Lisebenzise Kakuhle Ixesha Olichitha Entsimini
1 Ngokuqinisekileyo mninzi umsebenzi osafanele wenziwe entsimini, ibe ixesha lixhatshwe yinja. (Yoh. 4:35; 1 Kor. 7:29) Ukuba silungiselela size sicebe kakuhle, sinokulisebenzisa kakuhle elo xesha silibekele intsimi.
2 Lungiselela: Ngaphambi kokuba uye kwintlanganiso yenkonzo yasentsimini, qiniseka ukuba unoncwadi oluza kufuneka kwaye sele uyazi intshumayelo oza kuyisebenzisa. Emva kokuba intlanganiso ivalwe ngomthandazo, hamba uye entsimini. Loo nto iya kunceda wena kunye nabo basebenza kunye nawe ukuba niphumeze indima enkulu kangangoko ninako entsimini.
3 Ukuba wabelwe ukuqhuba intlanganiso yentsimi, qala ngexesha. Yenze mfutshane le ntlanganiso—ingadluli kwimizuzu eli-10 ukuya kweli-15. Ngaphambi kokuba kuphunywe, qiniseka ukuba umntu ngamnye uyazi ukuba uhamba nabani nalapho aza kusebenza khona.
4 Xa Usentsimini: Yakuba iphelile intlanganiso yentsimi, mus’ ukungqunga, hamba uye entsimini. Ukuba uza kutshayisa msinya entsimini, mhlawumbi unokuzilungiselela into yokuhamba ukuze kungafuneki wonke umntu atshayise msinya naye. Xa nisebenza njengeqela, bacingele abanye abasenokuba balinde wena ukuba ugqibezele ingxubusho. Kusenokufuneka umyeke ngobuchule umntu ophikisayo okanye ulungiselele ukubuya kwakhona kumntu onomdla.—Mat. 10:11.
5 Xa usenza amabuyelo, unokukuphepha ukuhla unyuka ngokubuyela kubo bonke abantu abakummandla othile ngaphambi kokuba udlulele komnye. Mhlawumbi abathile unokubafowunela ukuze uqiniseke ukuba uza kubafumana xa usiya kubo. (IMize. 21:5) Ukuba ucinga ukuba uza kuba nengxubusho ende, unokulungiselela ukuba abo bakwiqela lakho bashumayele kufutshane okanye baye kwelinye ibuyelo.
6 Siphila kwixesha lesivuno esikhulu sokomoya. (Mat. 9:37, 38) Kungekudala lo msebenzi uza kuphela. Ngoko, sifanele silisebenzise kakuhle ixesha esilichitha entsimini.