Ukunikela Imirhumo Kwindlu Ngendlu
1 Injongo kaVukani! ichazwe ngokucacileyo kwiphepha 4 lenkupho nganye ngokuthi: “Eli phephancwadi lakha intembelo kwidinga loMdali lehlabathi elitsha loxolo nonqabiseko ngaphambi kokuba isizukulwana esabona iziganeko zowe-1914 sidlule.” Ngokuqinisekileyo eli phephancwadi lifanele lisasazwe kangangoko kunokwenzeka kubulungiseleli bethu bendlu ngendlu! Ebudeni bukaOktobha sinethuba lokuhambisa eli phephancwadi lihle ngokunikela imirhumo kubantu abaninzi kangangoko kunokwenzeka.
2 UVukani! yeyona ndlela ibalaseleyo yokuvusa umdla kubantu abasenokuba abatyekelanga kwizinto zokomoya. Xa ufunda inkupho nganye, khangela iingongoma ezifanelekileyo onokwabelana ngazo nabanye. Bambi abavakalisi babhala amanqaku kwimibhalo yabo yobuqu, yaye ngaphambi kokuya kwinkonzo yasentsimini naloo nkupho, bahlolisisa loo manqaku ukuze babe neengongoma ezithile engqondweni abaza kwabelana ngazo nabaninimzi.
3 Sisenokukhetha ukuqalisa intshumayelo yethu ngokwenza amagqabaza angqala kumbandela oxutyushwa yinkupho kaVukani! esiyisebenzisayo.
Emva kwentshayelelo emfutshane sisenokuhambisa iphephancwadi, mhlawumbi ngokuthi:
◼ “Eli nqaku likaVukani! liyanaba kulo mbandela.” Yandula ke ufunde isivakalisi esinye okanye ezibini obuzikhethe kwangaphambili, uze uqhubeke uthi: “Ekubeni ubonakala unomdla kulo mbandela, ngaba ungathanda ukulifunda eli nqaku kunye namanye amanqaku asexesheni akule nkupho kaVukani!? Ukuba kunjalo, ndingakuvuyela ukulungiselela ukuba wenze umrhumo wonyaka weli phephancwadi lihle ngomnikelo wee-R9,50. Ngoko uya kufumana iinkupho ezili-12 ngeposi.” Ukuba umninimzi akawamkeli umrhumo, mkhuthaze athabathe amaphephancwadi amabini. Ukuba umninimzi uyawamkela amaphephancwadi, kusenokuba kokufanelekileyo ukuthetha into enjengale: “Sicela umnikelo we-R1,60 ukuhlangabezana neendleko zokushicilelwa kwala maphephancwadi omabini.”
4 Ukuba umninimzi ngokucacileyo ubonakalisa umdla kwizinto zokomoya, sisenokubhekisela kwisibhalo, esinjengeyesi-2 kuTimoti 3:1-5 exubusha ngemihla yokugqibela. Emva koko, ukuze sivuse umdla wakhe kwiimpapasho zethu, sisenokufunda ngokungqalileyo kwiphepha 2 lenkupho yakutshanje yeMboniselo icandelo eliqala ngokuthi: “Injongo yeMboniselo.” Emva koko sinikele umrhumo.
5 Kwiindawo ezininzi abantu baxhalatyiswe kukudodobala kwezoqoqosho okanye kukwanda kolwaphulo-mthetho nogonyamelo. Kusenokufuneka uthi:
◼ “Sabelana nabamelwane bethu ngendlela yokujonga ikamva ngokufanelekileyo. Ucinga ntoni ngekamva lethu elingekude? Ngaba nawe uxhalatyiswe kukudodobala kwezoqoqosho nakukwanda kolwaphulo-mthetho nogonyamelo? [Vumela impendulo.] Ucinga ukuba ukho umntu onokuzicombulula ngokwenene ezi ngxaki? [Vumela impendulo.] Ndifumanise ukuba iBhayibhile iluncedo kakhulu kulo mbandela.” Sebenzisa isibhalo esinye okanye ezingakumbi kwincwadi Ukuqiqa iphepha 86-91, ezichaza oko uBukumkani bukaThixo buya kukwenzela uluntu. Yalathisela ingqalelo yomninimzi kwinqaku elifanelekileyo kwiMboniselo. Nikela umrhumo.
6 Njengoko sisiya kwindlu ngendlu, masikhumbule ukuba sinezixhobo ezibini ezigqwesileyo ehlabathini ngokunceda abantu benze inkqubela ngokomoya, IMboniselo noVukani! Ngamana singazabalazela ukukhuthaza umdla wabaninimzi kula maphephancwadi size sinikele umrhumo nanini na sifumana ithuba.