Asiyekeleli Ekuvakaliseni Iindaba Ezilungileyo
1 AmaKristu okuqala ayebuthabatha nzulu ubulungiseleli bawo. ULuka wathi: “Imihla yonke etempileni nakwizindlu ngezindlu baqhubeka ngaphandle kokuyekelela befundisa kwaye bevakalisa iindaba ezilungileyo ezingoKristu, uYesu.” (IZe. 5:42) Kwakungekho nto yayinokubenza bayekelele, nkqu nentshutshiso! (IZe. 8:4) Babethetha nabanye ngenyaniso yonke imihla.
2 Kuthekani ngathi? Khawuzibuze: ‘Ngaba ndiyakuqonda ukungxamiseka kwala maxesha? Ngaba ndizimisele ukuqhubeka ndivakalisa iindaba ezilungileyo ngaphandle kokuyekelela?’
3 Imizekelo Yezi Mini Yokushumayela Ngaphandle Kokuyekelela: Omnye udade, owayefe umzimba, wafakwa kumatshini wokuphefumla ekuthiwa yi-iron lung. Wayengakwazi ukuya kwiHolo yoBukumkani okanye aye kwindibano. Kodwa wayexakeke ngamandla ekuvakaliseni iindaba ezilungileyo. Ebudeni beminyaka engama-37 ehleli le ntlalo, wakwazi ukunceda abantu abali-17 bafunda inyaniso! Wakwenza njani oku? Nangona wayengakwazi ukuya kwindlu ngendlu, suku ngalunye wayefumana indlela yokunikela ubungqina obungacwangciswanga kwabo babeze kumbona.
4 Abazalwana bethu eBosnia kuye kwafuneka bahlangabezane nemfazwe nokuswela. Naxa kunjalo, bayaqhubeka beshumayela rhoqo kwabanye. ESarajevo abavakalisi bebenikela ingxelo yomlinganiselo weeyure ezingama-20 ngenyanga ekuthetheni nabanye ngeendaba ezilungileyo, yaye ngamnye uqhuba umlinganiselo wezifundo zeBhayibhile ezimbini. Phezu kwazo nje iimeko zabo ezimaxongo, bashumayela yaye bafundisa ngaphandle kokuyekelela.
5 Nabantu abaselula banenzondelelo kubulungiseleli. Intsapho yamaNgqina eRwanda yangeniswa kwigumbi eyayiza kubulawelwa kulo ngamajoni. Le ntsapho yacela imvume yokuthandaza kuqala. Yayinikwa, yaza intwazana yakhona, enguDeborah, yathandaza ngokuvakalayo yathi: “Yehova, kule veki mna noTata sihambise amaphephancwadi amahlanu. Siza kubuyela njani ngoku kwaba bantu ukuze sibafundise inyaniso size sibancede bafumane ubomi?” Ngenxa yokholo lwayo olomeleleyo nokuthanda ubulungiseleli, yonke le ntsapho yasindiswa.
6 Namhlanje, kufuneka siwaphaphele amathuba okunikela ubungqina kwabanye size sifune abo ‘banotyekelo olufanelekileyo ngobomi obungunaphakade.’ (IZe. 13:48) Ngokuvisisana neemeko zasekuhlaleni, abadala bebandla benza amalungiselelo okunikela ubungqina njengamaqela ngamaxesha afanelekileyo, enoba kungeentsasa, emva kwemini, okanye ngamarhatya. Amanqaku oBulungiseleli Bethu BoBukumkani kunye neenxalenye zeNtlanganiso Yenkonzo, zeendibano zesiphaluka nezesithili zinikela amacebiso asexesheni zize zikhuthaze ukuba nesabelo kwiinkalo ezahlukeneyo zokunikela ubungqina ngoBukumkani. Ukongezelela koku, abaveleli besiphaluka nabesithili baqeqesha abavakalisi ekunikeleni ubungqina esitratweni, bebabonisa indlela yokusebenza kwintsimi enamashishini, baze bachaze iindlela zokunikela ubungqina naphi na apho kufumaneka khona abantu. Konke oku kubonisa ukuba asiyekeleli ekuvakaliseni iindaba ezilungileyo!
7 Ngenkalipho abapostile bakaYesu bathi: “Asinakuyeka ukuthetha ngezinto esizibonileyo nesizivileyo.” Babezingisa njani phezu kwayo yonke imiqobo? Bacela uYehova abancede, nto leyo awayenzayo, yaye “bonke bazaliswa ngumoya oyingcwele kwaye babelithetha ngenkalipho ilizwi likaThixo.” (IZe. 4:20, 29, 31) Asinguye wonk’ ubani osenokusikelelwa ngamava abalaseleyo kubulungiseleli, kodwa ukuba ngokwenene sinqwenela ukuvakalisa iindaba ezilungileyo ngaphandle kokuyekelela yaye ukuba senza unako-nako ukuze senjenjalo imihla ngemihla, uYehova uya kusinceda.