IBhokisi Yemibuzo
◼ Kuyingozi ngayiphi indlela ukusebenzisa i-Internet xa sinxibelelana nomntu esingamaziyo?
Zininzi iiWeb sites ezenziwe ngenjongo yokuba abantu bakwazi ukubhalelana besebenzisa i-Internet. Uninzi lwazo luvumela ukuba abantu babhale baze bathumele inkcazelo ngabo, esenokuquka imifanekiso nenye inkcazelo engabo. Abantu ababona le nkcazelo banokukwazi ukuqhagamshelana nabo. Ezi Web sites ziyathandwa kakhulu ngabantu abaselula, kwaye olunye ulutsha ebandleni luye lwazisebenzisa ukuze lunxibelelane nabantu abazibiza ngokuba bangamaNgqina kaYehova.
Kulula ukuba umntu onxibelelana naye ngeInternet akuqhathe ngento yokuba ungubani, ubumoya bakhe bunjani okanye unaziphi iintshukumisa. (INdu. 26:4) Loo mntu uthi uliNgqina likaYehova kusenokwenzeka ukuba eneneni akalokholwa, ususiwe kubudlelane okanye ngumwexuki ophum’ izandla. (Gal. 2:4) Kuthiwa nabanye abantu abaxhaphaza abantwana ngokwesini bawafumana kwezi Web sites amaxhoba abo.
Kwanaxa seyisekile kukuba abo sibhalelana nabo banokuma okuhle nebandla, kwiimeko ezinjalo incoko inokutshintsha lula ingene kwizinto ezingacocekanga. Loo nto ibangelwa kukuba abantu badla ngokukhululeka xa bethetha nabantu abangazange bababone ngaphambili. Basenokude bajonge incoko eqhutywa kwi-Internet njengomcimbi ophakathi kwenu nobabini kwaye bavakalelwe kukuba nayiphi na into abayithethayo ayinakwaziwa ngabanye, abanjengabazali okanye abadala. Okulusizi kukuba, ulutsha oluninzi olukhuliswe ngamaKristu luye lwabanjiswa ngulo mgibe lwaza lwabandakanyeka kwintetho engamanyala. (Efe. 5:3, 4; Kol. 3:8) Abanye baye bafaka neefoto zabo ezivusa inkanuko yesini, iziteketiso ezingcolileyo, okanye kwinkcazelo engabo bafaka neevidiyo zomculo ezibonisa iintlobano zesini ngokuphandle.
Ngenxa yezi zinto, abazali bafanele bazijonge izinto ezenziwa ngabantwana babo ekhompyutheni. (IMize. 29:15) Bekuya kuba yingozi ukumema umntu esingamaziyo ukuba eze kwikhaya lethu okanye simvumele ukuba ashiyeke nabantwana bethu. Ngendlel’ efanayo ke, kuyingozi kuthi nakubantwana bethu ukwakha ubuhlobo nabantu esingabaziyo kwi-Internet, kwanokuba bathi bangamaNgqina kaYehova.—IMize. 22:3.