UYehova Ufuna Wonke Umntu Aguquke

1. Uye enze ntoni umntu oguqukileyo?

XA SIYE senza into angayifuniyo uThixo, kubalulekile ukuba siguquke. Ngokutsho kweBhayibhile, umntu oguqukileyo uye ayicaphukele into ayenzileyo, ayeke ukuyenza, aze azimisele ukungayiphindi.​—Jonga indawo ethi “ukuGuquka,” kwiNgcaciso Yamagama EBhayibhile ekwiNguqulelo Yehlabathi Elitsha.

2. Kutheni sonke simele sifunde ngokuguquka? (Nehemiya 8:​9-11)

² Wonke umntu ophilayo umele afunde ngokuguquka. Ngoba? Kaloku siyona yonk’ imihla. Ekubeni singabantwana baka-Adam noEva, sonke sinesono futhi siyafa. (Roma 3:23; 5:12) Ngoko akukho nomnye kuthi ekungasoze kufuneke aguquke. Namadoda awayesaziwa ngokuba nokholo olomeleleyo, njengoPawulos, kwakukhe kufuneke alwe nesono. (Roma 7:​21-24) Ngaba le nto ithetha ukuba simele sihlale sikhathazekile ngenxa yezono zethu? Hayi, kuba uYehova unenceba futhi ufuna sonwabe. Cinga ngento eyenzeka kumaYuda awayephila ngexesha likaNehemiya. (Funda uNehemiya 8:​9-11.) UYehova wayengafuni ahlale ezibetha ngenxa yezono awayezenzile, kodwa wayefuna amkhonze evuya. Ufuna sifunde ngokuquguka kuba uyazi ukuba kusenza sonwabe. Xa siguquka, sinokuqiniseka ukuba uTata wethu onenceba uza kusixolela.

3. Siza kuthetha ngantoni kweli nqaku?

³ Makhe sithethe ngokubhekele phaya ngokuguquka. Kweli nqaku, siza kuthetha ngezinto ezintathu. Siza kuqala sithethe ngento uYehova awayifundisa amaSirayeli ngokuguquka, emva koko, sithethe ngezinto awazenzayo ukuze ancede abantu baguquke. Ekugqibeleni, siza kuthetha ngezinto uYesu awazifundisa abalandeli bakhe ngokuguquka.

UYEHOVA WAWAFUNDISA NTONI AMASIRAYELI NGOKUGUQUKA?

4. UYehova wawafundisa ntoni amaSirayeli ngokuguquka?

⁴ Xa uYehova wanika amaSirayeli imithetho yakhe, wona amthembisa ukuba aza kuyithobela. Ukuba ayeyenza loo nto, yena wayeza kuwakhusela aze awasikelele. Wathi ngaloo mithetho: “Lo myalelo endiniyalela wona namhlanje awunzimanga yaye uyafikeleleka.” (Dut. 30:​11, 16) Kodwa ukuba ayemjikela, mhlawumbi akhonze abanye oothixo, wayeza kuyeka ukuwakhusela, aze wona angene ezingxakini. Kodwa loo nto yayingathethi kuthi uThixo uwalahlile. Ayenako ‘ukubuyela kuYehova uThixo wawo aze awathobele onke amazwi akhe.’ (Dut. 30:​1-3, 17-20) Ngamany’ amazwi ayenokuguquka. Ukuba ayenokwenza loo nto, uYehova wayeza kusondela kuwo, aphinde awasikelele.

5. UYehova wabonisa njani ukuba wayengabancami abantu bakhe? (2 Kumkani 17:​13, 14)

⁵ AmaSirayeli ayesoloko emjikela uYehova. Ayengapheleli nje ekukhonzeni oothixo bobuxoki, kodwa ayesenza nezinye izinto ezimbi. Ngenxa yaloo nto, izinto zange ziwahambele kakuhle. Kodwa uYehova zange awancame. Wayesoloko ethumela abaprofeti bakhe ukuze bakhuthaze abantu bakhe ukuba baguquke baze babuyele kuye.​—Funda oo-2 Kumkani 17:​13, 14.

6. UYehova wabafundisa njani abantu bakhe indlela ekubaluleke ngayo ukuguquka esebenzisa abaprofeti? (Jonga nomfanekiso.)

⁶ UYehova wayedla ngokusebenzisa abaprofeti ukuba alumkise aze alungise abantu bakhe. Ngokomzekelo, esebenzisa uYeremiya, wathi: “Yhini Sirayeli ondijikeleyo, buya . . . Andizukukujonga ndinomsindo, kuba ndithembekile . . . Andizukuhlala ndicaphukile. Wena nje vuma ukuba unetyala, kuba uye wamjikela uYehova.” (Yer. 3:​12, 13) Waphinda waphemfulela umprofeti uYoweli ukuba athi: “Buyelani kum ngeentliziyo zenu zonke.” (Yow. 2:​12, 13) Wayalela nomprofeti uIsaya ukuba athi: “Zicoceni. Yekani izinto ezimbi enizenzayo phambi kwam. Yekani ukwenza izinto ezingalunganga.” (Isa. 1:​16-19) Esebenzisa uHezekile, uYehova wabuza: “Kuyandivuyisa na mna ukufa komenzi-bubi? . . . Andinqweneli na ukuba ashiye iindlela zakhe aze ahlale ephila? Akundivuyisi ukufa komntu, . . . ngoko guqukani nize niphile.” (Hez. 18:​23, 32) UYehova uyavuya xa ebona abantu beguquka, kuba ufuna baphile ngonaphakade! Ngoko uYehova akabalindi baqale baguquke abantu ngaphambi kokuba abancede. Makhe sibone eminye imizekelo yaloo nto.

7. UYehova wayisebenzisa njani into eyenzeka kumprofeti uHoseya nenkosikazi yakhe ukuze afundise abantu bakhe?

⁷ Phawula into uYehova awayifundisa abantu bakhe esebenzisa umzekelo ophilayo kaGomere, inkosikazi yomprofeti uHoseya. Emva kokuba ekrexezile, wamshiya uHoseya waza wathandana namanye amadoda. Ngaba wayengasoze atshintshe? UYehova, obona into esentliziyweni yethu, wathi kuHoseya: “Phinda umthande umfazi othandwa yenye indoda nokrexezayo, njengokuba uYehova ewathanda amaSirayeli ngoxa esiya kwabanye oothixo.” (Hos. 3:1; IMize. 16:2) Inkosikazi kaHoseya le yayingekayeki ukwenza isono esinzulu. Kodwa uYehova wathi kuHoseya makayixolele aze abuyelane nayo.a Ngendlela efanayo, uYehova wayengabancamanga abantu bakhe abanenkani. Nangona babesenza izono ezinzulu, wayesabathanda ibe waqhubeka ezama ukubanceda baguquke, baze bayeke izinto ababezenza. Ngaba le nto ithetha ukuba ngoxa umntu engekayeki ukwenza isono esinzulu, uYehova ‘ohlola iintliziyo’ zethu uza kuzama ukumnceda aguquke? (IMize. 17:3) Makhe sibone.

UYEHOVA UBANCEDA NJANI ABANTU BAGUQUKE?

8. Yintoni awayenzayo uYehova xa wayezama ukunceda uKayin aguquke? (Genesis 4:​3-7) (Jonga nomfanekiso.)

⁸ UKayin wayengunyana wokuqala ka-Adam noEva. Naye wayedla ngokunqwenela ukwenza izinto ezimbi njengabazali bakhe. IBhayibhile xa ithetha ngaye, ithi: “Izenzo zakhe zazingalunganga.” (1 Yoh. 3:12) Inoba yiloo nto uYehova ‘engazange avuyiswe nakancinci nguKayin nangumnikelo wakhe.’ Endaweni yokuba atshintshe izinto ezimbi awayezenza, “uKayin wacaphuka kakhulu, waza waqumba.” Wenza ntoni uYehova? Wathetha naye. (Funda iGenesis 4:​3-7.) UYehova waba nobubele xa wayethetha noKayin. Wamchazela ukuba wayeza kumsikelela xa eguquka. Kodwa ukuba wayengaguquki, wayeza kungena engxakini. Okubuhlungu kukuba uKayin zange ammamele. Zange avume ukuba uYehova amncede aguquke. Ngaba loo nto yenza uYehova wayeka ukuzama ukunceda abanye abantu abamonileyo ukuba baguquke? Kunani khona!

9. UYehova wamnceda njani uDavide ukuze aguquke?

⁹ UYehova wayemthanda kakhulu uKumkani uDavide. Wade wathi ngaye, “Indoda ethandwayo yintliziyo yam.” (IZe. 13:22) Kodwa uDavide wenza izinto ezimbi kakhulu, ezifana nokubulala nokukrexeza. NgokoMthetho owabhalwa nguMoses, wayefanele abulawe. (Lev. 20:10; Num. 35:31) Kodwa uYehova wamenzela ububele.b Wathuma umprofeti uNatan ukuba ayokuthetha noDavide, nangona kwakungekabikho nto ibonisa ukuba uguqukile. UNatan wamenzela umzekelo ukuze amncede abone ukuba izinto awayezenzile zazimbi kakhulu. Loo mzekelo wayifikelela intliziyo kaDavide, watsho waguquka. (2 Sam. 12:​1-14) Kwincwadi yeeNdumiso wabhala ingoma eyayibonisa indlela awayezisola ngayo ngezinto awayezenzile.( INdu. 51, umbhalo osemantla) Loo ngoma iye yathuthuzela abantu abaninzi abaye benza izinto ezimbi yaza yabakhuthaza ukuba baguquke. Isivuyisa nyhani into yokuba uYehova wamthandayo umkhonzi wakhe uDavide, waza wamnceda waguquka.

10. UYehova unomonde kubantu abanesono futhi uyabaxolela. Ikwenza uzive njani loo nto?

¹⁰ Alukho uhlobo lwesono angalucaphukeliyo uYehova. (INdu. 5:​4, 5) Kodwa ngenxa yokuba esithanda, esazi nokuba sonke siyona, ufuna ukusinceda singoni. Usoloko ezama ukunceda nabona bantu benza izinto ezimbi ukuba baguquke, baze basondele kuye. Kuthuthuzela kakhulu ukwazi loo nto! Xa sicinga ngendlela uYehova anomonde naxolela ngayo, siye sizimisele ukuhlala sithembekile kuye, sikhawuleze siguquke naxa siye samona. Makhe sive ukuba uYesu wabafundisa ntoni abalandeli bakhe ngokuguquka.

UYESU WABAFUNDISA NTONI ABALANDELI BAKHE NGOKUGUQUKA?

11-12. UYesu wabafundisa ntoni abantu ngendlela axolela ngayo uTata wakhe? (Jonga ongaphandle.)

¹¹ Ngo-29 C.E., kwakulixesha lokufika kukaMesiya. Kwinqaku elidlulileyo, sifundile ukuba uYehova wasebenzisa uYohane umBhaptizi noYesu Kristu ukuze afundise abantu indlela ekubaluleke ngayo ukuba baguquke.​—Mat. 3:​1, 2; 4:17.

¹² Xa wayelapha emhlabeni, uYesu wafundisa abantu ukuba uTata wakhe usoloko efuna ukusixolela. Wayenza kakuhle loo nto xa wayebalisa ibali lonyana owayelahlekile. Loo nyana, wakhetha ukumka kowabo waza waqalisa ukwenza izinto ezimbi kakhulu. Kodwa waphinda ‘wabuyela ezingqondweni,’ wagoduka. Wenza ntoni utata wakhe? UYesu wathi, uthe lo nyana “esekude, utata wakhe wambona, waba nosizi, wabaleka waya kuye, wamanga waza wamphuza.” Lo nyana wayengalindelanga ukuba utata wakhe uza kumxolela, ngoko wayeza kucela ukuba ngomnye wezicaka zakhe. Kodwa utata wakhe wayefuna nyhani ukumxolela. Wade wambiza nangokuthi “lo nyana wam,” waza waphinda wamamkela. Wathi: “Ebelahlekile, ngoku ufunyenwe.” (Luka 15:​11-32) Xa wayekunye noTata wakhe ezulwini ngaphambi kokuba eze emhlabeni, uYesu umele ukuba wambona ebavela ngaloo ndlela abantu abaninzi ababeguqukile. Eli bali likaYesu lithuthuzela nyhani futhi liyibonisa kakuhle indlela anenceba ngayo uTata wethu, uYehova.

13-14. Yintoni awayifundayo umpostile uPetros ngokuguquka, ibe wabafundisa ntoni abanye ngako? (Jonga nomfanekiso.)

¹³ Umpostile uPetros wafunda into ebalulekileyo kuYesu ngendlela uYehova aye abaxolele ngayo abantu abaye baguquka. Ekubeni zazininzi iimpazamo awayezenza uPetros, noYesu wayesoloko ekulungele ukumxolela. Ngokomzekelo, xa wayeyiphike kathathu iNkosi yakhe, waye watyiwa sisazela. (Mat. 26:​34, 35, 69-75) Kodwa emva kokuba uYesu evusiwe waye wabonakala kuPetros. Kusenokwenzeka ukuba wayeyedwa ke uPetros xa kwakusenzeka loo nto. (Luka 24:​33, 34; 1 Kor. 15:​3-5) UYesu wayesazi ukuba lo mpostile wayeguqukile, efuna nokumqinisekisa ukuba umxolele.

¹⁴ Ekubeni uPetros kwakukhe kwafuneka aguquke aze axolelwe, wayenako ukufundisa abanye abantu ngezo zinto. Emva kwePentekoste, wanikela intetho phambi kwamaYuda angakholwayo, ewacacisela ukuba ngawo awabulala uMesiya. Sekunjalo, wawacenga, esithi: “Guqukani ke ngoko, nijike, ukuze zicinywe izono zenu, nize nihlaziywe nguYehova ngokwakhe.” (IZe. 3:​14, 15, 17, 19) Apha, uPetros wayebonisa ukuba umntu xa eguquka, uyajika, okanye atshintshe indlela yakhe yokucinga neyokwenza izinto, azimisele ukwenza izinto ezivuyisa uThixo. Lo mpostile wabonisa nokuba uYehova wayeza kuzicima izono zabo bantu, zingaphinde zibekho. Emva kwexesha, uPetros waqinisekisa namanye amaKristu, esithi: “UYehova . . . unomonde kuba akafuni kutshabalale nabani na kuni, kodwa angathanda ukuba wonke umntu aguquke.” (2 Pet. 3:9) Kuyasivuyisa ukwazi ukuba uYehova uza kusoloko ekulungele ukusixolela xa siguquka, nokuba senze isono esinzulu.

15-16. (a) Umpostile uPawulos wayeyazelaphi indlela axolela ngayo uThixo? (1 Timoti 1:​12-15) (b) Siza kufunda ntoni kwinqaku elilandelayo?

¹⁵ Zininzi izinto ezimbi awazenzayo uSawule waseTarso. Wayebatshutshisa abalandeli bakaKristu. Inoba amaKristu amaninzi ayemncamile, ecinga ukuba soze aguquke. Kodwa yena uYesu wayengacingi ngaloo ndlela. Yena noTata wakhe babezibona iimpawu ezintle uSawule awayenazo. UYesu wathi: “Le ndoda yiyo endiyikhethileyo.” (IZe. 9:15) Wade wenza nommangaliso ukuze ayincede iguquke. (IZe. 7:58–8:3; 9:​1-9, 17-20) Emva kokuba ngumKristu, uSawule, owaye wabizwa ngokuba ngumpostile uPawulos, wayedla ngokutsho ukuba uyabuxabisa ububele nenceba awayenzelwayo. (Funda u-1 Timoti 1:​12-15.) Wathi kubazalwana bakhe: “Ngobubele bakhe, uThixo uzama ukunceda [nina niguquke].”​—Roma 2:4.

¹⁶ UPawulos waye weva ngengxaki eyayikhona kwibandla laseKorinte yendoda eyayiziphethe kakubi ngesondo. Wayilungisa njani? Ngokusibonisa indlela uYehova abaqeqesha ngayo abantu abathandayo, nendlela ekubaluleke ngayo ukuba nenceba. Kwinqaku elilandelayo, siza kufunda ngento eyenzekayo kwibandla laseKorinte.