Abantu Abaselula Bayabuza . . .
Ndingakoyisa Njani Ukuzikhathaza Kakhulu Ngokutyeba?
“Eyona mbambano inkulu ebomini bam ikukungaqiniseki enoba ndiyifake okanye ndingayifaki kusini na imayonezi kwisonka sam. Ndingayinikela njani ingqalelo kwezinye izinto xa ndikhathazeke kangaka yimayonezi? Ndithini bethu? Mandingayifaki imayonezi—inee-“kilojoules” ezininzi. I-“anorexia” iyaphumelela kwakhona. Ndoyisiwe.”—UJaimee.
IINGXAKI zokutya zibandezela izigidi zolutsha.a Inkoliso ayizange iqalise inenjongo yokuzibulala ngendlala (anorexia) okanye yokubhukuxa ize igabhe (bulimia). Ngokwahlukileyo koko, abaninzi baqalisa ngosukelo nje olulula lokufuna ukunciphisa umzimba ngeekhilogram nje ezimbalwa. Noko ke, bengaqondanga, bazibona sebekumgibe wokuzibulala ngendlala okanye wokubhukuxa baze bagabhe. UJaimee uthi: “Ndaqalisa ukunciphisa ukutya ukuze ndilawule ubunzima bomzimba wam, kodwa ngoku kona kulawula mna.”
Ukuba ufumanisa ukuba ukhathazeka gqitha kukutya kwanoko kukwenzayo kumzimba wakho, yintoni onokuyenza? Okokuqala, qonda ukuba uninzi lolunye ulutsha luye lwalwa nengxaki yokutya yaye luye lwaphumelela! Kodwa njani?
Ukuzijonga Esipilini
Elona nyathelo likhulu ukuze uphumelele ekulweni nengxaki yokutya kukuyamkela inkangeleko yakho. Incwadi ethi Changing Bodies, Changing Lives ithi: “Inkoliso yabantu abanengxaki yokutya banembono egqwethekileyo ngeziqu zabo. Abayijongi ngendlela esengqiqweni imizimba yaye bazigxeka kakhulu, ingakumbi inkangeleko yabo.”
Eneneni, abanye abakwishumi elivisayo basekela imbono yabo ngeziqu zabo ngokumila kwemizimba yabo; nasiphi na isiphako sijongwa njengentlekele. UVicki oneminyaka eli-17 ubudala uthi: “Andinakuyithwala indlela endityebe ngayo. Isinqe sam sikhulu kangangokuba andikwazi nokunxiba nantoni na ndize ndiyifake kakuhle ngaphakathi.” Kwanasemva kokuhla ngeekhilogram ezili-10, uVicki wayenganelisekanga. Wayengavumi ukutya okanye wayebhukuxa aze akugabhe oko akutyileyo.
Ngokuqinisekileyo akunto iphosakeleyo ukuyixhalabela ukusa kumkhamo othile indlela okhangeleka ngayo. Ngokuphathelele oku, kubangela umdla ukwazi ukuba iBhayibhile ithetha kakuhle ngokumila komzimba nangenkangeleko yamabhinqa namadoda aliqela kuquka uSara, uRakeli, uYosefu, uDavide noAbhigali.b IBhayibhile ikwathi umongikazi kaDavide uAbhishagi ‘wayeyinzwakazi encamisileyo.’—1 Kumkani 1:4.
Ukuchaza Ubuhle Bokwenyaniso
Sekunjalo, iBhayibhile ayigxininisi ngokuyintloko kwinkangelo yokomzimba okanye ukumila komzimba kabani. Kunoko, incoma “umntu ofihlakeleyo wentliziyo.” (1 Petros 3:4) Ngumntu wangaphakathi owenza umntu abe nomtsalane okanye acekiseke emehlweni kaThixo okanye abantu.—IMizekeliso 11:20, 22.
Khawucinge ngonyana kaDavide uAbhisalom. IBhayibhile ithi: “KumaSirayeli onke bekungekho ndoda injengoAbhisalom ukuba yinzwana, ngokokuze adunyiswe kunene; kwathabathela entendeni yonyawo kwesa elukakayini phezulu, kungekho siphako kuye.” (2 Samuweli 14:25) Sekunjalo, lo mfana uselula wayenenkohliso. Ukuba nekratshi namabhongo kwamphembelela ukuba azame ukubhukuqa ukumkani omiselwe nguYehova. Ngoko ke, iBhayibhile ayithethi kakuhle ngoAbhisalom kodwa imchaza njengendoda enganyanisekanga kakubi nenentiyo.
Ubuhle bokwenyaniso bomntu, okanye ubunzwana, abuxhomekekanga kwindlela umzimba omile ngayo. Ngesizathu esihle, iBhayibhile ithi: “Rhweba ubulumko, ngako konke ukurhweba kwakho urhwebe ingqondo. Boyinika intloko yakho isangqawe esihle, bokupha isithsaba sokuhomba.”—IMizekeliso 4:7, 9.
Noko ke, liyinyaniso elokuba, ngokufuthi iingxaki zokutya ziphenjelelwa yinto engaphaya kunokunganeliseki ngenkangeleko kabani. Enye incwadi ithi: “Abantu abazikhathaza gqitha ngokutya baze bawele kumgibe wengxaki yokutya njenge-anorexia nervosa, i-bulimia nokuba lidlakudla, ngokuqhelekileyo abazixabisi—bazibona bengoongantweni kwaye bavakalelwa kukuba nabanye ababaxabisi.”
Kukho izinto eziliqela ezinokubangela ubani angazixabisi. Ngokomzekelo, xa ufikisa usenokungaqiniseki ngezinto ezithile—ingakumbi xa uye wakhula ngokukhawuleza ngaphambi koontanga bakho. Kwakhona, olunye ulutsha lukhulele kumakhaya apho kuhlala kukho iingxwabangxwaba, mhlawumbi luxhatshazwa emzimbeni nangokwesini. Enoba uyintoni na unobangela, ngokuqhelekileyo ukuze ubani achache kuya kufuneka kuqondwe unobangela wokungazixabisi. Oku kuthetha ukuzixabisa njengomntu. Ngokuqinisekileyo, wonke umntu ubuncinane uneempawu ezintle. (Thelekisa eyoku-1 kwabaseKorinte 12:14-18.) Liyinyaniso elokuba, kusenokwenzeka ukuba akuziboni kuwe, kodwa umhlobo oqolileyo unokukwazi ukukuxelela zona.
Kodwa kuthekani ukuba kufuneka unciphise amanqatha ngenxa yezizathu ezivakalayo zempilo? IBhayibhile icebisa ukuba “sibengcathu ngokwemikhwa.” (1 Timoti 3:11) Ngenxa yoko, kungakuhle ukuphepha ukunciphisa ukutya ngokugqithiseleyo okanye ukuba lixhoba lokunciphisa umzimba ngeendlela ezikhawulezayo. Mhlawumbi eyona ndlela yokunciphisa umzimba kukutya ukutya okusempilweni uze wenze umthambo ngokwaneleyo. Iphephancwadi iFDA Consumer lithi: “Njengayo yonke into, kukho indlela efanelekileyo nengafanelekanga yokunciphisa umzimba. Indlela engafanelekanga kukungatyi ngamaxesha athile okutya, ukungafuni nanye into ngaphandle kokutya isonka nokusela amanzi neepilisi zokunciphisa umzimba, okanye ukuzigabhisa.”
Amandla Okuzityand’ Igila Kothile
Unontlalo-ntle uNancy Kolodny ufanisa ingxaki yokutya “nokungena wedwa kwindawo edidayo eneepaseji ezininzi, ngaphandle kwemaphu okanye ikhampasi, ungaqinisekanga ngendlela yokuphuma, yaye ungaqinisekanga enoba uza kuyifumana nini indlela yokuphuma okanye uza kuyifumana. . . . Okukhona uhleli ixesha elide kuloo ndawo kokukhona uye udideka yaye unxunguphala njengoko uzama ukuphuma.” Ngoko ke, ukuba uneempawu zeanorexia okanye ibulimia, ufanele ufumane uncedo. Akunako ukuziphumela wedwa kwezo ‘paseji zididayo nezininzi.’ Ngoko zityand’ igila kumzali okanye komnye umntu omdala omthembileyo. Umzekeliso weBhayibhile uthi: “Umhlobo uthanda ngamaxesha onke; umzalwana uzalelwe imbandezelo.”—IMizekeliso 17:17.
AmaNgqina kaYehova amaninzi aye afumana amaqabane athembeke ngolo hlobo phakathi kwabadala kwibandla lamaKristu. Kakade ke, abadala abangabo oogqirha, yaye uncedo lwabo aluyi kuthabathel’ indawo uncedo lwamayeza. Noko ke, abaveleli abangamaKristu abasokuze bazivingce iindlebe zabo “ekukhaleni kwesisweli,” yaye isiluleko nomthandazo wabo usenokunceda ukuba “aphile lowo ungaphilanga” ngokomoya.—IMizekeliso 21:13; Yakobi 5:13-15.
Ukuba uziva ungakhululekanga ukuzityand’ igila kothile ngokuthetha naye ubuso ngobuso, bhala ileta uze ucele impendulo. Into ebalulekileyo kukuxelela othile ngale nto. UNancy Kolodny ubhala esithi: “Ngokuvuma ukuba ngoku akunakuyihamba wedwa le ndlela, uyazibophelela kwisivumelwano sokuncedwa ngomnye umntu ukususela ngoku.” Wongezelela ngelithi: “Kusenokuba nzima ukuthabatha nokucinga ngala manyathelo, kodwa afanelekile, kuba aya kukubeka endleleni efanelekileyo yokuphuma kwindawo edidayo eneepaseji ezininzi.”
Ulutsha olungamaKristu lunomnye umthombo wamandla—umthandazo. Ukuthandaza kuThixo asikokuziqhatha nje ingqondo. Yinto yokwenene yaye lunxibelelwano olubalulekileyo noMdali, okuqonda bhetele kunokuba wena uziqonda! (1 Yohane 3:19, 20) Ngenxa yoko, ngoxa lingekafiki ixesha likaYehova lokuphelisa zonke izigulo, uThixo wethu onothando unokukhokela amanyathelo akho ukuze ungashukunyiswa. (INdumiso 55:22) Ngokusuka kumava akhe, umdumisi uDavide wabhala: “Ndamfuna uYehova, wandiphendula; wandihlangula kwiinto zonke endinxunguphala zizo. Usizana lwadanduluka, wava uYehova, walusindisa ezimbandezelweni zalo zonke.”—INdumiso 34:4, 6.
Ngoko, nanini na, phalazela uYehova uThixo isifuba sakho sonke. Umpostile uPetros wabhala: ‘Phosani lonke ixhala lenu kuye, ngenxa yokuba unikhathalele.’ (1 Petros 5:7) Ukuze uqonde ububele bothando bukaYehova, kutheni ungafundi ngenyameko INdumiso 34, 77, 86, 103 neye-139? Ukucamngca ngezi ndumiso kuya kukuqinisa kwinkolelo yakho yokuba uYehova unyanisekile kwaye ufuna uphumelele. Ngokufunda iLizwi lakhe, uya kuvakalelwa ngendlela efanayo noDavide, owabhala: “Nanini na ndinexhala yaye ndikhathazekile, uyandithuthuzela uze undiyolise.”—INdumiso 94:19, Today’s English Version.
Yiba Nomonde—Ukuchacha Kuthabatha Ixesha
Inkoliso yabo bafumana uncedo ngengxaki yokutya abachachi ngephanyazo. Cinga ngoJaimee, okhankanywe ekuqaleni. Kwanasemva kokuba efumene uncedo, wakufumanisa kunzima ukutya kwanento encinane efana nesitya sesidudu. Uthi: “Ndifanele ndizixelele ukuba oku kuluncedo, yaye kufuneka nditye ukuze ndiphile. Cephe ngalinye endilityayo ngathi ziikhilogram ezininzi.”
Nangona ngasihlandlo sithile uJaimee waphantse wafa, wakoyisa ukuzikhathaza gqitha ngokutya. Wathi: “Andizukufa. Ndiza kulwa noku ndize ndiphumelele. Ndiza kuyoyisa ianorexia. Kuza kuba nzima, kodwa ndim nayo.” Nawe unako!
[Imibhalo esemazantsi]
a Bona uVukani! kaMeyi 8, 1999, kwiphepha 13-15.
[Umfanekiso okwiphepha 15]
Ukutya okusempilweni nokwenza umthambo owaneleyo kunokukunceda ulawule ubunzima bomzimba wakho