Ileta Evela Kwisebe
Mvakalisi Othandekayo:
Kusivuyisa gqitha ukubona inkqubela kumsebenzi owenziwe kwintsimi engaphantsi kwesebe loMzantsi Afrika kunyaka wenkonzo wama-2007! Siye safikelela incopho yabavakalisi abangama-79 266 eMzantsi Afrika ngoAprili. NgoJanuwari, iLesotho iye yafaka ingxelo yencopho entsha yabavakalisi abangama-3 376 yaye iBotswana iye yafikelela incopho entsha yabavakalisi abali-1 681. INamibia yona iye yafaka ingxelo yencopho entsha yabavakalisi abali-1 499 ngoMatshi yaza iSwazini yanikela ingxelo yabavakalisi abangama-2 529 ngoAprili. Sithi maz’ enethole bazalwana! Asikhange silufikelele usukelo loovulindlela abangabancedani abali-14 000 ngoAprili, njengoko bekuboniswe kwisihlomelo soBulungiseleli Bethu BoBukumkani bukaFebruwari. Noko ke, abangama-9 036 baye baba ngoovulindlela abangabancedani kuwo onke amazwe angaphantsi kwesebe lethu.
NgoSeptemba 2006 baninzi abaye bakunandipha ukusasaza uVukani! okhethekileyo. Emva koko siye sanephulo lokuhambisa iKingdom News No. 37 enomxholo othi, “Isiphelo Sonqulo Lobuxoki Sisemnyango!” Emva kokuba efumene eli phecana, omnye udade opholileyo akazange akwazi ukulala. KwiCawa elandelayo, waya ezintlanganisweni waza wacela ukuqhutyelwa isifundo seBhayibhile. Isimemo esikhethekileyo sendibano yesithili siye sabangela ukuba abaninzi baye kwindibano yesithili. Omnye umfana waKwaZulu-Natal wasamkela esi simemo waza waya endibanweni. Ukususela ngoko akazange aphoswe ntlanganiso yaye ngoku ungumvakalisi ongabhaptizwanga. Abantu bengingqi ahlala kuyo baye babona utshintsho kuye baza nabo bacela ukuqhutyelwa isifundo yaye bayaya kwiintlanganiso. Nakulo unyaka siza kuba nethuba lokumemela abantu kwiNdibano YeSithili ‘Yokulandela UKristu!’
Injongo yala maphulo kukunceda abantu abaneentliziyo ezinyanisekileyo ukuba bazi oko kufundiswa yiBhayibhile. (Mat. 28:19, 20) Njengoko ushumayela, ungalibali ukubhala phantsi onke amagama abo baye banomdla, uze ubuyele ngenjongo yokuqalisa isifundo seBhayibhile. Kusivuyisa gqitha ukusebenza nani kulo msebenzi ubalulekileyo, yaye sinithanda kakhulu.
Abazalwana benu,
Iofisi Yesebe YaseMzantsi Afrika