Ukusebenzisa I-Internet—Ziphaphele Iingozi!
1 Abantu bakaYehova bayalunandipha unxulumano olwakhayo phakathi kwabo. Bayakunandipha ukwabelana ngamava enkonzo yasentsimini yaye bayakuxabisa ukuva ngeziganeko ezenzekayo eziphathelele amaNgqina kaYehova kwakunye nomsebenzi woBukumkani emhlabeni wonke. Bayakuthanda ukwaziswa ngayo nantoni na ekhethekileyo enokwenzeka kubazalwana bethu, enjengengxaki okanye intlekele engokwemvelo, yaye bayakufuna ukwazi enoba kukho nantoni na abanokuyenza ukuze bancede. Umdla onjalo ubonisa umanyano lobuzalwana, olubonisa ukuba siyathandana.—Yohane 13:34, 35.
2 Namhlanje, siva ngokukhawuleza ngeziganeko zehlabathi. Unomathotholo nomabonwakude bazisasaza kanye ngelo xesha iziganeko yaye ngokweenkcukacha kubo bonke abaphulaphuli emhlabeni wonke. Umnxeba nawo wenza kube lula ukunxibelelana ngoko nangoko nabantu ehlabathini jikelele. Inkqubela yakutshanje kunxibelelwano olugqugqisileyo ehlabathini yi-Internet.—Bona UVukani! wesiNgesi kaJulayi 22, 1997.
3 Ukuveliswa komnxeba kwavula indlela yobuqu yokunxibelelana ngokukhawuleza ehlabathini lonke. Nangona umnxeba uluncedo gqitha, sifanele siyiphaphele indlela osetyenziswa ngayo, ekubeni unokuba sisixhobo sonxulumano nezenzo ezingafanelekanga yaye ukuwusebenzisa ngokugqithiseleyo umnxeba kunokubiza imali eninzi gqitha. Umabonwakude nonomathotholo banokuba negalelo kwicala lemfundo. Noko ke, okubi kukuba, inkoliso yeenkqubo yonakele ngokokuziphatha yaye ukunikela ingqalelo kuyo kunokuba yinkcitha xesha. Ubulumko buya kusenza sikukhethe esikubukela kumabonwakude nesikuphulaphula kunomathotholo.
4 I-Internet ibangela ubani anxibelelane nezigidi zabantu ngaphandle kweendleko ehlabathini lonke yaye yenza ukuba ubani afumane intaphane yenkcazelo. (UVukani!, kaJanuwari 8, 1998) Noko ke, ukusetyenziswa kwe-Internet, kunokuchanaba ubani kwezinkulu zona iingozi ngokomoya nangokokuziphatha. Kunokwenzeka njani oko?
5 Abaninnzi banenkxalabo ngenkcazelo esele ifumaneka echaza indlela yokwenza izixhobo, eziquka neebhombu. Ezoshishino zikhalaza ngexesha elichithwa ngabasebenzi besebenzisa i-Internet. Kuye kwathethwa okuninzi kwiimpapasho zethu ngeengozi zokomoya ekudityanwa nazo kwi-Internet. IiWeb site ezininzi zibonisa izinto ezinogonyamelo nezingamanyala ezingawafanelanga kwaphela amaKristu. (INdu. 119:37) Ukongezelela kwezi ngozi, kukho ingozi echuliweyo ngokukhethekileyo afanele ayilumkele amaNgqina kaYehova. Yiyiphi loo ngozi?
6 Ngaba ubuya kummemela ekhayeni lakho umntu wasemzini ngaphandle kokuqala ufumanise ukuba ungubani? Kuthekani ukuba bekungekho ndlela yokufumanisa? Ngaba ubuya kumvumela loo mntu ungamaziyo ukuba abe yedwa nabantwana bakho? Leyo yinyaniso engenakukhanyelwa ngeInternet.
7 I-Electronic mail ingathunyelwa ize ifunyanwe ngumntu ongamaziyo. Oku kunjalo naxa uncokola nge-elektroniki kwingxubusho okanye embuthweni. Maxa wambi abo banenxaxheba basenokuthi bangamaNgqina kaYehova, ukanti ngokufuthi abangawo. Uthile usenokuzibanga eselula ngoxa kungenjalo. Okanye umntu usenokude ngobuqhetseba azibange engowesinye isini.
8 Inkcazelo edluliselwe kuwe inokuza ngathi ngamava okanye amagqabaza ngeenkolelo zethu. Le nkcazelo idluliselwa kwabanye abathi, nabo kamva bayidlulisele kwabanye. Le nkcazelo ayiqinisekiswanga kwaye isenokungabi yonyaniso. Amagqabaza asenokuba sisigqubuthelo sokusasaza ukuqiqa kwabawexuki.—2 Tes. 2:1-3.
9 Ucinga ngale ngozi, ukuba uyayisebenzisa i-Internet, zibuze: ‘Ndiyisebenzisela ntoni? Ngaba kunokwenzeka ukuba ndonzakale ngokomoya ngendlela endiyisebenzisa ngayo? Ngaba ndinegalelo ekonzakalisweni ngokomoya kwabanye?’
10 IiWeb Site ‘ZamaNgqina KaYehova’: Ngokomzekelo, cinga ngezinye i-Internet site eziyilwe ngabantu abazibanga bengamaNgqina kaYehova. Bayakucela ukuba utyelele iisites zabo ukuze ufunde amava afakwe ngabanye abathi bangamaNgqina. Ukhuthazwa ukuba uvakalise izimvo neembono zakho ngoncwadi loMbutho. Bambi bakhuthaza iintshumayelo ezinokusetyenziswa kubulungiseleli basentsimini. Ezi sites zinikela iindawo zokuncokola abanokunxibelelana ngazo abantu, zenza unxibelelane ngqo nabanye, njengaxa uthetha ngomnxeba. Zikukhuphela kwezinye iisite onokunxibelelana kuzo namaNgqina kaYehova ehlabathini lonke. Kodwa ngaba unokuqinisekisa ukuba olu qhagamshelwano asilolwabawexuki?
11 Unxulumano nge-Internet lusenokungavisisani nesiluleko esifumaneka kweyabase-Efese 5:15-17. Umpostile uPawulos wabhala: “Ngoko hlalani nikuphaphele ngokungqongqo ukuba indlela enihamba ngayo ingabi njengeyabantu abangezozilumko kodwa ibe njengeyezilumko, nizithengele ixesha elifanelekileyo, ngenxa yokuba imihla ingendawo. Ngenxa yoku yekani ukuba ngabangenangqiqo, kodwa qhubekani nikuqonda into okuyiyo ukuthanda kukaYehova.”
12 Ibandla lamaKristu lilungiselelo lolawulo lobuthixo esondliwa kulo ngokomoya “likhoboka elithembekileyo neliyingqondi.” (Mat. 24:45-47) Kwalapha kwintlangano kaThixo, sifumana ulwalathiso nokhuseleko lokusigcina sahlukile ehlabathini nokhuthazo lokusigcina sixakekile emsebenzini weNkosi. (1 Kor. 15:58) Umdumisi wabonisa ukuba wavuya waza waziva ekhuselekile ukuba phakathi kwebandla labantu bakaThixo. (INdu. 27:4, 5; 55:14; 122:1) Kwakhona ibandla lilungiselela inkxaso engokomoya noncedo kwabo banxulumana nalo. Apho, unokufumana iqela labantu elinothando, elinenkxalabo nabahlobo abakhathalayo—abantu obaziyo ngokobuqu abakulungeleyo ukunceda nokuthuthuzela abanye ngamaxesha obunzima. (2 Kor. 7:5-7) Amalungu ebandla akhuselwa lilungiselelo elingokweZibhalo lokuba basuswe kubudlelane abo bona bangaguquki okanye abakhuthaza iingcamango zabawexuki. (1 Kor. 5:9-13; Tito 3:10, 11) Ngaba sinokulindela ukufumana la malungiselelo othando xa sinxulumana nabo bakwi-Internet?
13 Kuyabonakala ukuba kwenzeka okwahlukileyo. Kucace gca ukuba zimbi iiWeb site ziqulethe inkcazelo yabawexuki. IiWeb site ezinjalo zisenokuthetha okwahlukileyo, yaye abo balungiselele loo site banokunikela inkcazelo eneenkcukacha ukuqinisekisa ukuba ngenene bangamaNgqina kaYehova. Basenokude bacele inkcazelo kuwe ukuze baqinisekise ukuba ungomnye wamaNgqina kaYehova.
14 UYehova ufuna usebenzise ukuqonda. Ngoba? Ngenxa yokuba uyazi ukuba oku kuya kukukhusela kwiingozi ezahlukeneyo. IMizekeliso 2:10-19 ivula ngokuthi: “Kuba ubulumko buya kungena entliziyweni yakho, ukwazi kwenze mnandi umphefumlo wakho. Ukunkqangiyela kokugcina, ukuqonda kokulondoloza.” Buya kukulondoloza entwenini? Kwizinto ‘ezinjengendlela embi,’ kwabo bashiya umendo wokuthe tye, nabantu abaziphethe kakubi nabathi gu bucala ngekhondo labo.
15 Xa sisiya kwiHolo yoBukumkani, asithandabuzi ukuba sikunye nabazalwana bethu. Siyabazi. Akukho mntu ufuna isiqinisekiso soko kuba uthando lobuzalwana oluboniswa apho lukwenza kucace. Akufunwa sizazise ukuze siqinisekise ukuba ngenene singabanye bamaNgqina kaYehova. Kulapha apho sifumana khona ukhuthazo lokwenene awathetha ngalo uPawulos kweyamaHebhere 10:24, 25. Akunakuze kuxhonyekekwe kwiiWeb site ezikhuthaza unxulumano ngomnxeba. Sicinga ngamazwi eNdumiso 26:4, 5 oku kunokusenza siziphaphele iingozi ekunokuba lula ukudibana nazo xa sisebenzisa iiWeb site ezikwi-Internet.
16 Akukho mntu obeke imida okanye ohlola uhlobo lwenkcazelo efumaneka kwabo basebenzisa i-Internet. Ngokufuthi, abantwana nabakwishumi elivisayo bangamaxhoba alula olwaphulo-mthetho nokuxhatshazwa kule nkalo. Abantwana bathemba yonke into, bathanda ukwazi yaye bayakuthanda ukwazi ngale nto intsha enenkcazelo. Ngoko ke kufuneka abazali bababek’ esweni abantwana babo baze babanike ukhokelo olusengqiqweni lweZibhalo ngokusebenzisa i-Internet, kanye njengokuba bebeya kubakhokela kukhetho lwabo lomculo nolwemifanekiso eshukumayo.—1 Kor. 15:33.
17 Okubuhlungu kukuba, bambi ababesakuba ngabazalwana noodade bethu kuye kwafuneka basuswe kubudlelane ngenxa yonxulumano olwaqalisa ngokudibana nabantu behlabathi kwiincoko ze-Internet eziye zakhokelela ekuziphatheni okubi ekugqibeleni. Okungakholelekiyo kukuba, abadala baye babhala besithi bambi baye bashiya abayeni babo okanye abafazi ukuze baqalise ulwalamano olwaqalisa kwi-Internet. (2 Tim. 3:6) Bambi abantu baye bayilahla inyaniso ngenxa yokukholelwa inkcazelo evela kubawexuki. (1 Tim. 4:1, 2) Ngenxa yezi ngozi zinzulu, ngaba akubonakali kusengqiqweni ukukuphaphela ukubandakanyeka kwiincoko ze-Internet? Ngokuqinisekileyo, ukuba nobulumko, ulwazi, amandla okucinga nokuqonda okuthethwa ngako kwiMizekeliso 2:10-19 kufanele kusikhusele koku.
18 Kuyaphawuleka ukuba, kukho iqela labantu eliye lenza iiWeb site ngobuqhetseba ukuze lishumayele iindaba ezilungileyo. Uninzi lwezi site lwenziwe ngabazalwana abangaqondiyo. Ezinye iisite zenziwe ngabawexuki abafuna ukubambisa abo bangalindelanga. (2 Yoh. 9-11) Bugqabaza enoba ikho imfuneko ngabazalwana ukuba bavelise iiWeb site ezilolo hlobo, UBulungiseleli Bethu BoBukumkani, bukaNovemba 1997, iphepha 3, bathi: “Akuyomfuneko ngaye nabani na ukuba afake umbandela ongamaNgqina kaYehova, imisebenzi yethu, okanye iinkolelo zethu kwi-Internet. Isite yethu esemthethweni [www.watchtower.org] inenkcazelo echanileyo enokufunyanwa nguye nabani na oyifunayo.”
19 Uncedo Lokufundisisa Kwi-Internet? Bambi baye banemvo yokuba bakhonza abazalwana ngokufaka inkcazelo ephandiweyo ephathelele imisebenzi eyahlukeneyo yolawulo lobuthixo. Ngokomzekelo, umntu unokwenza uphando olusekelwe kulwandlalo lwentetho yesidlangalala akugqiba alufake, kuba ecinga ukuba loo nkcazelo iya kuba yingenelo kwabo kuza kufuneka balungiselele ulwandlalo olufanayo. Abanye bafaka zonke izibhalo zeSifundo seMboniselo esilandelayo okanye bafake umthombo wombandela weSikolo Sobulungiseleli Sobuthixo okanye iSifundo Sencwadi Sebandla. Bambi basenokunikela amacebiso ngeentshumayelo zenkonzo yasentsimini. Ngaba ziluncedo ngokwenene ezi zinto?
20 Iimpapasho ezilungiselelwa yintlangano kaYehova zilola iingqondo zethu ngengcamango ezakhayo zize zisiqeqeshele “ukubalula kokubini okulungileyo nokubi.” (Heb. 5:14) Ngaba singatsho ukuba oku kuyaphunyezwa ukuba abanye basenzela uphando?
21 AmaBhereya kwathethwa ngawo ‘njengachubeke ngakumbi kunalawo aseTesalonika.’ Kwakutheni? Kungenxa yokuba ‘alamkela ilizwi ngeyona ntumekelelo inkulu yengqondo, ezincina ngenyameko iZibhalo mihla le mayela nokuba zazinjalo kusini na ezo zinto.’ (IZe. 17:11) Nangona uPawulos noSilas bawashumayezayo, ayengenakuphila ngokuvisisana nenyaniso ngaphandle kokuba abandakanyeke ngokobuqu.
22 Ukusebenzisa uphando olwenziwe ngomnye umntu entethweni okanye ekulungiseleleni enye intlanganiso kuyiphazamisa ngokwenene injongo yofundisiso lobuqu. Ngaba asingomnqweno wakho ukwakha ukholo lwakho kwiLizwi likaThixo? Ngokusekelwe kulweyiseko lobuqu, unokwandula ke uluvakalise esidlangalaleni ukholo lwakho—kwiintetho zakho, xa ugqabaza kwiintlanganiso nakwinkonzo yasentsimini. (Rom. 10:10) Ukusebenzisa uphando olwenziwe ngomnye umntu akuvisisani nenkcazelo ekwiMizekeliso 2:4, 5 ‘yokuba ukufune ngokobuqu ukumazi uThixo njengobutyebi obuselelweyo.’
23 Ngokomzekelo, xa uhlola izibhalo kumbhalo wakho weBhayibhile, unokuwuhlolisisa ngokufutshane umongo wesibhalo ngasinye. Yonke into ‘ungayiphanda ngokuchanileyo,’ kanye njengoko wenzayo uLuka xa wayebhala incwadi yakhe yeVangeli. (Luka 1:3) Umgudu ongakumbi uya kukunceda ube nobuchule xa ukhangela izibhalo kubulungiseleli naxa unikela iintetho. Abaninzi baye bathi bayawathanda amaNgqina kaYehova ngenxa yokuba ayayazi indlela yokusebenzisa iiBhayibhile zawo. Ekuphela kwendlela okunokwenzeka ngayo oku kuthi kuxa sikwenza umkhwa wobuqu ukuhlola izibhalo kwezethu iiBhayibhile.
24 Ukulisebenzisa Ngobulumko Ixesha Lethu: Enye inkalo kulo mba inento yokwenza nexesha elichithwa kuyilwa, kufundwa nelokuphengulula inkcazelo ekwi-Internet. INdumiso 90:12 isikhuthaza ukuba sithandaze sithi: “Sazise kanye ukuyibala imihla yethu, ukuze sizuze intliziyo elumkileyo.” UPawulos wathi: “Ixesha eliseleyo lifinyele.” (1 Kor. 7:29) Waphinda wathi: “Ngokwenene, ngoko, lo gama sinexesha elilungileyo loko, masisebenze oko kulungileyo kubo bonke, kodwa ngokukodwa kwabo bahlobene nathi elukholweni.”—Gal. 6:10.
25 Iziluleko ezinjalo zibalaselisa imfuneko yokuba siyilumkele indlela esilisebenzisa ngayo ixesha lethu. Hayi indlela okuyingenelo ngayo ukuchitha ixesha ufunda iLizwi likaThixo! (INdu. 1:1, 2) Olo lunxulumano olusemagqabini esinokuba nalo. (2 Tim. 3:16, 17) Bazali, ngaba niyabafundisa abantwana benu ukubaluleka kokusebenzisa ixesha labo ngobulumko kwizilangazelelo zoBukumkani? (INtshu. 12:1) Ixesha elichithwe kwisifundo seBhayibhile sobuqu nesekhaya, elokuya ezintlanganisweni nakubulungiseleli basentsimini libhetele gqitha kunexesha elichithwe kuphengululwa kwi-Internet, ulindele ukufumana okuthile.
26 Kule nkalo, likhondo lobulumko ukunikela ingqalelo yethu kwizinto zokomoya nakwizinto ezifanelekileyo nezibalulekileyo kubomi bethu njengamaKristu. Oku kufuna sicingisise xa sikhetha inkcazelo esinokulichithela kuyo ixesha lethu nesifanele sicinge ngayo. Oko kufanele ubomi bethu njengamaKristu kwashwankathelwa nguKristu owathi: “Qhubekani, ke ngoko, nifuna kuqala ubukumkani nobulungisa bakhe, yaye zonke ezinye izinto ziya kongezelelwa kuni.” (Mat. 6:33) Ngaba akonwabi xa ubomi bakho buzaliswe lusukelo loBukumkani kunawo nawuphi na omnye umsebenzi?
27 I-E-Mail Ye-Internet: Nangona ukwabelana ngamava obuqu okanye iingcamango ezithile nentsapho okanye abahlobo abaqeleleneyo kufanelekile, ngaba kukubonakalisa uthando lokwenene ukudlulisela oku kwabanye abasenokungayazi intsapho okanye abahlobo bakho? Okanye ngaba afanele afakwe kwiWeb page ukuze afundwe nguye nabani? Ngaba ezi ndaba zobuqu zifanele zikhutshelwe zize zithunyelwe ngokungenamkhethe kubantu osenokuba uyabazi okanye akubazi? Ngokufanayo, ukuba ufumana iindaba ezivela kwabanye ngokucacileyo ebezingezozakho, ngaba kukubonakalisa uthando ukuzidlulisela kwabanye?
28 Kuthekani ukuba amava owadluliselayo akachananga? Ngaba oku akuyi kufak’ isandla ekuhambiseleni phambili ubuxoki? (IMize. 12:19; 21:28; 30:8; Kol. 3:9) Ngokuqinisekileyo, ukuhlala ‘siyiphaphele ngokungqongqo indlela esihamba ngayo ingabi njengeyabantu abangezozilumko kodwa ibe njengeyezilumko’ kuya kusishukumisela ekubeni sikuqwalasele oku. (Efe. 5:15) Hayi indlela esonwabe ngayo ngokuba INcwadi Yonyaka, IMboniselo noVukani! zizaliswe ngamava achanileyo asikhuthazayo aze asishukumisele ukuba siqhubeke sihamba ‘endleleni’!—Isa. 30:20, 21.
29 Kwakhona kukho nenye ingozi. Umpostile uPawulos wathi ngabathile: “Bakwafunda ukungenzi nto, berhatyula ezindlwini; ewe, ingekuko ukungenzi nto kuphela, kodwa bekwangabahlebi yaye begxuphuleka kwimicimbi yabanye abantu, bethetha izinto abangafanele bazithethe.” (1 Tim. 5:13) Oku kunxamnye nokuchitha ixesha namandla udlulisela inkcazelo engabalulekanga kubazalwana bethu.
30 Kwakhona, cinga ngomlinganiselo wexesha elifunekayo ukuze ufunde yonke intaphane ye-E-mail. Okubangel’ umdla kukuba incwadi ethi Data Smog yathi: “Xa ubani echitha ixesha elingakumbi etsala umnxeba, ie-mail itshintsha ngokukhawuleza ekubeni yinto entsha ebangel’ umdla ibe yinto echitha ixesha, inentaphane yezigidimi ekufuneka zifundiwe yaye uphendule amaqabane, abahlobo, intsapho . . . mihla le nezibhengezo zentengiso ezingagunyaziswanga.” Yongezelela yathi: “Uninzi lwabantu abathanda i-elektroniki baye bangenwa ngumkhwa ombi wokudlulisela inkcazelo eyolisayo abayifumanayo—iziqhulo, amabali asekuhlaleni, iileta ze-elektroniki nokunye okungakumbi—kuye wonke ubani okwidilesi yabo ye-elektroniki.”
31 Oku kuye kwaphawuleka kwi-E-mail eye yatyhutyha uninzi lwabazalwana bethu—izinto ezinjengeziqhulo okanye amabali ahlekisayo ngobulungiseleli; umbongo osekelwe kwiinkolelo zethu; imizekeliso yeentetho ezahlukeneyo eviwe ezindibanweni ezincinane nakwezinkulu, okanye kwiHolo yoBukumkani, amava obulungiseleli basentsimini; njalo njalo—izinto eneneni ezibonakala zinyulu. Ngokuqhelekileyo inkoliso izidlulisa ngaphandle kokuwuhlolisisa umthombo wezo E-mail, nto leyo eyenza kube nzima ukwazi apho zisuka khona, nto leyo efanele imenze ubani azibuze ngobunyaniso baloo nkcazelo.—IMize. 22:20, 21.
32 Imiyalezo engabalulekanga ngolo hlobo asingomazwi aphilileyo awayecinga ngawo uPawulos xa wabhalela uTimoti, esithi: “Hlala ubambe isizekelo samazwi aphilileyo owaweva kum ngokholo nothando olunxibelelene noKristu Yesu.” (2 Tim. 1:13) “Intetho enyulu” yenyaniso yeZibhalo ‘inesizekelo samazwi aphilileyo’ asekelwe kumxholo weBhayibhile ubukhulu becala wokuthethelelwa kolongamo lukaYehova ngoBukumkani. (Zef. 3:9) Sifanele senze konke okusemandleni ethu ukuze sichithe lonke ixesha esinalo namandla sixhasa oku kuthethelelwa kolongamo lukaYehova.
33 Ekubeni singene nzulu kwixesha lesiphelo lale nkqubo yezinto, eli asiloxesha lokuyekelela umxakatho. IBhayibhile isilumkisa isithi: “Gcinani iingqiqo zenu, lindani. Utshaba lwenu, uMtyholi, luhamba-hamba njengengonyama egqumayo, efuna ukuqwenga uthile.” (1 Pet. 5:8) Ihlabela mgama isithi: “Yambathani isikrweqe siphela sikaThixo ukuze nikwazi ukuma niqinile nxamnye namaqhinga kaMtyholi.”—Efe. 6:11.
34 Ukuba isetyenziswa kakubi, i-Internet inokuba sisixhobo sikaSathana sokufikelela abo ibalawulayo. Nangona inokuba luncedo ngomlinganiselo othile, kukho ingozi ukuba asiyiphaphelanga indlela esiyisebenzisa ngayo. Ngokukodwa abazali kufuneka bayixhalabele indlela abantwana babo abayisebenzisa ngayo i-Internet.
35 Ukuba nembono elungeleleneyo nge-Internet kuyakhusela. Siyasixabisa isikhumbuzo esisexesheni sikaPawulos esithi: “Nabo balisebenzisayo eli hlabathi babe njengabo bangalisebenzisi ngokupheleleyo; kuba imeko yeli hlabathi iyatshintsha.” (1 Kor. 7:29-31) Ukukhumbula ezi zinto kuya kusinceda neentsapho zethu ukuba singaphazanyiswa koko kuthenjiswa lihlabathi, kuquka noko kukwi-Internet.
36 Kubalulekile ukuba sibe nolwalamano olusondeleyo nabazalwana bethu ebandleni size silisebenzise ngobulumko ixesha eliseleyo, ngaloo ndlela sizenza sifumanekele ukuhambisela phambili izilangazelelo zoBukumkani. Njengokuba le nkqubo isondela esiphelweni sayo, ‘masingabi saqhubeka sihamba kanye njengokuhamba kweentlanga ngamampunge eengqondo zazo,’ kodwa ‘masiqhubeke sikuqonda into okuyiyo ukuthanda kukaYehova.’—Efe. 4:17; 5:17.