INDLELA YOKUPHILA YAMAKRISTU
Ukuze Abantu Babe Ngabafundi, Kufuneka Bashunyayezwe Baze Bafundiswe
UYesu wathi kubalandeli bakhe mabahambe bayokwenza abafundi. (Mat 28:19) Kwakufuneka bashumayele baze bafundise. Kufuneka sisoloko sizibuza, ‘Ndingaphucula njani kwezi ndlela zimbini zokwenza abafundi?’
UKUSHUMAYELA
Endaweni yokuba silindele abantu beze kuthi, kufuneka ibe sithi abakhangela ‘abafanelekayo.’ (Mat 10:11) Xa sisentsimini, ngaba senza konke esinako ukuze sithethe nabantu ‘abakhoyo?’ (IZe 17:17) Ngenxa yokuba umpostile uPawulos wayekhuthele kumsebenzi wokushumayela, uLidiya waba ngumfundi.—IZe 16:13-15.
“Hlwayela imbewu yakho, yaye ungasiphumzi isandla sakho de kube ngokuhlwa” (INt 11:6)
BUKELA IVIDIYO ETHI, QHUBEKA USHUMAYELA “NGAPHANDLE KOKUYEKELELA”—NGOKUNGACWANGCISWANGA NAKWINDLU NGENDLU, UZE UPHENDULE LE MIBUZO ILANDELAYO:
Kumsebenzi wakhe wemihla ngemihla, uSamuel wabonisa njani ukuba wayesoloko ekulungele ukutyala imbewu yenyaniso?
Kutheni sifanele sizikhuthalele zonke iindlela zokushumayela?
Kumsebenzi wakho wemihla ngemihla, unokushumayela kubani?
UKUFUNDISA
Ukuze senze abafundi, akufunekanga siphelele nje ekushiyeleni abantu iincwadi. Ukuze bayazi into uThixo ayifunayo kubo, kufuneka sibuyele size siqhube izifundo. (1Ko 3:6-9) Kodwa siza kuthini xa singade sibone tshintsho kuloo mntu simfundisayo? (Mat 13:19-22) Kufuneka siqhubeke sikhangela abantu abaneentliziyo ezifana ‘nomhlaba omhle.’—Mat 13:23; IZe 13:48.
“Mna ndatyala, uApolo wankcenkcesha, kodwa uThixo wakhulisa” (1Ko 3:6)
BUKELA IVIDIYO ETHI, QHUBEKA USHUMAYELA “NGAPHANDLE KOKUYEKELELA”—KWIINDAWO ZIKAWONKE-WONKE NAXA USENZA ABAFUNDI, UZE UPHENDULE LE MIBUZO ILANDELAYO:
USolomon noMary bayinkcenkceshela njani imbewu yenyaniso kwintliziyo kaEzekiel neka-Abigail?
Xa sisebenzisa iindlela ezahlukeneyo zokushumayela, imele ibe yintoni injongo yethu?
Singakubonisa njani ukubaluleka kokufundisa abantu inyaniso?