Yintoni Eza Kuqala Kuwe?
1 Iintlangano ezininzi zonqulo zibalaselisa imisebenzi ebonisa ukuba nesisa, enjengokwakha izakhiwo zemfundo okanye ezonyango. Noko ke, amaNgqina kaYehova, ngoxa engakulibali “ukwenza okulungileyo nokwabelana ngezinto nabanye,” into eza kuqala kuwo kukunceda abantu ngokomoya.—Heb. 13:16.
2 Umzekelo Wenkulungwane Yokuqala: UYesu wenza imisebenzi emihle emininzi ngexesha lobulungiseleli bakhe basemhlabeni, kodwa umsebenzi owawusiza kuqala kuye yayikukunikela ubungqina ngenyaniso. (Luka 4:43; Yoh. 18:37; IZe. 10:38) Wayalela abalandeli bakhe ukuba ‘bahambe baye kubenza abafundi abantu beentlanga zonke, bebafundisa.’ (Mat. 28:19, 20) Yaye wathi abo banokholo kuye babeya kwenza umsebenzi omkhulu kunalowo wayewenza. (Yoh. 14:12) Oyena msebenzi wawubalulekile kuYesu yayikukushumayela kuba kwakunceda abantu bafunde indlela esa elusindisweni.—Yoh. 17:3.
3 Umpostile uPawulos wawujonga umsebenzi wokushumayela njengento ‘ekwakufuneka’ angayityesheli. (1 Kor. 9:16, 17) Wayekulungele ukuzinikela, ukunyamezela naziphi na izilingo okanye ukuva ubunzima ukuze azalise ubulungiseleli bakhe. (IZe. 20:22-24) Umpostile uPetros namaqabane akhe babenomoya ofanayo. Nangona babevalelwe entolongweni yaye betywatyushwa, “baqhubeka ngaphandle kokuyekelela befundisa kwaye bevakalisa iindaba ezilungileyo ezingoKristu, uYesu.”—IZe. 5:40-42.
4 Kuthekani ngathi? Ngaba umsebenzi wokushumayela nokwenza abafundi siwujonga njengobalulekileyo? NjengoYesu, ngaba sibaxhalabele ngokwenene abo ‘bahlinzekileyo nabalahliweyo njengezimvu ezingenamalusi’? (Mat. 9:36) Iziganeko zehlabathi ezenzekayo neziprofeto zeBhayibhile zibonisa ngokucacileyo ukuba ukupheliswa kwale nkqubo yezinto kusemnyango! Ukucinga ngokubaluleka komsebenzi wokushumayela kuya kusibangela ukuba siqhubeke sishumayela ngenzondelelo.
5 Hlola Iimeko Zakho: Ekubeni iimeko zabantu zidla ngokutshintshatshintsha, kuhle ukuba siman’ ukukhangela ukuba asinakwenza utshintsho na ukuze sibe nesabelo ngakumbi kumsebenzi wokushumayela. Omnye udade wayenguvulindlela ngeminyaka yee-1950, yee-1960, neyee-1970 kodwa wakufumanisa kunzima ukuqhubeka ngenxa yempilo enkenenkene. Noko ke, ethubeni wachacha. Kutshanje uye waphinda wazihlola iimeko zakhe waza wafumanisa ukuba unokuphinda abe nguvulindlela kwakhona. Hayi indlela awachwayita ngayo akuya eSikolweni Senkonzo Yobuvulindlela eneminyaka engama-90 ubudala! Kuthekani ngawe? Ngaba sele uza kufumana umhlala phantsi okanye imfundo enomsila? Ngamana iimeko zakho zingakwenza ube nguvulindlela?
6 Xa uYesu wabona uMarta “ephazanyiswa kukunyamekela imisebenzi emininzi,” ngobubele wamcebisa wathi uya kuvuna iintsikelelo ukuba akazixakekisi ngezinto ezininzi. (Luka 10:40-42) Ngaba ungayenza lula indlela ophila ngayo? Ngaba kuyafuneka ngokwenene ukuba indoda nomfazi basebenze kunye? Ukuba kwenziwa uhlengahlengiso, ngaba intsapho inokuphila ngemali yomntu omnye osebenzayo? Abaninzi baye bangenelwa ngokomoya ngokwenza uhlengahlengiso ukuze babe nesabelo esingakumbi kubulungiseleli.
7 Ngamana sonke singalandela umzekelo owamiselwa nguYesu nabapostile! Sinokuqiniseka ngentsikelelo kaYehova ukuba senza umgudu onyanisekileyo wokuba nesabelo ngokuzeleyo kulo msebenzi ubalulekileyo wokushumayela iindaba ezilungileyo zoBukumkani.—Luka 9:57-62.