INDLELA YOKUPHELISA INZONDO EQHUBEKAYO

4 | Yoyisa Inzondo Ngoncedo LukaThixo

Into Efundiswa YiBhayibhile:

“Isiqhamo somoya luthando, uvuyo, uxolo, umonde, ububele, ukulunga, ukholo, ukululama nokukwazi ukuzibamba.”—GALATI 5:22, 23.

Into Ethethwa Sesi Sibhalo:

Singakwazi ukuphelisa inzondo eqhubekayo xa sincedwa nguThixo. Umoya oyingcwele wakhe ungasinceda sivelise iimpawu ebesingena kukwazi ukuba nazo. Endaweni yokuba sizame ukuphelisa inzondo ngamandla ethu kungakuhle ukuba sithembele kuncedo lukaYehova. Ukuba senza njalo siza kuziva ngendlela umpostile uPawulos awaziva ngayo kuba wabhala wathi: “Ezintweni zonke ndinamandla ngenxa yalowo undinika amandla.” (Filipi 4:13) Nathi siza kukwazi ukuthi: “Uncedo lwam luvela kuYehova.”—INdumiso 121:2.

Indlela Esinokukunceda Ngayo Esi Sibhalo:

“Ngoku ndiyekile ukuba yindoda ethanda ukulwa kuba uYehova uye wandenza ndaba yindoda enoxolo.”—UWALDO

Thandaza kuYehova uzithoba ucele umoya wakhe oyingcwele. (Luka 11:13) Mcele akuncede ube neempawu ezintle ebomini bakho. Funda into ethethwa yiBhayibhile ngothando, uxolo, umonde, nokuzibamba kuba ezo mpawu ziphelisa inzondo. Jonga indlela onokuzibonakalisa ngayo ezo mpawu kobakho ubomi. Nawe zama ukuhlala nabantu abafuna ukuba nezo mpawu zifanayo. Aba bantu bangasinceda “sikhuthazane ukuba sithandane size senze izinto ezilungileyo.”—Hebhere 10:24; umbhalo osemzantsi.

Ibali Lobomi—UWALDO

Woyisa Ubundlobongela Nenzondo

UWaldo wakhula kabuhlungu kangangokuba wakhula enenzondo eninzi. Uthi xa ebalisa: “Ndandidla ngokulwa nabantu abathengisa iziyobisi . . . Ngenye imini iqela lemigulukudu labhatala umbulali owaziwayo ukuba andibulale, kodwa ndaye ndakwazi ukubaleka ndinenxeba nje elinye.”

Zange imonwabise uWaldo into yokuba umfazi wakhe aqalise ukufundelwa iBhayibhile ngamaNgqina kaYehova. Uthi: “Ndandiwacaphukela amaNgqina, ngamanye amaxesha ndandide ndiwathuke. Kodwa bona babesoloko bendiphendula kakuhle.”

Naye uWaldo wade waqalisa ukufundelwa iBhayibhile. Uthi: “Kwakungekho lula ukwenza izinto endandizifunda. Ndandiqinisekile ukuba andisoze ndiyeke ukuthanda ukulwa nokuba nomsindo.” Kodwa into awayifunda eBhayibhileni yenza umahluko omkhulu.

UWaldo uthi: “Ngenye imini, umzalwana owayendifundela, uAlejandro, wandicela ukuba ndifunde amaGalati 5:22, 23. . . . uAlejandro wathi ukuze ndikwazi ukuba nezo mpawu ndiza kuncedwa ngumoya oyingcwele kaThixo, hayi amandla am. Le nto wayithethayo yayitshintsha nyhani indlela endandizijonga ngayo izinto!”

Ngokuthembela kuThixo, uWaldo wakwazi ukuyiphelisa ngokupheleleyo inzondo eyayiqhubeka ebomini bakhe. Uthi: “Intsapho yam nabantu ababengabahlobo bam abayikholelwa tu indlela enditshintshe ngayo.” Uphinde athi: “Ngoku ndiyekile ukuba yindoda ethanda ukulwa kuba uYehova undenze indoda enoxolo.”