Abantu Abaselula Bayabuza . . .

Ndinokuziphepha Njani Iingozi ZeInternet?

KHAWUBE nomfanekiso-ngqondweni wakho ukowona mzi wogcino-ncwadi mkhulu ehlabathini. Ungqongwe—ziincwadi, amaphephandaba, iincwadi ezinoludwe lwezinto, iifoto nalo lonke uhlobo lwezinto ezirekhodiweyo—ezithetha ngayo yonke into. Yonke inkcazelo yakutshanje kwakunye noncwadi oluninzi lweenkulungwane ezidluleyo uzifumana nje ngokulula.

Kaloku yi-Internet ekunika yonke loo nkcazelo. Ngenxa yayo umntu uyakwazi ukuhlala phambi kwekhompyutha yakhe aze atshintshisane ngenkcazelo nezinye iikhompyutha nabantu abasebenzisa ikhompyutha naphi na ehlabathini.a Ngayo abantu bayakwazi ukuthengisa izinto, bathenge, batsale imali ebhankini, bancokole, baphulaphule umculo orekhodiweyo wakutshanje—yonke loo nto beyenza besemakhayeni abo.

Ngoko akumangalisi ukuba, ezinye iingcali ziqikelela ukuba abantu abangaphezu kwezigidi ezingama-320 baya kube besebenzisa i-Internet ekupheleni kwalo nyaka. Kuye kuxhaphaka ukusetyenziswa kweInternet kwimimandla emininzi yehlabathi. Njengoko izikolo nemizi yogcino-ncwadi ikukhuthaza ngamandla ukusetyenziswa kwayo, izigidi ngezigidi zabantu abaselula ziyakwazi ukuyifikelela. EUnited States, lumalunga nama-65 ekhulwini ulutsha oluphakathi kweminyaka eli-12 neli-19 ubudala olusele lusebenzisa okanye lurhumele le nkqubo.

Xa isetyenziswa kakuhle, i-Internet inokukunika inkcazelo eluncedo ephathelele imozulu, ukhenketho neminye imibandela. Usebenzisa yona, ungathenga iincwadi, izixhobo zenqwelo-mafutha nezinye izinto. Abaninzi bayisebenzisela umsebenzi wesikolo.

Nangona i-Internet inokuba luncedo, isenokufana nomzi wogcino-ncwadi ongenabaphathi okanye abanye abantu ababukeleyo. Umntu unokuyijonga evakalelwa kukuba akukho mntu umbonayo. Kodwa le yenye yezona ngozi zokusebenzisa i-Internet. Ngoba? Ngenxa yokuba zininzi iiWeb site ezinenkcazelo eyonakalisa ukuziphatha neyingozi ngokomoya. Ngenxa yoko, i-Internet inokuchanaba amaKristu aselula esilingweni. Ngapha koko, ngokwemvelo abantu bayathanda ukwazi—tyekelo olo ekudala lusetyenziswa kakubi nguSathana uMtyholi. Ngokuqinisekileyo uSathana wakusebenzisa kakubi ukuthanda ukwazi kukaEva waza ‘wamlukuhla ngobuqhokolo bakhe.’—2 Korinte 11:3.

Ngokufanayo, umKristu oselula unokulukuhlwa ngokulula yinkcazelo engafanelekanga ukuba akazimiselanga ukukhusela impilo yakhe yokomoya. Inqaku elikwincwadi ethi Better Homes and Gardens lathi: “I-Internet licandelo ekumnandi ukulihlola apho abantu abanobuqili bethengisa inkcazelo yakutshanje; kodwa abo baxhaphaza abantwana, amaqothaqikili, oonkanishe nabanye abantu abangalunganga banawabo amajelo kule nkqubo.”

Omnye oselula ogama linguJavierb uthi: “Ezinye ii-Web site ziyothusa. Zisuka zithi gqi nje ungalindelanga.” Wongezelela ngelithi: “Zizama ukukulukuhla. Zifuna ukukutsala—ukuze uzithenge.” UmKristu oselula ogama linguJohn uvuma ngelithi: “Ukuba ukhe waqala nje ukujonga inkcazelo engafanelekanga, kunzima ukuyeka—kukhobokisa gqitha.” Amanye amaKristu aselula azijonga ngokufuthi iiWeb site ezingcolileyo, yaye loo nto iwakhokelele kwingozi embi. Amanye ade onakalisa ulwalamano lwawo noYehova. Inokuphetshwa njani le nto?

‘Ukukhangela Inkohlakalo’

Maxa wambi idilesi yeWeb-site ibonisa ngokucacileyo ukuba eli jelo linenkcazelo engathandekiyo.c IMizekeliso 22:3 ilumkisa ngelithi: “Onobuqili ubona into embi, azifihle; ke zona iziyatha ziya kugqitha kuyo, zihlawuliswe.”

Noko ke, ngokuqhelekileyo ingxaki yeyokuba abantu banokuthi gqi nenkcazelo engathandekiyo bengacingelanga. Ihome page isenokuba nemifanekiso ebonisa izinto ngobunjalo bazo eyenziwe ngendlela echuliweyo ukuze ikutsalele ekubeni ujonge eli jelo—ize iyibonise ngokufuthi!d

UKevin uchaza into eyenzeka komnye wabahlobo bakhe: “Wayeswele into yokwenza yaye wayethanda ukwazi. Kungekudala wathi rhuthu umkhwa wokubukela amanyala.” Ngethamsanqa lo mKristu uselula wabonana nomdala waza wancedwa.

Ngaba sele uyicingile into onokuyenza xa usithi gqi nejelo elinjalo ungalindelanga? Icacile into efanele yenziwe ngumKristu: Lishiye ngoko nangoko elo jelo—okanye uyivale i-Internet! Yiba njengomdumisi owathandaza wathi: “Dlulisa amehlo am angakhangeli inkohlakalo.” (INdumiso 119:37; thelekisa uYobhi 31:1.) Khumbula ukuba nokuba akukho mntu usibonayo, sijongiwe. IBhayibhile isikhumbuza ukuba zonke izinto “zibhenceke ekuhleni emehlweni alowo simele siphendule kuye.”—Hebhere 4:13.

Ukuthetha nabazali bakho okanye amanye amaKristu aqolileyo kunokusomeleza isigqibo sakho sokungaphindi ujonge amajelo angafanelekanga. Ngapha koko, ukuba ubunokuwela kumgxobhozo wentlabathi, ngaba ubuya kuyeka de umgxobhozo ufikelele entanyeni ngaphambi kokuba ubize uncedo?

Kuthekani Ngokunxibelelana Ngayo?

Icandelo lokuncokola livumela abo basebenzisa i-Internet ehlabathini lonke bakwazi ukunxibelelana ngendlela ekhawulezileyo. Amashishini athile alisebenzisela ukuqhuba iinkomfa aze anxibelelane nabathengi. Amanye amacandelo okuncokola avumela abo bawasebenzisayo ukuba babelane ngenkcazelo ephathelele ubugcisa, njengokulungisa inqwelo-mafutha okanye ukungxala ikhompyutha. Iindlela ezinjalo zokuncokola zivumela izihlobo namalungu entsapho ukuba anxibelelane ngasese ngaphandle kokutsalela umnxeba kwiindawo ezikude okubiza imali eninzi. Nangona kusenokubakho izinto eziluncedo ngesi sixhobo, ngaba zikho iingozi?

Simele silumke xa kufikelelwa kwicandelo lokuncokola likawonke-wonke, kuba linokubangela iingozi. Umbhali uLeah Rozen wathi: “Abakwishumi elivisayo abathanda izinto zobugcisa bachitha iiyure ezininzi bencokola nabantu abangabaziyo kulo lonke ilizwe nasehlabathini lonke. Ngelishwa, aba bantu bangaziwayo bancokola nabakwishumi elivisayo badla ngokuba ngabaxhaphazi abakhulu abafuna ukuba neentlobano zesini nabantwana.” Inqaku elikwiPopular Mechanics lalumkisa ngelithi “ufanele ulumke gqitha xa usebenzisa icandelo lokuncokola likawonke-wonke. Ukunikisa ngegama okanye idilesi kumntu ongamaziyo isenokuba kukuzibizela nje ukhwembekhwembe! Kutheni uzibeka esichengeni ngolo hlobo?

Noko ke, eyona ngozi ichuliweyo yeyokuba uzibone sele udlelana ngokungafanelekanga nabantu ongabaziyo abangayihloneliyo imigaqo yeBhayibhile.e Abaphandi bathi ubukhulu becala incoko yabakwishumi elivisayo ityekela kwimibandela yesini. Ngenxa yoko, isiluleko seBhayibhile esikweyoku-1 kwabaseKorinte 15:33 sifanelekile: “Ningalahlekiswa. Unxulumano olubi lonakalisa imikhwa esebenzisekayo.” Unxulumano olubi olufumana ngekhompyutha luyingozi. Ngaba oselula owoyika uThixo ufanele ngokungakhathali azibeke engozini enjalo?”

Indlela Yokuzikhusela

Ngenxa yeengozi ezibangelwa yi-Internet, imele isetyenziswe ngobulumko. Ngokomzekelo, ezinye iintsapho ziyibeka ikhompyutha kwindawo esekuhleni njengegumbi lokuphumla. Kwakhona zisenokubeka umgaqo wokuba i-Internet isetyenziswe kuphela xa kukho nabanye abantu abaphakathi kwekhaya. Ukuba abazali bakho babeka loo miqathango, sebenzisana nabo. (IMizekeliso 1:8) Ukubeka kwabo ulwalathiso olucacileyo kubonisa ukuba banothando.

Ukuba umsebenzi wakho wesikolo ufuna usebenzise i-Internet, kutheni ungakhangeli ukuba lingakanani ixesha olichitha kuyo? Zama ukugqiba kuselithuba ngexesha oya kulisebenzisa, usebenzise iwotshi enealarm ukuze ikukhumbuze xa ixesha liphelile. UTom ucebisa ukuba: “Ceba kusengaphambili, yazi kakuhle into oyifunayo, uze ubambelele kuyo—enoba ezinye izinto zibangela umdla kangakanani na.”

Kwakhona kufanele kulunyukwe xa kusetyenziswa iE-mail. Ulutsha olungamaKristu luya kulumkela ukuba lungazibhokoxi ekufundeni imiyalezo emininzi ye-E-mail, ingakumbi ukuba uninzi lwalo nkcazelo alubalulekanga okanye aluchananga. Ukuyisebenzisa ngokungalawulekiyo iE-mail kunokuchitha ixesha elixabisekileyo lokwenza umsebenzi wesikolo neminye imisebenzi yokomoya.

UKumkani uSolomon wathi: “Ukwenza iincwadi ezininzi akunakuphela, nokuphikela ukufunda okuninzi kudinisa inyama.” (INtshumayeli 12:12) La mazwi angena gingci kwi-Internet. Musa ukuzibhokoxa kakhulu ekuphandeni izinto kangangokuba ulutyeshele ufundisiso lobuqu lweBhayibhile nokuba nenxaxheba kubulungiseleli bamaKristu. (Mateyu 24:14; Yohane 17:3; Efese 5:15, 16) Kwakhona khumbula ukuba, nangona ukunxibelelana ngekhompyutha kusenokuba nendawo yako, akukho nto inokuthabathela indawo ukuthetha ubuso ngobuso namaKristu okhonza kunye nawo. Ngoko ukuba ngokwenene kufuneka usebenzise i-Internet, yenza isigqibo sokuyisebenzisa ngobulumko. Phepha amajelo ayingozi, yaye musa ukuchitha ixesha elininzi ngokugqithiseleyo kuwo. “Londoloza intliziyo yakho,” yaye ungaze ube likhoboka leInternet.—IMizekeliso 4:23.

[Imibhalo esemazantsi]

[Amagama acatshulweyo akwiphepha 20]

“Ezinye ii-Web site ziyothusa. Zisuka zithi gqi nje ungalindelanga”

[Umfanekiso okwiphepha 21]

Ezinye iintsapho zibeka ikhompyutha yekhaya kwindawo esekuhleni