Kulungele Ukuqalisa Isifundo SeBhayibhile
1. Yintoni ebandakanyekileyo ekuphumezeni umyalelo kaYesu okuMateyu 28:19, 20?
1 UYesu wasinika umyalelo wokuba ‘senze abafundi, sibafundise.’ (Mat. 28:19, 20) Ngoko ke, sifuna ukuhlala sikulungele ukuqalisa isifundo seBhayibhile ngawo onke amaxesha, singapheleli kwimpela-veki ebekelwe ukuqalisa izifundo zeBhayibhile. La macebiso alandelayo anokusebenza.
2. Ngoobani esinokufunda nabo iBhayibhile?
2 Sicele: Okukhona sicela izifundo zeBhayibhile, kokukhona esiba maninzi amathuba okusifumana. (INtshu. 11:6) Ngaba ukhe wayizama indlela engqalileyo? Elinye ibandla eUnited States lenza umgudu wokukwenza oku inyanga yonke. Indlela elavuya ngayo xa laqalisa izifundo zeBhayibhile ezingama-42! Musa ukucingela ukuba abantu abanomdla odibana nabo bayazi ukuba ukulungele ukufunda iBhayibhile kunye nabo. Xa uphind’ ubuyela, kutheni ungaceli ukuqhuba isifundo nje? Ukuba abavumi, akukho ngxaki kuloo nto. Usenokuqhubeka uhlakulela umdla. Ngaba ukhe wababuza abamelwane, izalamane, abantu osebenza nofunda nabo ukuba bangathanda kusini na ukufunda iBhayibhile kunye nawe? Usenokubuza nezifundo zakho ukuba zinazo na izihlobo okanye izalamane ezingathanda ukufunda iBhayibhile kusini na.
3. Sisiphi isixhobo esiluncedo esinaso sokuqalisa izifundo, yaye sinokusisebenzisa nini?
3 Isixhobo Esiluncedo: Isixhobo esibalulekileyo sokuqalisa izifundo zeBhayibhile liphecana elithi Ngaba Ungathanda Ukwazi Eyona Nyaniso? Unokulinika abaninimzi enoba bayalwamkela olunye uncwadi okanye akunjalo. Lisenokusetyenziswa xa nisebenza intsimi yamashishini, umsebenzi wokushumayela esitratweni, xa nithumela iileta naxa nisenza amabuyelo. Lisenokushiywa nakwimizi ekungekho bantu kuyo. Kutheni ungaliphathi xa uhamba ngesithuthi sikawonke wonke naxa usiya kuthenga naxa usemsebenzini? Iphepha elingasemva ngokufutshane licacisa ilungiselelo lethu lesifundo seBhayibhile lize litshayelele incwadi ethi Okufundiswa YiBhayibhile.
4. Sinokulisebenzisa njani iphecana elithi Eyona Nyaniso ukuqalisa isifundo?
4 Emva kokulinika umntu eli phecana, usenokumbonisa imibuzo ekwiphepha elingaphambili uze uthi, “Nguwuphi kule mibuzo onomdla kuwo?” Emva koko xubusha naye impendulo ekweli phecana, uze ufunde okanye ushwankathele iphepha elingasemva, elicacisa ilungiselelo lethu lesifundo seBhayibhile. Usenokumbonisa apho ifumaneka khona inkcazelo engakumbi ngalo mbandela kwincwadi ethi Okufundiswa YiBhayibhile, mnike incwadi uze wenze amalungiselelo okubuya ukuze uqhubeke nale ncoko.
5. Kutheni sifanele sikulungele ukuqalisa isifundo seBhayibhile?
5 Intsimi yethu isenabantu abakulangazelelayo ukufunda oko iBhayibhile ikufundisayo. Ngokulungela ukuqalisa isifundo seBhayibhile, siya kuba namathuba angakumbi okufumana uvuyo lokunceda abanye bahambe kwindlela ekhokelela kubomi.—Mat. 7:13, 14.