Ividiyo Eya Kukuvula Ingqondo Ize Ikushukumisele Esenzweni!
KwakungoAprili 1951. Kwelalisakuba yiSoviet kwaqokelelwa zonke iintsapho zamawaka amaNgqina kaYehova zafakwa kuloliwe, zagxothelwa eSiberia. Kwakutheni ukuze banikwe uphum’ aphele ngurhulumente onamandla weSoviet? Abazalwana bethu basinda njani ukuze baphumelele phezu kwayo nje intshutshiso eyayithe gqolo kangangamashumi eminyaka? Iimpendulo uya kuzifumana kwividiyo ethi Faithful Under Trials—Jehovah’s Witnesses in the Soviet Union. Yibukele, uze uvumele isigidimi sayo esivul’ ingqondo sikushukumisele ekubeni ulondoloze ukholo lwakho kuYehova, enoba kwenzeka ntoni na!
Ngaba unokuyiphendula le mibuzo? (1) AmaNgqina kaYehova aqala nini ukwaziwa ngokusemthethweni eRashiya? (2) Ngaphambi nasemva kweMfazwe Yehlabathi II, kwenzeka njani ukuba eSoviet Union kubekho iintsapho ezingakumbi zamaNgqina? (3) Iinkolelo zawo zazingqubana njani ngokuthe ngqo nengcamango kaLenin? (4) Yayiyintoni iOperation North, yaye yintoni uStalin awayenethemba lokuyifeza ngayo? (5) Ukuthunyelwa elubhacweni kwakuthetha ntoni kumaNgqina, yaye yintoni ekwathiwa makayenze ukuze angasiwa elubhacweni? (6) Kuhambo olude oluya eSiberia ngololiwe, abazalwana noodade wethu babekhuthazana njani yaye babamangalisa ngokwenza ntoni abo babebagxotha? (7) Bubuphi ubunzima awabunyamezelayo amaNgqina eSiberia? (8) Liliphi ilungiselelo lokomoya ababelixabisa ngokwenene abantu bakaYehova, yaye ngoba? (9) Kwakutheni ukuze abazalwana bethu babeke ubomi babo esichengeni ngenxa yoncwadi lwabo, yaye bayoyisa njani imigudu yabasemagunyeni eyayithe gqolo yokuphelisa indlela awayelufumana ngayo? (10) Waqhubeka njani uKhrushchev ehlasela abantu bakaThixo? (11) Abasemagunyeni bazama njani ukuluphelisa ukholo lwabantwana bamaNgqina? (12) Abazalwana bethu babesiqonda njani ngokucacileyo isizathu sokuba batshutshiswe? (Incwadi Yonyaka Yowama-2002, iphepha 203-4) (13) Isikhuni sabuya njani nomkhwezeli kwabo babetshutshisa intlangano kaThixo? (Incwadi Yonyaka Yowe-2002, iphepha 220-1) (14) Ziziphi izinto ezenzekayo ezaba ngathi liphupha kumaNgqina kwelalisakuba yiSoviet Union? (15) Yintoni eyabangela ukuba abazalwana bethu bavavanywe, yaye umfanekiso wokugqibela wale vidiyo ukubonisa njani ukunyaniseka kwamazwi akuYeremiya 1:19? (16) Balisa amava obomi ayinyaniso okuthembeka ngoxa uvavanywa akuhlab’ umxhelo.