Kwiminyaka Elikhulu Edluleyo Ngowe-1913

IMboniselo kaJanuwari 1, 1913, yachaza indlela abavakalelwa ngayo abantu abaninzi xa yacaphula la mazwi kaHerbert Kaufman oyintatheli yaseMerika: “Ibinzana elithi ‘ayinakwenzeka’ liphelelwe lixesha . . . Phantse zonke izinto ezazikade ziliphupha nje ziyenziwa namhlanje.” Unyaka wowe-1913 yayingunyaka apho abantu babenethemba lekamva eliqaqambileyo.

Enye into eyabangela oku, yayikukuhambela phambili kwezobugcisa. Ngokomzekelo, eUnited States, iFord Motor Company yavula umzi-mveliso omtsha eHighland Park, eMichigan. Ngesiquphe nje, ixabiso leemoto lehla, zaza izigidi zabantu zafumana ithuba lokuzithenga. Lehliswa yintoni ixabiso lazo? Lo mzi-mveliso mtsha wawunomatshini wokudibanisa imoto. Lo matshini wabangela ukuba inkampani yakwaFord ikwazi ukuvelisa uhlobo lwemoto oluthandwayo ekuthiwa yiModel T ngexesha elifutshane kunangaphambili, nto leyo eyehlisa ixabiso.

Nabantu bakaThixo babenethemba, kodwa ngenxa yezizathu ezingafaniyo. Kwakudala, aBafundi beBhayibhile babelindele lukhulu kunyaka wowe-1914. Inzondelelo yabo kumsebenzi wokushumayela yabonisa ukuba abazi kuyekelela njengoko lo nyaka usondela.

NgoJuni 1913, uthotho lweendibano lwaqalisa ngeyosuku olunye eKansas City, eMissouri, eUnited States. Kwiiveki ezine ezilandelayo, kwaqeshwa uloliwe oza kusa abazalwana noodade abangaphezu kwama-200 kwintshona yeUnited States naseKhanada. Kwindibano nganye, ababekho banikwa ithuba lokufuna inkcazelo engakumbi. Uninzi lwabantu lwakwenza oku, yaye abanomdla baphinda badibana naBafundi beBhayibhile.

Ebudeni bowe-1913, abazalwana abasebenza kwikomkhulu eBrooklyn babexakekile besenza i-“Photo-Drama of Creation.” Le yayiyinkqubo ethatha iiyure ezisibhozo yeentetho zeBhayibhile nomculo orekhodiweyo kunye nemifanekiso eshukumayo. ABafundi beBhayibhile babenethemba lokuba le “Photo-Drama” yayiza kufikelela izigidi zabantu abanomdla. Nangona ngelo xesha kwakukho abavakalisi beendaba ezilungileyo abangama-5 100 kuphela, injongo yabo yayikukuba “idlalwe ehlabathini lonke kangangoko kunokwenzeka.”

Yintoni eyayiza kwenzeka ngowe-1914? Abantu babeza kusabela njani kwi-“Photo-Drama”? Yintoni eyayiza kwenzeka ngasekupheleni kwaloo nyaka, ekupheleni kwamaxesha eeNtlanga? ABafundi beBhayibhile babekhangele phambili ekufumaneni iimpendulo zale mibuzo, beqinisekile ukuba baza kuxhaswa nguYehova.

IMfazwe Enkulu, kamva eyabizwa ngokuba yiMfazwe Yehlabathi I, yayiza kuwachitha onke amathemba ababenawo abantu. Ukuhambela phambili kwezobugcisa kwakungazi kunceda kwiingxaki ababenazo abantu ngelo xesha. Unyaka olandelayo wawuza kuza neenguqu ezininzi kuBafundi beBhayibhile—kanti nasehlabathini lonke.