Eyona nto Ibalulekileyo Kuthi
1. UYesu wabonisa njani ukuba ubulungiseleli babubalulekile kuye?
1 Ubulungiseleli babuyeyona nto ibalulekileyo kuYesu. Wayezibhokoxa, ehamba iikhilomitha ezingamakhulu kuwo wonke ummandla wasePalestina ukuze ashumayele ebantwini abaninzi kangangoko kunokwenzeka. Wayephila ubomi obulula ukuze anikele ixesha nengqalelo engakumbi kubulungiseleli. (Mat. 8:20) Xa izihlwele zazama ukumbamba ukuze aphilise abagulayo, wathi: “Ndimele ndizivakalise iindaba ezilungileyo zobukumkani bukaThixo nakwezinye izixeko, ngenxa yokuba ndithunywe oko.”—Luka 4:43.
2. Kwakutheni ukuze ubulungiseleli bubaluleke kuYesu?
2 Kwakutheni ukuze ubulungiseleli bubaluleke kuYesu? Injongo yakhe ephambili yayikukungcwaliswa kwegama likaYehova. (Mat. 6:9) Wayemthanda uYise wasezulwini kangangokuba wayelangazelela ukwenza ukuthanda Kwakhe athobele yonke imiyalelo Yakhe. (Yoh. 14:31) Ukongezelela, wayebakhathalele ngokunyanisekileyo abantu yaye efuna ukubanceda.—Mat. 9:36, 37.
3. Sinokubonisa njani ukuba ubulungiseleli bubalulekile kuthi?
3 Xelisa UYesu: Ukugcina ubulungiseleli bukwindawo yokuqala njengoYesu kunokuba nzima ngenxa yokuba ihlabathi lineziphazamiso ezininzi. (Mat. 24:37-39; Luka 21:34) Ngoko ke, kufuneka siqiniseke ngezona zinto zibalulekileyo, sicwangcise ixesha lokulungiselela nokuba nenxaxheba kwiintlanganiso nakumsebenzi wokushumayela rhoqo. (Fil. 1:10) Kufuneka sizabalazele ukuphila ubomi obulula, siphephe ukusebenzisa ihlabathi ngokupheleleyo.—1 Kor. 7:31.
4. Kutheni kubalulekile ukubeka izinto ezibalulekileyo kwindawo yokuqala?
4 Xa ixesha lilincinane, umntu onobulumko ulisebenzisa kakuhle kwizinto ezibalulekileyo. Ukuba unokuva ukuba isaqhwithi esinobungozi siza kufika, ngokomzekelo, ebeya kusebenzisa ixesha namandla akhe ekwenzeni amalungiselelo enkuseleko yentsapho yakhe nokulumkisa abamelwane bakhe. Izinto ezingabalulekanga beziya kulinda. Ixesha eliseleyo ngaphambi kokuba isaqhwithi seArmagedon sifike lifinyele. (Zef. 1:14-16; 1 Kor. 7:29) Ukuze sisindise thina kunye nabo basiphulaphulayo, sifanele sinikele ingqalelo kuthi nakwiimfundiso zethu, enoba kungaphakathi okanye ngaphandle kwebandla. (1 Tim. 4:16) Ukusinda kwethu kuxhomekeke ekubekeni kwethu ubulungiseleli kwindawo yokuqala!