Baya Kuva Njani?
1. Kutheni umsebenzi wokushumayela usenokuba nzima, yaye kutheni siqhubeka sishumayela nje?
1 Ekubeni sele kumbovu ukuba ifike imini kaYehova, kungxamisekile ukuba sincede abantu abaninzi ukuba bafumane ulwazi oluchanileyo ngoThixo nangenjongo anayo ngabantu. (Yoh. 17:3; 2 Pet. 3:9, 10) Le nto isenokuba nzima ngamanye amaxesha, kuba abantu abaninzi abanamdla okanye bahlekisa ngathi ngenxa yomsebenzi wethu wokushumayela. (2 Pet. 3:3, 4) Kodwa ke sinezizathu ezivakalayo zokuba sikholelwe ukuba basekho abantu abaya kuzamkela iindaba ezilungileyo kwintsimi yethu bakuba bezivile. Baya kuziva njani ke ukuba akukho mntu ubashumayezayo?—Roma 10:14, 15.
2. Umzekelo kampostile uPawulos usikhuthaza njani?
2 Ukujongana Nenkcaso: Asifanele siyeke kuba basekho abasafuna ukuwuva umyalezo woBukumkani. IFilipi yayisisixeko sokuqala eYurophu ukuva umpostile uPawulos eshumayela iindaba ezilungileyo. Xa yena noSilas babhutywa ngezityholo zobuxoki, babethwa ngeentonga baza bavalelwa entolongweni. (IZe. 16:16-24) Noko ke, loo ntlungu babephantsi kwayo ayizange ibangele uPawulos arhoxe kuba esoyika. Xa watyelela iTesalonika, isixeko esasilandela eso kuhambo lwakhe lokusasaza ivangeli, ‘uThixo wamomeleza.’ (1 Tes. 2:2) Ngaba umzekelo kaPawulos awusenzi sicace isizathu sokuba ‘singadinwa’?—Gal. 6:9.
3. Yintoni enokwenza abantu abebengenamdla batshintshe?
3 Abantu abaninzi abebengafuni nokuva oku baye batshintsha. Ukudodobala kwezoqoqosho, ukugula, ukufelwa, okanye iingxelo zehlabathi zeziganeko eziphazamisayo zinokwenza abantu batshintshe. (1 Kor. 7:31) Abanye abantu ababenabazali abachasayo baye bakhula baba badala kwaye bayaphulaphula bona. Ukuqhubeka kwethu sishumayela kunika abo bantu ithuba ‘lokubiza egameni likaYehova’ ngaphambi kokuba bashiywe lixesha.—Roma 10:13.
4. Yintoni esenza siqhubeke sishumayela “ngaphandle kokuyekelela”?
4 “Ngaphandle Kokuyekelela”: Ukuthanda kwethu uThixo nabamelwane bethu kuya kusenza siqhubeke sishumayela kwaye sisenza abafundi “ngaphandle kokuyekelela” njengabapostile benkulungwane yokuqala. (IZe. 5:42) Abantu abaninzi namhlanje ‘bayancwina kwaye bayagcuma ngenxa yezinto ezicekisekayo’ ezenzeka kule mihla. (Hez. 9:4) Ngokwenene iindaba ezilungileyo zibenza babe nethemba kwaye bafumane isiqabu abantu abanjalo! Kwanaxa inkoliso yabantu ingafuni kumamela, iZibhalo ziyasiqinisekisa ukuba uYehova ukholiswa kakhulu yimizamo esiyenzayo.—Heb. 13:15, 16.