1921—Kwiminyaka Elikhulu Eyadlulayo

IMBONISELO kaJanuwari 1 1921, yabuza lo mbuzo kuBafundi BeBhayibhile, “Yintoni esifanele siyilindele kulo nyaka?” Impendulo yawo yayikuIsaya 61:1, 2 owayebakhumbuza ngomsebenzi wabo wokushumayela. Uthi: “UYehova undikhethile ukuba ndishumayele iindaba ezilungileyo kubantu abalulamileyo . . . , ukuvakalisa unyaka wokwaneliseka kukaYehova nomhla wempindezelo kaThixo wethu.”

ABASHUMAYELI ABANESIBINDI

ABafundi BeBhayibhile kwakufuneka babe nesibindi ukuze bawenze umsebenzi wokushumayela. Babengazukushumayela “iindaba ezilungileyo” qha kubantu abalulamileyo, babefanele bavakalise “nomhla wempindezelo” kubantu abenza izinto ezimbi.

UMzalwana uJ. H. Hoskin owayehlala eKhanada, washumayela ngesibindi nangona abantu babengenamdla. Ngentwasahlobo yango-1921 wadibana nomfundisi waseWisile. UMzalwana uHoskin wancokola naye wathi: “Kuyafuneka sincokole ngeBhayibhile. Ukuba kukho izinto esingavumelaniyo ngazo loo nto ayithethi kuthi sixabene, sisengabahlobo.” Kodwa loo nto zange yenzeke. UMzalwana uHoskin uthi, “Sancokola nje imizuzu embalwa nalo mfundisi ndabona sel’ embakraza ucango, kwaba ngathi ifestile yolo cango iza kophuka.”

Lo mfundisi wamngxolisa esithi, “Kutheni ungayothetha nabantu abangengomaKristu?” UMzalwana uHoskin wamshiya engamphendulanga. Kodwa ngaphakathi wayesithi, ‘ingathi naye lo mfundisi ungomnye waba bantu andithumela kubo.’

Xa lo mfundisi wayeshumayela ecaweni kusuku olulandelayo, wathetha kakubi ngoMzalwana uHoskin kubantu ababelapho. UMzalwana uHoskin uthi, “Wathi ebantwini mna ndilelona xoki likhulu elakhe lafika kule dolophu, futhi kufuneka ndibulawe.” Kodwa uMzalwana uHoskin waqhubeka eshumayela ethetha nabantu abaninzi. Uthi, “Ndandikuthanda ukushumayela kule dolophu. Abanye abantu babede bathi, ‘Ungumntu kaThixo!’ Babendibuza nokuba ikhona na into abangandinceda ngayo.”

UKUZIFUNDELA IBHAYIBHILE NOKUYIFUNDA NENTSAPHO

ABafundi BeBhayibhile babesiba nemibuzo neempendulo kwimagazini, ngoku ekuthiwa nguVukani! Yayinceda abantu abanomdla bafunde ngoThixo. Kwakukho nemibuzo yeBhayibhile, abazali ababenokuthetha ngayo nabantwana babo. Abazali “babebuza abantwana le mibuzo baze babancede bakhangele iimpendulo zayo eBhayibhileni.” Imibuzo enjengothi “Zingaphi iincwadi zeBhayibhile?” yayifundisa abantwana izinto ezilula eziseBhayibhileni. Eminye enjengothi “Ngaba amaKristu afanele alindele ukuba aza kutshutshiswa?” yayinceda abantwana bangoyiki xa beshumayela.

Kanti ke kwakukho neminye imibuzo neempendulo zeBhayibhile zabo babesele beyiqonda into ethethwa liLizwi likaThixo. Iimpendulo zale mibuzo zazifumaneka kumqulu wokuqala wencwadi eyayisithi Studies in the Scriptures. Baninzi abantu abancedwayo yile mibuzo. Nge-21 kaDisemba 1921 uVukani! wathi ayizukuphinda ikhutshwe. Kwakutheni?

INCWADI ENTSHA!

Incwadi ethi *Uhadi LukaThixo*

Ikhadi elibhalwe iindawo amele afunde kuzo umntu onomdla

Ikhadi elinemibuzo

Abazalwana ababekhokela baqonda ukuba abantu kufuneka bayifunde ngokulandelelana kwemixholo iBhayibhile. NgoNovemba 1921 kwakhutshwa incwadi ethi, Uhadi LukaThixo. Abantu abanomdla babenikwa le ncwadi bazifundele. Loo nto yayibanceda bazi ukuba kutheni uThixo efuna ukunika abantu ubomi obungunaphakade. Yayifundwa njani le ncwadi?

Umntu onikwe le ncwadi wayefumana ikhadi elimchazela ukuba zeziphi iindawo afanele azifunde kuyo. Kwiveki elandelayo wayefumana elinye elinemibuzo emininzi ngezinto azifundileyo. Ekupheleni kweli khadi wayexelelwa ngendawo afanele afunde kuyo kwiveki elandelayo.

Qho ngeveki ibandla lalithumelela umfundi ikhadi elitsha. Le nto yayisenziwa kude kuphele iiveki eziyi-12. La makhadi ayesiwa ngabazalwana noodade abadala ebandleni okanye abantu abangakwaziyo ukuya kushumayela kwindlu ngendlu. UAnna K. Gardner, waseMillvale, ePennsylvania eUnited States uthi: “Xa kwakhutshwa incwadi ethi Uhadi LukaThixo usisi wam uThayle, ongakwazi kakuhle ukuhamba, waba nomsebenzi omninzi wokumane esisa la makhadi ebantwini.” Xa egqibile umfundi kwakubakho umzalwana oya kuye ukuze amncede aqonde nezinye izinto eBhayibhileni.

UThayle Gardner uhleli kwisitulo sabantu abangakwaziyo ukuhamba

UMSEBENZI OWAWUSEZA KWENZIWA

Ngasekupheleni konyaka, uMzalwana uJ. F. Rutherford wathumela ileta kuwo onke amabandla. Wathi “umsebenzi wokushumayela ngoBukumkani owenziweyo kulo nyaka mkhulu futhi uncede abantu abaninzi kunawo nowuphi na owakhe wenziwa.” Waphinda wathi: “Usemkhulu umsebenzi ekusafuneka wenziwe. Khuthazani nabanye ukuba basincedise kulo msebenzi mhle.” Kuyacaca ke ukuba aBafundi BeBhayibhile bayenza le nto wayeyithetha. Ngo-1922 bashumayela kakhulu ngoBukumkani bengoyiki nto futhi bezimisele.

Abahlobo Abangoyiki Nto

ABafundi BeBhayibhile babethandana nyhani. Loo nto yayibonakala kwindlela ababencedana ngayo. Babengabahlobo abangoyiki nto ‘nabanokuthembana ngamaxesha anzima.’ Loo nto siza kuyibona kweli nqaku.—IMize. 17:17.

NgoLwesibini nge-31 kaMeyi 1921, kwavalelwa indoda emnyama kwidolopho yaseTulsa, eOklahoma, eUnited States. Le ndoda yayityholwa ngokuhlasela ibhinqa elimhlophe. Emva koko iqela lamadoda amhlophe angaphezu kwe-1 000 lalwa namadoda ambalwa amnyama. Lo mlo wade wayokufika nakwindawo yabantu abamnyama eGreenwood. Kwaqhekezwa kwaza kwatshiswa amakhaya angaphezu kwe-1 400 kunye neendawo zamashishini. Iingxelo zithi kwasweleka abantu abayi-36, kodwa kusenokwenzeka ukuba babemalunga ne-300. Lo mbhodamo wabizwa ngokuba yiTulsa Race Massacre.

URichard J. Hill, umzalwana omnyama owayenguMfundi WeBhayibhile ehlala eGreenwood ubalisa into eyenzekayo. Uthi: “Ngobusuku ekwakusenzeka lo mbhodamo sasineentlanganiso njengesiqhelo. Emva kwazo seva izithonga zompu edolophini phakathi. Sade salala zisavakala ezi zithonga.” Nge-1 kaJuni, ngoLwesithathu ekuseni, izinto zaya zisiba mbi. “Kwafika nabanye abantu besithi, ukuba sifuna ukukhuseleka kubhetele siye kwiHolo yeNdibano.” Ngoko uMzalwana uHill, umfazi wakhe nabantwana bakhe abahlanu babalekela kwiHolo yeNdibano eTulsa. Apho kwakukho abantu abamalunga ne-3 000 abamnyama, kukho nendoda yaseburhulumenteni eyayigcine ucwangco.

Kwangaloo mzuzu, uMzalwana uArthur Claus owayemhlophe waba nesibindi. Uthi, “Xa ndevayo ukuba lo mbhodamo sowufike naseGreenwood, ibe kuyaqhekezwa kutshiswe izindlu, ndacinga ngokuya kujonga umhlobo wam uMzalwana uHill ukuba unjani.”

UArthur Claus wayesebenzisa incwadi ethi Uhadi LukaThixo ukuze afundise abantwana abayi-14

Xa efika kumzi kaMzalwana uHill, wadibana nommelwane wakhe ephethe ingadlangadla. Lo mmelwane wayengumhlobo kaMzalwana uHill. Wacinga ukuba uArthur ngomnye waba bantu babesenza isiphithiphithi. Wambuza wathi, “Ufunani apho?”

UArthur uthi, “Ukuba ndandingaphendulanga kakuhle, ngewandidubula. Ndamxelela ukuba mna noMzalwana uHill singabahlobo futhi andiqali ukuza apha kwakhe.” Bakwazi ukuncedisana bekhusela umzi kaMzalwana uHill kwabo bantu.

UArthur wafumanisa ukuba uMzalwana uHill nentsapho yakhe bakwiHolo yeNdibano. Waxelelwa ukuba akho mntu umnyama uvumelekileyo ukuba aphume kula holo ngaphandle kwesivumelwano esisayinwe nguBarrett owayengumphathi. UArthur uthi, “Kwakunzima ukufumana ithuba lokuthetha nomphathi. Xa ndimxelela ukuba ndizokulanda le ntsapho, wabuza wathi, ‘Uza kukwazi ukuyigada uyenzele yonke into eyifunayo?’ Ndavuma ndathi, nakanjani.”

Ndaphuma ndikhawuleza ndiphethe elo phepha lisayiniweyo ndisiya kwiHolo yeNdibano. Ndafika ndalibonisa umntu owayegade apho, wathi: “Lisayinwe ngumphathi uqobo. Uyayazi ukuba ungumntu wokuqala ukuphuma nabantu kule holo?” Bobabini bakhangela uMzalwana uHill nentsapho yakhe babafumana. Bonke bakhwela emotweni, bagoduka.

UMzalwana uClaus waqiniseka ukuba uMzalwana uHill nentsapho yakhe bakhuselekile. Abanye bavuyiswa kukuba nesibindi kwakhe nokuthanda abantu. UArthur uthi, “Ummelwane owayendincedisa xa sasigade umzi kaMzalwana uHill wawathanda amaNgqina KaYehova. Nabanye abantu abaninzi baba nomdla eBhayibhileni kuba bebona ukuba amaNgqina awacalulani noba angawoluphi uhlanga. Onke angabantu bakaYehova abafanayo.”