Ngaba ‘Unentliziyo Ethobelayo’?

XA USOLOMON waba ngukumkani wakwaSirayeli wamandulo, waziva engafanelekanga. Ngoko ke wacela uThixo ukuba amphe ubulumko nolwazi. (2 Kronike 1:10) Kwakhona uSolomon wathandaza: “Mnike umkhonzi wakho intliziyo evayo [ethobelayo, NW], yokubalawula abantu bakho.” (1 Kumkani 3:9) Ukuba uSolomon ‘wayenentliziyo ethobelayo,’ wayeya kulandela imithetho nemigaqo kaThixo yaye wayeya kusikelelwa nguYehova.

Intliziyo ethobelayo asingomthwalo kodwa ibangela uvuyo. Umpostile uYohane wabhala: “Oku koko uthando lukaThixo luthetha kona, ukuba sigcine imiyalelo yakhe; ukanti imiyalelo yakhe asiloxanduva.” (1 Yohane 5:3) Ngokuqinisekileyo, sifanele simthobele uThixo. Ngapha koko, uYehova nguMdali wethu Ozukileyo. Umhlaba ngowakhe nako konke okukuwo, kwanayo yonke isilivere negolide. Ngoko ke asinako ukumnika nantoni na ephathekayo uThixo, nangona esivumela ukuba sisebenzise imali yethu ukuze sibonise uthando lwethu ngaye. (1 Kronike 29:14) UYehova ulindele ukuba simthande size sihambe ngokuthozamileyo naye, sisenza ukuthanda kwakhe.—Mika 6:8.

Xa uYesu Kristu wabuzwa ukuba nguwuphi owona myalelo mkhulu eMthethweni, wathi: “Umele umthande uYehova uThixo wakho ngentliziyo yakho iphela nangomphefumlo wakho uphela nangengqondo yakho iphela. Lo ngowona myalelo mkhulu nowokuqala.” (Mateyu 22:36-38) Enye indlela yokubonakalisa olo thando kungokuthobela uThixo. Ngoko ke sonke sifanele sithandazele ukuba uYehova asinike intliziyo ethobelayo.

Babe Nentliziyo Ethobelayo

IBhayibhile izaliswe yimizekelo yabo babe nentliziyo ethobelayo. Ngokomzekelo, uYehova wamxelela uNowa ukuba akhe umkhombe omkhulu ukuze kusindiswe ubomi. Lo yayingumsebenzi omkhulu owathabatha iminyaka engama-40 okanye engama-50. Kwanangazo zonke izixhobo zokusebenza zanamhlanje, ibiya kuba ngumsebenzi wobugcisa ofuna umgudu ukwakha isakhiwo esikhulu kangako esinokudada. Ukongezelela, uNowa wayemele alumkise abantu ngokungathandabuzekiyo ababehlekisa ngaye yaye bemgculela. Kodwa wathobela ngenyameko. IBhayibhile ithi: “Wenza njengoko.” (Genesis 6:9, 22; 2 Petros 2:5) UNowa walubonakalisa uthando lwakhe ngoYehova ngokuthobela ngokuthembeka kangangeminyaka emininzi. Onjani ukuba mhle umzekelo kuthi sonke!

Kwakhona, cinga ngosolusapho uAbraham. UThixo wamxelela ukuba ayishiye iUre yamaKaledi eyayinobutyebi aye kwilizwe awayengalazi. UAbraham wathobela engathandabuzi. (Hebhere 11:8) Ubomi bakhe bonke, yena nentsapho yakhe babehlala ezintenteni. Emva kweminyaka eliqela bekwilizwe lasemzini, uYehova wamsikelela yena nomfazi wakhe othobelayo, uSara, ngonyana onguIsake. Hayi indlela ekumele ukuba uAbraham oneminyaka eli-100 ubudala wayemthanda ngayo lo nyana wokwaluphala kwakhe! Kwiminyaka kamva, uYehova wacela uAbraham ukuba anikele ngoIsake njengedini. (Genesis 22:1, 2) Ukucinga nje kuka-Abraham ukwenza oko kumele ukuba kwamkhathaza. Noko ke, waqhubeka ethobela ngenxa yokuba wayemthanda uYehova yaye enokholo lokuba imbewu ethenjisiweyo yayiya kuza ngoIsake, enoba kwakuya kufuneka uThixo amvuse kwelabafileyo. (Hebhere 11:17-19) Noko ke, xa uAbraham wayeseza kumbulala unyana wakhe, uYehova wamnqanda waza wathi: “Ndiyazi ngoku ukuba uyamoyika uThixo akunqabanga nonyana wakho kum, emnye kuwe.” (Genesis 22:12) Ngenxa yokuthobela kwakhe, uAbraham owayesoyika uThixo wabizwa ngokuthi ‘ngumhlobo kaYehova.’—Yakobi 2:23.

UYesu Kristu ngoyena mzekelo wethu ubalaseleyo wokuthobela. Ebudeni bobukho bakhe ngaphambi kokuba abe ngumntu, wayevuyiswa yinkonzo yokuthembeka kuYise wasezulwini. (IMizekeliso 8:22-31) Njengomntu, uYesu wamthobela uYehova kuyo yonke into, esoloko ekuvuyela ukwenza ukuthanda kwakhe. (INdumiso 40:8; Hebhere 10:9) Ngaloo ndlela, uYesu ngokunyaniseka wayenokuthi: “Andenzi nto ngokwam; kodwa kanye njengoko uBawo wandifundisayo ndiyazithetha ezi zinto. Yaye lowo undithumileyo ukunye nam; akandishiyanga ndedwa, ngenxa yokuba ndisoloko ndisenza izinto ezikholekileyo kuye.” (Yohane 8:28, 29) Ekugqibeleni, ukuze kuthethelelwe ulongamo lukaYehova nokuze kukhululwe uluntu oluthobelayo, uYesu wavuma ukunikela ngobomi bakhe, ejamelane nokufa okubuhlungu nokuhlazisayo. Enyanisweni, “xa wazifumana ekwimo yomntu, wazithoba waza wathobeka de kwafikelela ekufeni, ewe, ukufa kwisibonda sentuthumbo.” (Filipi 2:8) Onjani ukuba mhle umzekelo wokuba nentliziyo ethobelayo!

Ukuthobela Nje Kuphela Abantu Abathile Akwanelanga

Asingabo bonke abathi bayamthobela uThixo abaye bamthobela ngokwenene. Khawucinge ngoKumkani uSawule kaSirayeli wamandulo. UThixo wamyalela ukuba atshabalalise onke ama-Amaleki ayengendawo. (1 Samuweli 15:1-3) Nangona uSawule wawatshabalalisa njengohlanga, wamkhusela ukumkani wawo waza walondoloza inxalenye yeegusha neenkomo zawo. USamuweli wabuza: “Yini na ke ukuba ungaliphulaphuli ilizwi likaYehova?” Ekuphenduleni, uSawule wathi: “Ndiliphulaphule ilizwi likaYehova . . . Besuka abantu [bakwaSirayeli] bathabatha emaxhobeni; impahla emfutshane neenkomo neyona inentlahla . . . , ukuze babingelele kuYehova.” Egxininisa imfuneko yokuthobela ngokupheleleyo, uSamuweli waphendula: “UYehova unonelele amadini anyukayo nemibingelelo, ngangokuba enonelele ukuphulaphulwa kwelizwi likaYehova, yini na? Yabona, ukuphulaphula kulungile ngaphezu kombingelelo, nokubaza iindlebe kulungile ngaphezu kwamanqatha eenkunzi zeegusha. Ngokuba ukuba neenkani kusisono esinjengokuvumisa, ubungqola bunjengenkonzo yezithixo nemilondekhaya. Ngenxa yokuba ulicekisile ilizwi likaYehova naye ukucekisile ukuba ungabi ngukumkani.” (1 Samuweli 15:17-23) Hayi indlela awaphulukana nokukhulu ngayo uSawule ngenxa yokuba wayengenayo intliziyo ethobelayo!

KwanoKumkani osisilumko uSolomon, owathandazela intliziyo ethobelayo, akazange aqhubeke emthobela uYehova. Ngokwahlukileyo kumyalelo kaThixo, watshata nabafazi beentlanga abamenza wona uThixo. (Nehemiya 13:23, 26) USolomon waphulukana nenkoliseko kaThixo ngenxa yokuba akazange aqhubeke enentliziyo ethobelayo. Esinjani isilumkiso kuthi!

Oku akuthethi kuthi uYehova ulindele imfezeko kubakhonzi bakhe. ‘Uyakhumbula ukuba siluthuli.’ (INdumiso 103:14) Ngokuqinisekileyo maxa wambi sonke siyazenza iimpazamo, kodwa uThixo unokubona enoba sinomnqweno wokwenene osuka entliziyweni wokumkholisa. (2 Kronike 16:9) Ukuba siyona ngenxa yokungafezeki kobuntu size siguquke, sinokucela ukuxolelwa ngenxa yedini lentlawulelo likaKristu, siqinisekile ukuba uYehova “woxolela ngokukhulu.” (Isaya 55:7; 1 Yohane 2:1, 2) Uncedo lwabadala abangamaKristu nabanothando nalo lusenokufuneka ukuze sikwazi ukuchacha ngokomoya nokuze sibe nokholo olomeleleyo nentliziyo ethobelayo.—Tito 2:2; Yakobi 5:13-15.

Uthobela Ngokuphelele Kangakanani?

Njengabakhonzi bakaYehova, ngokungathandabuzekiyo inkoliso yethu ivakalelwa kukuba inentliziyo ethobelayo. Sisenokuqiqa ngelithi, Ngaba andinasabelo kumsebenzi wokushumayela ngoBukumkani? Ngaba andimi ndiqine xa kuphakama imibandela efuna ukuba ngundilele? Yaye ngaba andiyi rhoqo kwiintlanganiso zamaKristu, njengokuba umpostile uPawulos wabongozayo? (Mateyu 24:14; 28:19, 20; Yohane 17:16; Hebhere 10:24, 25) Liyinyaniso elokuba, abantu bakaYehova bebonke babonisa ukuthobeka ngokusuka entliziyweni kwiinkalo ezibaluleke ngolo hlobo.

Kodwa kuthekani ngehambo yethu kwimicimbi yemihla ngemihla, mhlawumbi leyo ibonakala ngathi mincinane? UYesu wathi: “Umntu othembekileyo kokona kuncinane uthembekile kwanakokukhulu, nomntu ongelolungisa kokona kuncinane akalolungisa kwanakokukhulu.” (Luka 16:10) Ngoko ke ngamnye wethu wenza kakuhle xa ezibuza oku, Ngaba ndinentliziyo ethobelayo xa kuthethwa ngezinto ezingenamsebenzi okanye izinto abangazaziyo kwaukuzazi abanye?

Umdumisi wabonisa ukuba kwanasendlwini yakhe, apho abanye babengamboni, ‘wayehamba ngengqibelelo yentliziyo yakhe.’ (INdumiso 101:2) Xa uhleli endlwini yakho, usenokuvula umabonwakude uze ubukele umboniso oshukumayo. Ukuthobela kwakho kusenokuvavanywa, kanye kuloo meko. Umboniso oshukumayo usenokubonisa ukuziphatha okubi. Ngaba uya kuqhubeka ubukele, uzithethelela ngokuthi olu luhlobo lwemiboniso eboniswayo kule mihla? Okanye ngaba intliziyo yakho ethobelayo iya kukushukumisela ukuba uvumelane nesiluleko seZibhalo, esithi ‘kungakhe kukhankanywe kwaukukhankanywa phakathi kwenu, ukuhenyuza nokungahlambuluki’? (Efese 5:3-5) Ngaba uya kumcima umabonwakude, enoba ibali linik’ umdla? Okanye ngaba uya kusicima eso sitishi ukuba inkqubo iqalisa ukuba nogonyamelo? Umdumisi wavuma wathi: “UYehova uyalicikida ilungisa; ke yena ongendawo nothanda ukugonyamela, umthiyile umphefumlo wakhe.”—INdumiso 11:5.

Intliziyo Evayo Izisa Iintsikelelo

Noko ke, kukho imimandla emininzi yobomi apho sinokuzihlolisisa ngokunengenelo ukuze sibone enoba simthobela ngokusuka entliziyweni ngokwenene uThixo. Uthando lwethu ngoYehova lumele lusishukumisele ukuba simkholise size senze oko asixelela kona kwiLizwi lakhe eliyiBhayibhile. Intliziyo ethobelayo iya kusinceda sigcine ulwalamano oluhle noYehova. Eneneni, ukuba sithobela ngokwenene, ‘amazwi omlomo wethu nezicamango zentliziyo yethu aya kukholeka phambi koYehova.’—INdumiso 19:14.

Ngenxa yokuba uYehova esithanda, usifundisa ukuthobela ukuze kulungelwe thina. Yaye siyangenelwa kakhulu xa sinikela ingqalelo ngokusuka entliziyweni kwimfundiso kaThixo. (Isaya 48:17, 18) Ngoko ke, masilwamkele ngovuyo uncedo esilunikwa nguBawo wethu osezulwini ngeLizwi lakhe, ngomoya wakhe, nangentlangano yakhe. Sifundiswa kakuhle ngokungathi siva ilizwi emva kwethu lisithi: “Nantsi indlela; hambani ngayo.” (Isaya 30:21) Njengokuba uYehova esifundisa ngeBhayibhile, iimpapasho zamaKristu, neentlanganiso zebandla, kwanga singanikela ingqalelo, sisebenzise oko sikufundayo, size ‘sithobele ezintweni zonke.’—2 Korinte 2:9.

Intliziyo ethobelayo iya kusenza sifumane uvuyo neentsikelelo eziliqela. Iya kusizisela uxolo lwengqondo, kuba siya kukwazi ukuba siyamkholisa uYehova uThixo yaye siyayivuyisa intliziyo yakhe. (IMizekeliso 27:11) Intliziyo ethobelayo iya kusikhusela xa silingelwa ukwenza okubi. Ngoko ke, ngokuqinisekileyo simele simthobele uBawo wethu osezulwini yaye simele sithandaze sithi: “Mnike umkhonzi wakho intliziyo evayo [ethobelayo, NW].”

[Inkcazelo Ngomfanekiso okwiphepha 29]

From the Self-Pronouncing Edition of the Holy Bible, containing the King James and the Revised versions