Undijonga Njani UYehova?
1. IBhayibhile ifana njani nesipili?
1 Uzijonga kangaphi esipilini? Uninzi lwethu luzijonga suku ngalunye kuba kusinceda sibone izinto ezifuna ukuhoywa emizimbeni yethu. IBhayibhile ifaniswa nesipili. Ukufunda iLizwi likaThixo kusinceda sizibone oko sikuko ngaphakathi, sibone oko uYehova akubonayo. (1 Sam. 16:7; Yak. 1:22-24) ILizwi likaThixo “liyakwazi ukuphicotha iingcamango notyekelo lwentliziyo.” (Heb. 4:12) Ukufunda nokucamngca ngeBhayibhile suku ngalunye kunokusinceda njani sibone iinkalo esimele siphucule kuzo ukuze sibe ngabavangeli abaphumelelayo?—INdu. 1:1-3.
2. IBhayibhile inokusinceda njani sizihlolisise?
2 Sebenzisa IBhayibhile Njengesipili: Imizekelo eseBhayibhileni yabakhonzi bakaYehova abathembekileyo isifundisa ngeempawu azithandayo. Ngokomzekelo, uDavide waba nenzondelelo ngegama likaThixo. (1 Sam. 17:45, 46) U-Isaya ngesibindi wazinikela ukuba aye kushumayela kwintsimi enzima. (Isa. 6:8, 9) Uthando lukaYesu ngoYise wasezulwini lwamenza wakujonga ukushumayela njengokuhlaziyayo nokwanelisayo kunokuba kube luxanduva. (Yoh. 4:34) AmaKristu okuqala ayeshumayela ngenzondelelo, ethembele ngoYehova ibe ayezimisele ukuba angayekeleli. (IZe. 5:41, 42; 2 Kor. 4:1; 2 Tim. 4:17) Ukucamngca ngemizekelo enjalo kusinceda sibe nosukelo lokuphucula inkonzo esiyinikela kuThixo.
3. Kutheni singamele silibazise ekwenzeni utshintsho olufunekayo?
3 Yenza Utshintsho Olufunekayo: Kakade ke, akusincedi nganto ukuzijonga esipilini size singazilungisi izinto ezifuna ukulungiswa. Sinokucela uYehova asincede sizihlolisise kakuhle size senze utshintsho olufunekayo. (INdu. 139:23, 24; Luka 11:13) Kuba ixesha eliseleyo lifinyele ibe nobomi babantu busengozini, asimele silibazise ekwenzeni utshintsho olufunekayo.—1 Kor. 7:29; 1 Tim. 4:16.
4. Kwenzeka ntoni kumntu oqhubeka efunda iLizwi likaThixo aze enze oko likuthethayo?
4 Umntu onguye ngaphakathi—oko akujongayo uYehova—kokona kubaluleke ngakumbi kunenkangeleko yangaphandle. (1 Pet. 3:3, 4) Kwenzeka ntoni kumntu oqhubeka efunda iLizwi likaThixo aze enze oko likuthethayo? Uye “akaba ngovayo aze alibale, kodwa waba ngumenzi womsebenzi, uya kuba noyolo ekuwenzeni kwakhe.” (Yak. 1:25) Siya kuba ngabashumayeli abanoyolo nabaphumelelayo kuba “silubonakalisa njengezipili uzuko lukaYehova.”—2 Kor. 3:18.