Siwaxabisa Ngokwenene Amalungelo Esinawo!
1 Ukususela ekudalweni komntu, uYehova uye wajizeka abakhonzi bakhe ngentabalala yamalungelo. Uye wabanika la malungelo kungakhathaliseki ubuni babo, ubudala okanye umgangatho abakuwo ebomini. (Luka 1:41, 42; IZe. 7:46; Fil. 1:29) Ngawaphi amalungelo asinika wona namhlanje?
2 Amanye Amalungelo Esinawo: Sinelungelo lokufundiswa nguYehova. (Mat. 13:11, 15) Elinye kukudumisa uYehova ngokugqabaza ezintlanganisweni. (INdu. 35:18) Xa sifumana ithuba lokugqabaza, senjenjalo ngehlombe. Ngokufanayo, ukuba siba negugu ngazo zonke izabelo esizifumana ebandleni, siya kuzenza ngamandla ethu onke. Ngaba sibakho rhoqo xa kucocwa iHolo yoBukumkani naxa ilungiswa?
3 Nangona izigidi zabantu zizibuza enoba uThixo uyayiphulaphula na imithandazo yazo, thina sinelungelo elikhethekileyo lokuba imithandazo yethu iphulaphulwe ngoyena Mntu ubalulekileyo kwindalo iphela. (IMize. 15:29) UYehova uyiphulaphula ngokwakhe imithandazo yabakhonzi bakhe. (1 Pet. 3:12) Akasisikeli ukuba sithethe kangaphi naye. Hayi indlela esixabiseke ngayo isipho esinaso sokukwazi ukuthandaza “ngazo zonke izihlandlo”!—Efe. 6:18.
4 “Abasebenzi Abangamadlelane KaThixo”: Elinye lawona malungelo esinawo kukuvakalisa iindaba ezilungileyo zoBukumkani bukaThixo ‘njengabasebenzi abangamadlelane akhe.’ (1 Kor. 3:9) Lo ngumsebenzi owanelisayo nohlaziyayo. (Yoh. 4:34) UYehova ebenokuwenza lo msebenzi ngaphandle kokusebenzisa abantu, kodwa uwunikele kuthi ngenxa yokuba esithanda. (Luka 19:39, 40) Kodwa ke, eli lungelo akaliniki nokuba ngubani. Abo bashumayela esidlangalaleni bamele babe neemfaneleko ezithile zokomoya kwaye baqhubeke benazo. (Isa. 52:11) Ngaba sibonisa ukuba siyalixabisa eli lungelo ngokuba intsimi siyenze inxalenye ebalulekileyo yezinto esizenzayo veki nganye?
5 Amalungelo esiwanikwa nguYehova abangela ukuba siphile ubomi obanelisayo. (IMize. 10:22) Ungaze uwajongele phantsi! Xa sibonisa ukuba siwaxabisa ngokwenene amalungelo enkonzo esinawo, sikholisa uBawo wethu wasezulwini, uMniki waso “sonke isipho esilungileyo naso sonke isipho esigqibeleleyo.”—Yak. 1:17.