INDLELA YOKUPHELISA INZONDO EQHUBEKAYO

3 | Susa Inzondo Engqondweni Yakho

Into Efundiswa YiBhayibhile:

“Guqukani ngokutshintsha indlela enicinga ngayo, ukuze nizibonele ngokwenu ukuthanda kukaThixo afuna sikwenze, okulungileyo, okwamkelekileyo kuye nokugqibeleleyo.”—ROMA 12:2.

Into Ethethwa Sesi Sibhalo:

Indlela esicinga ngayo ibalulekile kuThixo. (Yeremiya 17:10) Simele sikuphephe ukuthetha amazwi amabi okanye ukwenza izinto ezimbi. Inzondo iqala engqondweni nasentliziyweni. Simele siyeke ukucinga ngezinto ezisenza sibe nenzondo. Xa sisenza loo nto “sinokutshintsha” size siphelise inzondo eqhubekayo.

Indlela Esinokukunceda Ngayo Esi Sibhalo:

Cingisisa kakuhle ngendlela ocinga novakalelwa ngayo ngabantu—ingakumbi abo bolunye uhlanga okanye ilizwe. Zibuze: ‘Ndibajonga njani? Ngaba indlela endibajonga ngayo yenziwa yinto endiyaziyo ngabo okanye yenziwa lucalucalulo?’ Kuphephe ukubukela izinto ezikhuthaza inzondo nogonyamelo kwiiwebhsayithi zokuncokola, kwiimuvi okanye xa uzonwabisa.

ILizwi likaThixo lingasinceda siyeke inzondo esentliziyweni nasengqondweni yethu.

Akusoloko kulula ukubona iingcinga neemvakelelo zethu ngendlela efanelekileyo. ILizwi likaThixo lingakwazi ukusinceda ‘sibone iingcinga nezinto ezifunwa yintliziyo.’ (Hebhere 4:12) Ngoko qhubeka uyifunda iBhayibhile. Jonga into elikufundisa yona kwindlela ocinga ngayo uze uzame ukucinga ngendlela evuyisa uThixo. ILizwi likaThixo lingasinceda siyeke ukuba nenzondo “eyendeleyo” entliziyweni nasengqondweni.—2 Korinte 10:4, 5.

Ibali Lobomi

USTEPHEN—Wayitshintsha Indlela Acinga Ngayo

UStephen nentsapho yakhe baye baphathwa kakubi ngabantu abamhlophe ngenxa yenzondo. Ngenxa yaloo nto, waye watsaleleka kwiqela leepolitiki elalisilwela amalungelo abantu. Kungekudala, waye waqalisa ukophula umthetho. UStephen uthi: “Mna nabahlobo bam sabukela iimuvi ezazibonisa indlela awayephethwe kakubi ngayo amakhoboka amnyama eMerika. Sasivutha ngumsindo ngenxa yokuphathwa kakubi kwabantu, ngoko saye sabetha abantwana abamhlophe kwindawo ekwakubukelwa kuyo iimuvi. Saya kwindawo ekuhlala kuyo abantu abamhlophe, sikhangela abanye abantu esinokubabetha.”

Indlela acinga ngayo uStephen yatshintsha ngokupheleleyo xa waqalisa ukufunda iBhayibhile namaNgqina kaYehova. Uthi: “Kuba ndandiqhele ucalucalulo, kwandothusa ukubona indlela aphathana ngayo amaNgqina kaYehova. Ngokomzekelo, xa iNgqina elimhlophe lalisiya kwelinye ilizwe laye lashiya abantwana balo kwintsapho yabantu abamnyama. Ngokufanayo, intsapho yabantu abamhlophe yaye yathatha umfana omnyama owayefuna indawo yokuhlala ukuze ahlale nabo.” UStephen waye wabona ukuba amaNgqina afana nentsapho enothando ibe le nto yamnceda waqonda ukuzaliseka kwamazwi kaYesu okuba abalandeli bakhe baza kubonisa uthando lokwenene.—Yohane 13:35.

Yintoni eyanceda uStephen ukuba ayeke ubundlobongela nokucaphukela abantu? Isibhalo esikumaRoma 12:2 samnceda. Uthi: “Ndaye ndabona ukuba kufuneka nditshintshe indlela endicinga ngayo, kwaye kwafuneka ndiyeke ubundlobongela ndize ndifunde ukuba, ukuba noxolo yeyona ndlela ifanelekileyo yokuphila.” Ngoku kudlule iminyaka engapha kwe-40 esonwabela ubomi obungenanzondo.