“Ubulumko Bungqineka Bububulungisa Ngemisebenzi Yabo”
1. Abanye bawujonga njani umsebenzi wethu?
1 Ngamanye amaxesha sisenokudibana nabaninimzi abachasayo abangasiqondiyo okanye abachazelwe izinto ezingachananga ngathi. Mhlawumbi iimbono zabo ziye zatshintshwa ngamajelo eendaba. Kwezinye iindawo siye sabizwa ngokuba “silihlelo eliyingozi.” Sifanele sisabele njani xa sijamelene nezinyeliso ezinjalo?
2. Yintoni eya kusinceda siphephe ukudimazeka xa sigxekwa?
2 Hlala Unesimo Sengqondo Esihle: Kwinkulungwane yokuqala, abantu babengamqondi yaye bethetha kakubi ngoYesu nabanye abakhonzi bakaYehova. (IZe. 28:22) Sekunjalo, abazange bavumele ukugxekwa kubenze babe neentloni ngobulungiseleli babo. UYesu wathi: “Ubulumko bungqineka bububulungisa ngemisebenzi yabo.” (Mat. 11:18, 19) Waqhubeka esenza ukuthanda kukaYise ngenzondelelo, eqinisekile ukuba abo bayifunayo inyaniso babeya kukubona ukubaluleka kweendaba ezilungileyo. Sinokuphepha ukudimazeka ngokukhumbula ukuba noNyana kaThixo waphathwa ngendlela efanayo.
3. Kutheni iingxelo ezimbi nokuchaswa kungafanele kusothuse?
3 UYesu wabonisa ukuba ihlabathi laliya kusithiya njengokuba lamthiyayo. (Yoh. 15:18-20) Ngoko ke, iingxelo ezimbi nokuchaswa namhlanje akufanele kusothuse. Eneneni, sifanele sizilindele izinto ezinjalo ukuba zenzeke njengoko sisiya singena nzulu kwimihla yokugqibela nomsindo kaSathana usanda. (ISityhi. 12:12) Sinokuvuya ngokuba ezi zinto zibubungqina bokuba ihlabathi likaSathana liza kutshatyalaliswa kungekudala.
4. Ukuba sidibana nenkcaso kwiindaba ezilungileyo, sifanele sisabele njani?
4 Phendula Ngobubele: Xa siphendulwa kakubi, sifanele sisabele ngobubele nangobulali. (IMiz. 15:1; Kol. 4:5, 6) Ukuba imeko iyasivumela, sisenokumcacisela umninimzi onyanisekileyo ukuba abantu banenkcazelo engachananga ngamaNgqina kaYehova okanye umbuze kutheni evakalelwa ngale ndlela avakalelwa ngayo. Ukuphendula kwethu ngobulali kunokumbangela ukuba akuthandabuze oko akuvileyo ngamaNgqina kaYehova aze aphulaphule kwixa elizayo. Noko ke, ukuba umninimzi unomsindo, kuya kuba bubulumko ukuhamba. Sinokuqiniseka ukuba kungakhathaliseki ukuba abantu basijonga njani, uYehova uyabuxabisa ubulungiseleli bethu.—Isa. 52:7.