Xelisa UMfundisi Omkhulu Xa Usebenzisa Incwadi Ethi Okufundiswa YiBhayibhile
1. Wayefundisa njani uYesu?
1 UMfundisi Omkhulu, uYesu, wayedla ngokuchaza izinto ngendlela elula necacileyo. Ukuze enze abafundi bakhe bacinge, maxa wambi wayeqala ngokufuna iimbono zabo. (Mat. 17:24-27) Wayebhekisela kwiLizwi likaThixo. (Mat. 26:31; Marko 7:6) Wayeqiniseka ukuba akabaniki nkcazelo ininzi abafundi bakhe, esazi ukuba baza kuqhubeka befunda. (Yoh. 16:12) Kwakhona, uYesu wayenomdla ekwazini enoba abafundi bakhe bayakukholelwa yaye bayakuqonda kusini na oko wayebafundisa kona. (Mat. 13:51) Le ncwadi ithi Okufundiswa YiBhayibhile yenzelwe ukusinceda sikwazi ukufundisa ngendlela efanayo.
2. Singayisebenzisa njani imibuzo esekuqaleni kwisahluko ngasinye?
2 Imibuzo Esekuqaleni: Xa uqalisa isahluko, kubalulekile ukubuza imibuzo esekuqaleni ngaphantsi komxholo. Buza imibuzo engafuni mpendulo ukuze uvuselele umdla womfundi. Okanye unokumcela ayiphendule ngokufutshane le mibuzo. Akukho mfuneko yakongeza oko sele ekuthethile okanye uzame ukumlungisa rhoqo ethetha into ebheke ecaleni. Unokumbulela nje ngezimvo zakhe uze uqhubeke nesifundo. Indlela ayiphendula ngayo imibuzo esekuqaleni iya kukunceda wazi icandelo ofanele ugxininise kulo kweso sifundo.
3. Sinokusigcina njani isifundo silula?
3 IZibhalo: Isifundo sifanele sisekelwe eZibhalweni. (Heb. 4:12) Noko ke, akuyomfuneko ukufunda sibhalo ngasinye esibonisiweyo. Bethelela ezo zisekelwe kuzo iinkolelo zethu. Akukho mfuneko yakufunda iindinyana ezinenkcazelo engakumbi. Incwadi ethi Okufundiswa YiBhayibhile ifundisa inyaniso ngendlela elula. Sigcine silula isifundo. Nikela ingqalelo kwiingongoma ezizintloko, uze ukuphephe ukuthetha kakhulu ngeenkcukacha okanye uthethe ngezinye izinto ezisecaleni nezingeyomfuneko.
4. Sazi njani enoba sifanele siziphe ixesha ebudeni besifundo ukuze sihlolisise inkcazelo ekwisihlomelo?
4 Isihlomelo: Isihlomelo sigubungela iingongoma ezili-14 ezongezelela kwizahluko. Ninokuzikhethela ukuba niyafuna kusini na ukuzixubusha ezi ngongoma ebudeni besifundo. Unokukhetha ukukhuthaza isifundo sakho ukuba sizifundele eminye imibandela ekwisihlomelo, ingakumbi ukuba siyayiqonda yaye siyayamkela inkcazelo ekweso sahluko. Ngokomzekelo, ukuba isifundo sakho siyakholelwa ukuba uYesu nguMesiya, kusenokungabi yimfuneko ukuxubusha naso umxholo othi “UYesu Kristu—UMesiya Othenjisiweyo,” xa nifunda isahluko 4 esithi, “Ngubani UYesu Kristu?” Kwezinye iimeko, kusenokuba luncedo ukuzipha ixesha ebudeni besifundo ukuze nixubushe isihlomelo okanye inxalenye yaso.
5. Ukuba sikhetha ukuhlolisisa inkcazelo ekwisihlomelo, sinokukwenza njani oko?
5 Xa ugqiba kwelokuba nixubushe inkcazelo ekwisihlomelo, unokulungiselela imibuzo kusengaphambili, ukuze nifunde iziqendu nomfundi ngendlela ebeniya kwenza ngayo xa nifunda isahluko. Okanye, ngokweemfuno zomfundi, unokukhetha ukusebenzisa imizuzu embalwa ebudeni besifundo ukuze nenze impinda yale nkcazelo kunye naye. Oku kuya kukunceda uqiniseke ukuba uyayiqonda le nkcazelo xa ezifundela ngokwakhe.
6. Inokusetyenziswa njani ibhokisi yempinda esekupheleni kwesifundo ngasinye?
6 Ibhokisi Yempinda: Ibhokisi esekupheleni kwesahluko idla ngokuba neempendulo kwimibuzo esekuqaleni. Unokusebenzisa ezi mpendulo ukuze wenze impinda ngeengongoma eziziintloko kwisahluko. Abanye abavakalisi baye bakufumanisa kuluncedo ukusifunda isivakalisi ngasinye yaye mhlawumbi bafunde nezibhalo ezilapho kwakunye nesifundo. Bandule ke bacele isifundo ukuba sichaze ngokufutshane indlela izibhalo ezingena ngayo kwesi sivakalisi. Oku kwenza umqhubi wesifundo abone enoba siyaziqonda kusini na iingongoma eziziintloko zesifundo nendlela ezixhaswa ngayo yiBhayibhile yaye siyavumelana kusini na nazo. Kwakhona kuqeqesha isifundo sikwazi ukusebenzisa iBhayibhile size sikwazi ukucacisela abanye ngenyaniso.
7. Sinokuyisebenzisa njani incwadi ethi Okufundiswa YiBhayibhile ukuze sifeze uthumo lwethu?
7 Eyona ndlela isebenzayo ekufezeni uthumo lwethu lokufundisa abantu nolokwenza abafundi kukuxelisa iindlela zikaYesu zokufundisa. (Mat. 28:19, 20) Incwadi ethi Okufundiswa YiBhayibhile isinceda ukuba senze loo nto kanye. Yisebenzise kakuhle ukuze ufundise abanye inyaniso ngendlela ecacileyo, elula nebangela umdla.