqalise isifundo kwaye beze rhoqo ezintlanganisweni. Hayi indlela ekuya kusivuyisa ngayo ukubabona besithelela ekubeni ngabakhonzi abakhutheleyo bakaYehova!

⁸ Xa sisandisa isabelo esiba naso kubulungiseleli ebudeni bukaMatshi nakwezinye iinyanga, maninzi amathuba okuba sifumane abanomdla abangakumbi esiza kubuyela kubo. Zama ukubashiya nombuzo. Wandule ukubathembisa ukuba uza kubuya uze kuwuphendula kutyelelo olulandelayo. Xa sisenza oku, siya kuhlahl’ indlela yebuyelo. Kuya kuba kuhle kakhulu ukuba sibuyele ngokukhawuleza. Ukuba asikwazanga ukuqalisa isifundo kutyelelo lokuqala, sifuna ukuzama ukusiqalisa kutyelelo olulandelayo ukuba kunokwenzeka.

⁹ Xa sinikela ubungqina esitratweni, sifanele sikuphaphele ukuqalisa incoko nabantu. Abavakalisi abaninzi baye banikwa amagama, iidilesi, kunye neenombolo zomnxeba ngabantu abanomdla abaye badibana nabo kumsebenzi wasesitratweni. Ukuba loo mntu uthethe naye akahlali kwintsimi yakho, zama ukufumana ifomu ethi Nceda Ubuyele (S-43) eHolweni yoBukumkani, yizalise, uze uyinike unobhala webandla, oza kuyidlulisela kwibandla ahlala kwintsimi yalo loo mntu. Ukuba unobhala akakwazi, uya kuyidlulisela kwiofisi yesebe ukuze isingathwe khona. Ngale ndlela, kunokuhlakulelwa umdla.

¹⁰ Ukuba ufumene inombolo yomnxeba kodwa akwayifumana idilesi, yenza ibuyelo kuloo mntu ngokumtsalela umnxeba. Kulungiselele kusengaphambili oko ufuna ukukuxubusha. Mayibe kufutshane incwadi ethi Ukuqiqa ukuze ubhekisele kuyo ngokukhawuleza. Bambi bayaphumelela ekuqhubeni izifundo nabanye emnxebeni, kuquka abo bangafane babafumane emakhaya. Udade othile waqalisa ukucela iinombolo zomnxeba kumabhinqa anomdla awayedibana nawo kubulungiseleli bendlu ngendlu, ibe ngenxa yoko wakwazi ukuqalisa izifundo zeBhayibhile ezibini.

¹¹ Sebenzisana Nabadala Ekuncedeni Abapholileyo: Abadala banomdla kakhulu ekunikeleni ingqalelo yothando kwabo bapholileyo. Abaninzi kubo bathabatha amanyathelo ngokwabo okuphinda beze kwiintlanganiso zebandla. Bayayibona imfuneko yokunxulumana ngokusondeleyo nentlangano kaYehova ukuze banqabiseke ngokomoya njengoko kuchazwe kwiNdumiso 91. Abanye babo sithethanje sele belungele ukuba baphinde babe nesabelo kwinkonzo yasentsimini. Ukuba abanye abapholileyo beza eSikhumbuzweni kule nyanga, basenokukuvuyela ukuqhutyelwa isifundo seBhayibhile. Ukuba kunjalo, abadala baya kwenza amalungiselelo okuba kubekho umntu ofundisisa nabo banqwenela ukuncedwa. Ukuba uceliwe ukuba wenze oko, intsebenziswano yakho iya kuxatyiswa kakhulu.—Roma 15:1, 2.

¹² Qhubeka ‘Ugcine Imisebenzi Emihle’: Abaninzi abaye bakwinkonzo yobuvulindlela bobuncedani kangangenyanga nangaphezulu baye bafumanisa ukuba umsebenzi wabo wenkonzo yasentsimini uye wanda kwiinyanga ezilandelayo. Baye badibana nabantu abanomdla abaye babona imfuneko yokubuyela kubo. Oku kuye kwabashukumisela ekubeni benze umgudu owongezelelekileyo wokuba baye ngokufuthi entsimini ukuze baphinde baye kwabo banomdla. Bambi baye baqalisa izifundo, ibe loo nto iye yabanceda baba nesabelo esingakumbi kubulungiseleli.

¹³ Ukanti abanye baye bafumana uvuyo ngokuzibhokoxa ngakumbi kumsebenzi wokushumayela nowokwenza abafundi kangangokuba bashukunyiselwa ukuba bahlole izinto eziza kuqala kubo. Ngenxa yoko, abanye baye bakwazi ukuphungula umsebenzi wabo wempangelo baza baba ngoovulindlela abangabancedani abaqhubekayo. Abanye baye bakwazi ukungenela inkonzo yobuvulindlela obuthe ngxi. Baye bakwazi ukubeka ithemba labo ngokuzele ngakumbi kuThixo kungekhona kwizinto ezinikelwa lihlabathi. Baye bafumanisa ukuba ‘ukungagogotyi lutho, ukulungela ukwabelana,’ kuzise iintsikelelo ezinkulu ezivela kuYehova yaye kuye komeleza ithemba labo lokuphila “ubomi benene.” (1 Tim. 6:18, 19) Kakade ke, njengoko besiya besanda abantu abangenela inkonzo yobuvulindlela, lonke ibandla liyangenelwa. Oovulindlela batyekela ngakumbi ekuncokoleni ngamava abo baze bameme abanye ukuba babe nesabelo kunye nabo kubulungiseleli, ibe loo nto yenza ibandla livuthe ngokomoya.

¹⁴ Ngamana sonke ‘singatyeba emisebenzini emihle’ ebudeni beli xesha leSikhumbuzo ngokwandisa isabelo esinaso kubulungiseleli bamaKristu. Masibonise uxabiso lwethu ngoko uYehova asenzele kona ngokusinika ithemba lokuphila ngonaphakade kwihlabathi elitsha elinoxolo.—2 Pet. 3:13.