“Yibani Nothando Ngomanyano Lwabazalwana Luphela”
La mazwi aphefumlelweyo alo mxholo abhalwa phantse kwiminyaka engamawaka amabini eyadlulayo. (1 Pet. 2:17) Kubaluleke kakhulu ukuba siwasebenzise ngoku! Singakwazi njani ukuthanda into enkulu kangaka, abazalwana abasehlabathini lonke? Kweli hlabathi lingenalo uthando, singaqiniseka njani ukuba uthando lwethu alupholi? (Mat. 24:12) Ngoxa ubukele ividiyo ethi Our Whole Association of Brothers khawuhlole enoba ungayiphendula kusini na le mibuzo ilandelayo.
(1) Saba yiyo nini inxalenye yabazalwana bethu abangamaKristu? (2) Ziziphi izinto ezintathu esizenza nabazalwana bethu? (3) Babonisa njani abazalwana bethu ukuba bazimisele kumsebenzi wokushumayela (a) kwinkqantosi yaseAlaska, (b) kumazibuko amakhulu aseYurophu, (c) nakwiintshinyela zamahlathi asePeru? (4) Kutheni sifanele singaze sivakalelwe kukuba umsebenzi wokushumayela ngumsebenzi nje oqhelekileyo? (5) Chaza imizekelo ebonisa indlela amaNgqina kaYehova aye athuthuzelana aza axhasana ngayo (a) emva kwenyikima, (b) emva kwenkanyamba, (c) naxa kukho imfazwe yamakhaya? (6) Ziziphi iindlela esinokubonisa ngazo olona phawu lusahlula njengabazalwana abangamaKristu? (Yoh. 13:35) (7) Ziziphi iingenelo zokusebenza kunye xa sisakha iiHolo zoBukumkani? (8) Abazalwana bethu baseMpuma Yurophu naseRashiya bakwazi njani ukuqhubeka besondele kuYehova xa wawuvaliwe umsebenzi? (9) Yiyiphi imigudu eyenziwa ngamaNgqina amaninzi ukuze aye ezindibanweni yaye ngoba? (10) Le vidiyo ikukhuthaze njani ukuba (a) unqule uYehova kwiintlanganiso zamaKristu ngomanyano nabazalwana bakho, (b) uncede abanye ngamaxesha entlekele, uze (c) ushumayele ngokunyaniseka nanini na nangaziphi na iindlela? (11) Singayisebenzisa njani yaye nini le vidiyo kubulungiseleli?
Isizathu esiyintloko sokuba sibe yinxalenye yabazalwana abangamaKristu kukuthanda kwethu uYehova. Siyakuthanda ukufunda ngaye nokufundisa abanye ngaye. Yaye siyabathanda abantu abathandayo uYehova. Xa sibanceda ngexesha lobunzima, asilindelanga ukuba uThixo asibulele. Endaweni yoko siyambulela uThixo ngesipho sabazalwana bethu abasemhlabeni wonke. Njengoko sikwimihla yokugqibela yeli hlabathi lingenalo uthando, ngamana singaqhubeka sibathanda abazalwana bethu!