Xelisa Isimo Sengqondo SikaYesu
1. Sisiphi isimo sengqondo esaboniswa nguYesu?
1 Nangona singazange simbone uNyana kaThixo, ngenxa yeengxelo ezibhaliweyo ngobomi nobulungiseleli bakhe, ngoku simthanda ngokwenene. (1 Pet. 1:8) Ethobela ukuthanda kukaYise, wancama isikhundla sakhe esiphakamileyo ezulwini weza emhlabeni. Njengomntu, walungiselela abanye ngokungazingci waze wanikela ngobomi bakhe ngenxa yoluntu. (Mat. 20:28) ILizwi likaThixo liyasibongoza lisithi: “Hlalani ninesi simo sengqondo wayenaso noKristu Yesu.” Singawuxelisa njani umoya wakhe wokuzincama?—Fil. 2:5-8.
2. Luluphi ucelomngeni ahlangabezana nalo amaKristu amaninzi, yaye yintoni enokuwanceda aloyise?
2 Xa Eziva Ediniwe: Nangona uYesu wayefezekile, wayedinwa. Ngesinye isihlandlo, xa ‘wayediniwe luhambo,’ washumayeza ibhinqa elingumSamariya ngokucokisekileyo. (Yoh. 4:6) AmaKristu amaninzi namhlanje ahlangabezana nocelomngeni olufanayo. Emva kokusebenza nzima iveki yonke, kunokuba nzima ukufumana amandla ukuze sishumayele. Noko ke, ukuba senjenjalo rhoqo, siya kufumanisa ukuba ubulungiseleli bamaKristu buyasihlaziya ngokomoya.—Yoh. 4:32-34.
3. Sinokukuxelisa njani ukukulungela kukaYesu ukufundisa?
3 Ngesinye isihlandlo, uYesu nabafundi bakhe baya kwindawo engenabantu ukuze bakhe baphumle kancinane. Noko ke, isihlwele esikhulu sabakhangela saza sahamba phambili ukuze sidibane nabo. Kunokuba uYesu abe lugcalagcala ngumsindo “wasisizela” waza “wasifundisa izinto ezininzi.” (Marko 6:30-34) Ukuqalisa nokuqhuba izifundo zeBhayibhile kufuna isimo sengqondo esifanayo. Kufuna ukuzingisa nothando olungazenzisiyo ngabantu. Ukuba ngoku awunasifundo seBhayibhile usiqhubayo, unganikezeli.
4. Ubuvulindlela bobuncedani bunokusinceda njani sixelise isimo sengqondo sikaKristu?
4 Beka Izilangazelelo Zokomoya Kuqala: Ubuvulindlela bobuncedani bunokusinceda sinikele ingqalelo engakumbi kwizinto zokomoya. Omnye udade oselula wabhala wathi: “Umama womnye wabahlobo bam wasikhuthaza ukuba sibe ngoovulindlela abangabancedani naye kangangenyanga. Ndiyavuya ngokuba saye samncedisa. Kwandivuyisa ukubazi ngakumbi abazalwana noodade, yaye ngokukhawuleza babengathi yintsapho yam. Kwakhona ndakuvuyela ukuba namathuba angakumbi okuthetha nabanye ngoYehova ndize ndibafundise iinyaniso ezimangalisayo zoBukumkani. Konke oku kwandenza ndaziva ndisondele kuYehova nakwintlangano yakhe.”—INdu. 34:8.
5. Kutheni simele siqhubeke sisenza umgudu wokuxelisa isimo sengqondo sikaYesu?
5 Sonke silwa idabi nenyama yethu engafezekanga nomnqweno wethu wokukholisa uYehova. (Roma 7:21-23) Simele siwuxhathise umoya wobuvila wehlabathi. (Mat. 16:22, 23) UYehova unokusinceda siphumelele koku ngomoya wakhe oyingcwele. (Gal. 5:16, 17) Njengoko silindele ukungeniswa kwihlabathi elitsha likaThixo lobulungisa, ngamana singaxelisa isimo sengqondo sikaYesu ngokubeka izilangazelelo zoBukumkani nezabanye ngaphambi kwezethu.—Mat. 6:33; Roma 15:1-3.