IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • g99 5/8 iphe. 13-15
  • Kutheni Ndikhathazeka Kangaka Ngokuba Ndityebile?

No video available for this selection.

Sorry, there was an error loading the video.

  • Kutheni Ndikhathazeka Kangaka Ngokuba Ndityebile?
  • Vukani!—1999
  • Imixholwana
  • Amanqaku Afanayo
  • Ukubulawa Yindlala
  • Isibetho Esiyimfihlelo
  • Iingozi Zempilo
  • Iinkcukacha Nobungozi—Beanorexia Nebulimia
    Vukani!—1999
  • Ngaba Ndinengxaki Kwindlela Enditya Ngayo?
    Vukani!—2006
  • Kuthekani Ukuba Ndiyayicaphukela Inkangeleko Yam?
    Imibuzo Yabantu Abaselula—Iimpendulo Eziluncedo, Umqulu 2
  • Ndingakoyisa Njani Ukuzikhathaza Kakhulu Ngokutyeba?
    Vukani!—1999
Khangela Okunye
Vukani!—1999
g99 5/8 iphe. 13-15

Abantu Abaselula Bayabuza . . .

Kutheni Ndikhathazeka Kangaka Ngokuba Ndityebile?

“Ndisuke ndadideka. Ikho le ngqondo ithi manditye, kodwa enye iyala ngelithi ndiza kuba sisidudla.”—UJaimee.

YINTONI oyixhalabele kakhulu kunayo nayiphi na enye into? Ngaphandle kwamathandabuzo, amantombazana amaninzi ebeya kuphendula ngokuthi: kukutyeba. Enyanisweni, olunye uhlolisiso lubonisa ukuba amabhinqa aselula anamhlanje oyika kakhulu ukutyeba kunemfazwe yenyukliya, umhlaza okanye kwanokufelwa ngumzali!

Maxa wambi ukuba nexhala ngokutyeba kukabani kuqala ubani eselula kakhulu. UGqr. Catherine Steiner-Adair uthi kwanangaphambi kokuba abe kwishumi elivisayo, amantombazana amaninzi ayahlanganisana aze “athethe ngokutyeba”—kwezo ncoko avakalisa ukungayithandi imizimba yawo. Ngokucacileyo, le asiyoncoko nje kuphela. Kuhlolisiso lwamantombazana angama-2 379, angama-40 ekhulwini azama ukuncipha. Yaye lawo ahlolisiswayo ayeneminyaka esithoba nelishumi kuphela ubudala!

Ekuhambeni kwexesha, uninzi lwaba bantu basebatsha lusenokurhintyeleka kwizimbo zokunciphisa umzimba. Okubi nangakumbi kukuba, abanye banokuphela benjengoJenna oneminyaka engama-20 ubudala. Kubude beemitha ezisisi-1,6, eli bhinqa liselula linobunzima obuziikhilogram ezingama-40! UJenna uthi: “Andifuni kutya. Eyona nto ndiyixhalabeleyo kukuba ndichithe iminyaka emithathu ndizama ukunciphisa umzimba wam, yaye ukuba ndiyatya ndiza kuphinde ndityebe kwakhona kwinyanga nje enye.”

Mhlawumbi uyayiqonda indlela uJenna avakalelwa ngayo. Kusenokwenzeka ukuba nawe ubusoloko ufuna ukuncipha ukuze ukhangeleke umhle. Ngokuqinisekileyo, akunto iphosakeleyo ukuxhalabela inkangeleko yakho. Noko ke, kuJenna ukuba nomnqweno wokubhitya kwaphantse kwambulala. Njani?

Ukubulawa Yindlala

UJenna unengxaki yokutya eyingozi ebizwa ngokuba yianorexia nervosa (ukungafuni nokukubona ukutya). Kukwanjalo nangoJaimee, okhankanywe ekuqaleni. Kangangethuba elithile, la mantombazana ebezibulalisa ngendlala, yaye akawodwa. Kuqikelelwa ukuba intombazana enye kwali-100 ineanorexia. Oku kuthetha ukuba izigidi zamabhinqa ziyachaphazeleka—mhlawumbi kwanomntu omaziyo!a

Ubani usenokuqaliswa yianorexia engaqondanga. Intombazana eselula isenokuqalisa ukunciphisa ukutya ekutyayo ngendlela engeyongozi, mhlawumbi ukunciphisa nje iikhilogram ezimbalwa. Noko ke, naxa sele ilufikelela usukelo lwayo ayaneliseki. Ithi yakuzijonga esipilini inikine intloko isithi: “Ndisatyebe kakhulu!” Ngoko igqiba kwelokuba ikhe ithi gabhu ezinye iikhilogram ezimbalwa. Kwakhona ezimbalwa nje kuphela. Kuze kulandele ezinye ezimbalwa. Le nto iqalisa ukuba ngumkhwa, yaye imbewu yeanorexia ihlwayelwe.

Noko ke, asingabo bonke abanciphisa ukutya abakutyayo abaneanorexia. Abanye banesizathu esivakalayo sokuxhalabela ukutyeba, yaye kubo, ukunciphisa iikhilogram ezimbalwa kungaba yingenelo. Kodwa amantombazana amaninzi anembono egqwethekileyo ngeziqu zawo. IFDA Consumer ikufanisa ukuba nomfanekiso ogqwethekileyo ngesiqu nokuzijonga kwisipili kumzi wezinto ezihlekisayo. Eli phephancwadi lithi: “Uzibona utyebile kunokuba unjalo.”

Ngenxa yoko, umntu oneanorexia ukoyika ngeyona ndlela ukutyeba—kwanaxa sele ebhitye engumcinga. Usenokuzinyanzela ukuba enze umthambo ukuze anciphise umzimba aze aye kuzihlola esikalini izihlandlo eziliqela ngosuku ukuqinisekisa ukuba “akabuyeli umva.” Xa esitya, uya kutya nje kancinane. Okanye angatyi kwaphela. UHeather uthi: “Yonke imihla bendisiya esikolweni ndinomphako endiwenzelwe ngumama, yaye phantse yonke imihla bendiwulahla. Kungekudala ndayiqhela into yokungatyi kangangokuba kwanaxa ndandifuna ukutya, ndandingakwazi. Ndandingalambi.”

Ekuqaleni, abantu abaneanorexia njengoHeather bayavuya xa bezibona bencipha. Kodwa ekugqibeleni ukungondleki kuqalisa ukuba nemiphumo. Umntu oneanorexia uqalisa ukuba ngumntu owozelayo nonyabileyo. Akaqhubi kakuhle kumsebenzi wakhe wesikolo. Usenokuyeka ukuya exesheni.b Ekuhambeni kwexesha, ukubetha kwentliziyo noxinzelelo lwegazi lusenokwehla ngendlela eyingozi. Sekunjalo, umntu oneanorexia akaboni nanye ingozi. Enyanisweni, ekuphela kwengozi ayibonayo kukuphinde atyebe—kwanokuba kungekhilogram nje enye.

Noko ke, ianorexia asiyiyo kuphela ingxaki yokutya, ingeyiyo neyona ixhaphakileyo. Ibulimia nervosa (ukutya ngendlela engaqhelekanga) sisibetho esichaphazela amantombazana aphindwe kathathu kunaneanorexia. Kwakhona kukho ingxaki yokuba lidlakudla, enxulumene nebulimia. Makhe siqwalasele ezi zifo.

Isibetho Esiyimfihlelo

“Kutshanje umhlobo wam wavuma ukuba ufihla ukutya aze akutye ngasese. Akugqiba uyazigabhisa. Uthi sele ekwenza oku kangangeminyaka emibini.” Ngala mazwi, oselula obhalela umhlathi wamacebiso kwiphephancwadi elithile uchaza iimpawu eziqhelekileyo zengxaki yokutya eyaziwa ngokuba yibulimia.

Umntu onebulimia uyabhukuxa, okanye aphange. Aze akukhuphe konke oko kutya akutyileyo, ngokufuthi ngokuzigabhisa.c Kuyavunywa ukuba, ingcamango yokukhulula isisu ngale ndlela inokubonakala isonyanyisa. Sekunjalo, unontlalontle uNancy J. Kolodny ubhala esithi: “Okukhona ubhukuxa uphinde ugabhe, kokukhona kuya kusiba lula ngakumbi kuwe. Ekuqaleni uyakwenyanya oku okanye woyike kodwa oko kuphela kamsinya xa uphinda uzinyanzela ukuba uphinde wenze oko kwenziwa ngabantu abane-bulimia.”

Nakuba zahlukile ianorexia nebulimia kuye kwathiwa “zingumgubo wengxowa enye.” Nangona zineempawu ezingafaniyo, zombini ezi ngxaki zibangelwa kukutya ngokungafanelekanga.d Noko ke, ngokungafaniyo neanorexia kulula kakhulu ukuyifihla ibulimia. Ngapha koko, ukubhukuxa kubangela lowo unale ngxaki angalahlekelwa ngumzimba wakhe, yaye ukugabha kumgcina angatyebi. Ngoko, umntu onebulimia ukhangeleka engatyebanga okanye engabhityanga, yaye xa ephambi kwabantu usenokubonakala esitya ngendlela eqhelekileyo. Ibhinqa elibizwa ngokuba nguLindsey lithi: “Kangangeminyaka esithoba ndandibhukuxa ndiphinde ndigabhe kangangezihlandlo ezine nezihlanu ngosuku. . . . Akukho namnye owayesazi ukuba ndine-bulimia, kuba ndandiyifihle kakuhle ngokuthi ndibe ngumntu ofanelekileyo, owonwabileyo nonomzimba nje oqhelekileyo omhle.”

Noko ke, kwahlukile kumntu olidlakudla. Njengomntu onebulimia, lo mntu uya kutya ukutya okuninzi sihlandlo ngasinye. IThe New Teenage Body Book ithi: “Ekubeni umntu ebhukuxa ngaphandle kokugabha, ubunzima bomntu olidlakudla busenokwanda kancinane ade atyebe kakhulu.”

Iingozi Zempilo

Zonke ezi ngxaki zokutya zisenokuyisongela ngokuyingozi impilo kabani. Ianorexia isenokwenza ubani angondleki ngeyona ndlela, yaye kwiimeko ezininzi—abanye baqikelela ukuba ukusa kwi-15 ekhulwini—isenokubulala. Ukubhukuxa, enoba kulandelwa ngokugabha okanye akunjalo, kuyingozi kwimpilo. Ekuhambeni kwexesha, ukutyeba kusenokukhokelela kwizifo eziyingozi zentliziyo, isifo seswekile, kwaneentlobo ezithile zomhlaza. Ukuzigabhisa kusenokugqabhuza ummizo, yaye ukuzisebenzisa kakubi izinto zokuhambisa nezokucoca isinyi kusenokude kuyibangele ime intliziyo.

Noko ke, kukho enye into ngengxaki yokutya efanele iqwalaselwe. Abo banengxaki yeanorexia, ibulimia, nokuba lidlakudla ngokuqhelekileyo abonwabanga. Badla ngokungazihloniphi kangako yaye basoloko bexhalabile baze badandatheke. Licacile elokuba, bafuna uncedo. Kodwa banokuncedwa njani abo banengxaki yokutya ukuba bangazixhalabisi ngokutyeba? Lo mbuzo uza kuqwalaselwa kwinqaku elilandelayo kolu ngcelele.

[Imibhalo esemazantsi]

a Ianorexia ikwachaphazela namadoda. Noko ke, ekubeni inkoliso yabantu abaneanorexia ingamantombazana, siza kubhekisela kumantombazana xa sithetha ngabo banale ngxaki.

b Ngokwezamayeza, ibhinqa lifunyaniswa lineanorexia xa ubunzima balo buhle ubuncinane nge-15 ekhulwini kumlinganiselo oqhelekileyo yaye lingakhange liye exesheni kangangeenyanga ezintathu okanye ezingaphezulu.

c Ezinye iindlela zokukhulula isisu ziquka ukusebenzisa izinto zokuhambisa okanye ezokucoca isinyi.

d Iqela labantu abanale ngxaki bayatshintshatshintsha ekubeni babe neanorexia baze babe nebulimia.

[Ibhokisi ekwiphepha 14]

Ukuba Nembono Egqwethekileyo Ngomzimba

Inkoliso yamantombazana axhalabele ukutyeba ayinasizathu sokwenjenjalo. Kolunye uhlolisiso, amantombazana angama-58 ekhulwini aphakathi kweminyaka esisi-⁠5 neli-17 ubudala akholelwa ukuba atyebile, ngoxa enyanisweni, kuphela ingali-17 ekhulwini anjalo. Kolunye uhlolisiso, angama-45 ekhulwini kumabhinqa awayebhitye kakhulu ayecinga ukuba atyebe kakhulu! Kuhlolisiso olwenziwa eKhanada kwafunyaniswa ukuba angama-70 ekhulwini kumabhinqa akwelo lizwe axhalabele ukutyeba, yaye angama-40 ekhulwini atya ngendlela ewenza abhitye aphinde atyebe.

Licacile elokuba, ukuba nembono egqwethekileyo ngemizimba yawo kusenokuwabangela amanye amantombazana azixhalabise ngokugqithiseleyo ngengxaki engekhoyo. UKristin oneminyaka eli-16 ubudala uthi: “Ndinomhlobo otya iipilisi zokunciphisa umzimba kwaye ndazi amantombazana aliqela ane-anorexia.” Wongezelela esithi: “Akukho nenye kuwo etyebe nakancinane.”

Ngesizathu esivakalayo, iphephancwadi iFDA Consumer licebisa ngelithi: “Kunokuba unciphise ukutya okutyayo ngenxa yokuba ‘wonke ubani’ esenjenjalo okanye ngenxa yokuba akunciphanga ngendlela ofuna ngayo, okokuqala fumanisa kugqirha okanye kwingcali yokutya enoba utyebe kakhulu kusini na kunobudala okanye ubude bakho.”

[Umfanekiso okwiphepha 15]

Abantu abaninzi abaxhalatyiswa kukutyeba abanasizathu sokwenjenjalo

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share