“Yonke Into Yenzeleni Ukuzukisa UThixo”

NJENGABAKHONZI bakaThixo abazinikele kuye, simele sibonise indlela uYehova azuke ngayo kuyo yonke into esiyenzayo nesiyithethayo. Umpostile uPawulos wachaza umgaqo okhokelayo xa wathi: “Kungakhathaliseki ukuba niyatya, niyasela okanye nenza nantoni na, yonke into yenzeleni ukuzukisa uThixo.” (1 Kor. 10:31) Oku kubandakanya ukunamathela kwimilinganiselo kaYehova yobulungisa, ebonisa ubuntu bakhe obugqibeleleyo. (Kol. 3:10) Simele silinganise uThixo, njengabantu abangcwele.​—Efe. 5:1, 2.

² Echazela amaKristu ngemfuneko yokwenza oku, umpostile uPetros wabhala: “Njengabantwana abathobelayo, yekani ukulawulwa yiminqweno enanikade ninayo ngokuya naningazi, kodwa yibani ngcwele kuyo yonke into eniyenzayo njengaLowo Ungcwele wanibizayo, kuba kubhaliwe kwathiwa: ‘Nimele nibe ngcwele, kuba nam ndingcwele.’” (1 Pet. 1:14-16) NjengoSirayeli wakudala, bonke abantu kwibandla lamaKristu bafanele bahlale bengcwele. Oku kuthetha ukuba bamele bahlale bengenasiphako, bangazingcolisi ngesono nangokuthanda ihlabathi. Ngaloo ndlela bazinikela ekukhonzeni uYehova.​—Eks. 20:5.

³ Umntu uhlala engcwele ngokuthobela imithetho nemigaqo kaYehova, echazwe kakuhle kwiZibhalo Ezingcwele. (2 Tim. 3:16) Ekufundeni kwethu iBhayibhile, siye safundiswa ngoYehova nangeendlela zakhe, kwaye siye satsaleleka kuye. Ukufunda kwethu iBhayibhile kusenze saqiniseka ukuba kufuneka sifune kuqala uBukumkani BukaThixo size senze ukuthanda kukaYehova kube yinto ephambili ebomini bethu. (Mat. 6:33; Roma 12:2) Oku kukwathetha ukuba sifanele sinxibe ubuntu obutsha.​—Efe. 4:22-24.

UKUKHONZA NGENDLELA ECOCEKILEYO

⁴ Akusoloko kulula ukunamathela kwimilinganiselo kaYehova yobulungisa. Utshaba lwethu, uSathana uMtyholi, lufuna ukusikhupha ecaleni kwindlela yenyaniso. Iimpembelelo ezingendawo zehlabathi kunye nokutyekela kwethu esonweni, kwenza izinto zibe nzima ngamanye amaxesha. Ukuzinikela kwethu kuThixo kufuna silulwele ukholo lwethu. IZibhalo zisixelela ukuba singothuki xa sichaswa okanye silingwa. Siza kubandezeleka ngenxa yobulungisa. (2 Tim. 3:12) Sinokuvuya xa silingwa, sisazi ukuba ezo zilingo zingqina ukuba senza ukuthanda kukaThixo.​—1 Pet. 3:14-16; 4:12, 14-16.

⁵ Nangona uYesu wayefezekile, wafunda ukuthobeka ngeembandezelo awazifumanayo. Akazange nanini na anikezele kwizilingo zikaSathana okanye abe namabhongo. (Mat. 4:1-11; Yoh. 6:15) UYesu akazange acinge nokucinga ngokungamthobeli uThixo. Nangona ukuthembeka kwakhe kwamenza wacatshukelwa lihlabathi, wayesoloko enamathela kwimilinganiselo kaYehova yobulungisa. Ngaphambi nje kokuba afe, walumkisa abafundi bakhe ukuba nabo babeza kucatshukelwa lihlabathi. Ukususela ngelo xesha, abalandeli bakhe baye babandezeleka, kodwa baba nesibindi ngenxa yokwazi ukuba uNyana KaThixo waloyisa ihlabathi.​—Yoh. 15:19; 16:33; 17:16.

⁶ Ukuze siloyise ihlabathi, kufuneka sinamathele kwimilinganiselo kaYehova yobulungisa, njengoko yenzayo iNkosi yethu. Ukongezelela ekuphepheni ukungena kwimicimbi yepolitiki neyentlalo yeli hlabathi, simele siyixhathise imilinganiselo yalo yokuziphatha ephantsi. Sisithobela ngokupheleleyo isiluleko esikuYakobi 1:21, esithi: “Yahlukanani nemikhwa emibi nayo nantoni na engalunganga, nize ngokuthobeka nimvumele uThixo afake ilizwi lakhe ezintliziyweni zenu. Lona linamandla okunisindisa.” Ngokufundisisa nangokuya kwiintlanganiso, ‘sifaka ilizwi’ lenyaniso ezingqondweni nasezintliziyweni zethu, ngoko asiyi kufuna nanye into enqwenelekayo yeli hlabathi. Umfundi uYakobi wathi: “Anazi na ukuba ubuhlobo nehlabathi bunenza iintshaba zikaThixo? Nabani na ke ofuna ukuba ngumhlobo wehlabathi uzenza utshaba lukaThixo.” (Yak. 4:4) Ngenxa yoko, iBhayibhile isibongoza ngamandla ukuba sinamathele kwimilinganiselo yobulungisa kaYehova size sihlale sahlukile kwihlabathi.

⁷ ILizwi LikaThixo liyasilumkisa ukuba singenzi izinto ezilihlazo yaye singaziphathi kakubi. Lithi: “Ukuziphatha kakubi ngesondo nako konke ukungcola okanye ukunyoluka makungathethwa nokuthethwa ngako phakathi kwenu, kanye njengokuba kubafaneleyo abantu abangcwele.” (Efe. 5:3) Ngoko simele singazivumeli iingqondo zethu ukuba zihlale zicinga amanyala, izinto ezilihlazo, okanye ezithoba isidima, kwaye asifanele sithethe nokuthetha ngezinto ezinjalo. Ngaloo ndlela sibonisa ukuba sifuna ukubambelela kwimilinganiselo kaYehova yokuziphatha ecocekileyo neyobulungisa.

UKUCOCEKA EMZIMBENI

⁸ Ukongezelela ekukhonzeni ngendlela ecocekileyo, amaKristu ayakuqonda ukubaluleka kokucoceka emizimbeni. KumaSirayeli akudala, uThixo ongcwele wayefuna ukuba inkampu igcinwe icocekile. Nathi simele sicoceke ukuze uYehova ‘angaboni nto engafanelekanga kuthi.’​—Dut. 23:14.

⁹ Ubungcwele nokucoceka emzimbeni kuhamba kunye eBhayibhileni. Ngokomzekelo, uPawulos wathi: ‘Bazalwana abathandekayo, masicoce imizimba yethu neengqondo zethu, ukuze siye sisiba ngcwele njengoko sisoyika uThixo.’ (2 Kor. 7:1) Ngoko, amaKristu okwenyaniso afanele azimisele ukugcina imizimba yawo icocekile ngokuhlamba iimpahla nemizimba yawo qho. Ngoxa iimeko zisenokwahluka kumazwe ngamazwe, okungenani isepha namanzi zidla ngokufumaneka ukuze sigcine imizimba yethu icocekile kwaye siqiniseke ukuba nabantwana bethu bacocekile.

¹⁰ Ngenxa yomsebenzi wethu wokushumayela, siyaziwa ngabantu abaninzi kwindawo esihlala kuyo. Ukugcina amakhaya ethu elungiswe kakuhle, ecocekile kwaye ebukeka, ngaphakathi nangaphandle, kuyashumayela kubamelwane bethu. Yonke intsapho inokuncedisana. Abazalwana bafanele bawahoye amakhaya abo neendawo eziwajikelezileyo, besazi ukuba iyadi ecocekileyo nekhaya elihoyiweyo ziyashumayela ebantwini. Xa beyenza loo nto baze bomeleze ukholo lweentsapho zabo, babonisa ukuba baziintloko-ntsapho ezikhokela kakuhle. (1 Tim. 3:4, 12) Oodade banembopheleleko nabo, ngokukodwa ngaphakathi endlini. (Tito 2:4, 5) Abantwana abaqeqeshwe kakuhle baphumeza eyabo indima ekuzigcineni becocekile yaye bebukeka bona namagumbi abo. Ngaloo ndlela intsapho iphela iyasebenzisana ukuze ikwenze umkhwa ukugcina ucoceko oluza kufaneleka kwihlabathi elitsha phantsi koBukumkani BukaThixo.

¹¹ Abakhonzi bakaYehova abaninzi namhlanje basebenzisa iimoto xa besiya kwiintlanganiso. Kwezinye iindawo akunakwenzeka ukuba uye entsimini ngaphandle kwemoto. Ngenxa yoko, imoto ifanele igcinwe icocekile kwaye ilungiswe kakuhle. Amakhaya neemoto zethu zifanele zibonise ukuba siyinxalenye yabantu bakaYehova abacocekileyo nabangcwele. Kunjalo ke nangeebhegi neeBhayibhile zethu esiziphatha entsimini.

¹² Isinxibo sethu nendlela esizilungisa ngayo zifanele zivisisane nemigaqo yobuthixo. Asiyicingi nokuyicinga into yokuvela phambi kwabantu ababalulekileyo sinxibe xazalala okanye ngendlela engenasidima. Kubekele phi ke xa siye kumela uYehova entsimini okanye eqongeni! Indlela esizilungisa nesinxiba ngayo zinokuyiphembelela indlela abanye abalujonga ngayo unqulo lukaYehova. Sifanele sithobeke yaye sibacingele abanye. (Mika 6:8; 1 Kor. 10:31-33; 1 Tim. 2:9, 10) Ngenxa yoko, xa silungiselela ukuya entsimini okanye ukuya ezintlanganisweni nasezindibanweni, sifanele sikhumbule oko iZibhalo zikutshoyo ngococeko lwasemzimbeni nangenkangeleko efanelekileyo. Sifuna ukuzukisa uYehova ngamaxesha onke.

¹³ Kusebenza umgaqo ofanayo naxa sityelele kwikomkhulu lehlabathi okanye iofisi yesebe yamaNgqina KaYehova. Khumbula, igama elithi Bheteli lithetha “Indlu KaThixo.” Ngoko, simele sinxibe size siziphathe ngendlela esenza ngayo xa sisezintlanganisweni kwiHolo YoBukumkani.

¹⁴ Kwanaxa sizikhupha, sifanele siyijonge indlela esinxiba nesizilungisa ngayo. Sisenokuzibuza, ‘Ngaba indlela endinxibe ngayo indenza ndibe neentloni zokushumayela ngokungacwangciswanga?’

INDLELA EFANELEKILEYO YOKUZONWABISA

¹⁵ Kuyafuneka ukuphumla nokuzihlaziya ukuze silungelelane yaye sihlale sisempilweni. Ngenye imini uYesu wabizela abafundi bakhe kwindawo ezolileyo ukuze ‘baphumle kancinci.’ (Marko 6:31) Ukuphumla nokuzihlaziya okanye ukuzonwabisa ngendlela efanelekileyo kunokuba lixesha elimnandi. Linokusihlaziya ukuze sikwazi ukuqhubeka nomsebenzi wethu wemihla ngemihla.

¹⁶ Ekubeni zininzi iindlela zokuzihlaziya ezikhoyo, amaKristu kufuneka akhethe kakuhle aze asebenzise ubulumko bukaThixo kwizinto azenzayo. Ngoxa ukuzihlaziya kunendawo yako, akuyonto iphambili ebomini. Silunyukiswa ukuba “ngemihla yokugqibela,” abantu baza ‘kuthanda ulonwabo kunokuba bathande uThixo.’ (2 Tim. 3:1, 4) Uninzi lwezinto abantu abazihlaziya nabazonwabisa ngazo azamkelekanga kwabo banqwenela ukubambelela kwimilinganiselo yobulungisa kaYehova.

¹⁷ AmaKristu okuqala kwakufuneka axhathise izinto ezingafanelekanga kwihlabathi awayephila kulo elalithanda iziyolo. Kwiisekisi zaseRoma, abantu babezonwabisa ngokubukela abanye abantu besentlungwini. Ezona zinto babesonwatyiswa ngazo abantu kukulwa, ukuphalazwa kwegazi nokuziphatha okubi, kodwa amaKristu okuqala ayehambela kude kwezo zinto. Nanamhlanje, ihlabathi lizonwabisa ngezinto ezifana nezi ezenzelwa ukwanelisa izinto ezifunwa ngabantu ezilihlazo. Kufuneka ‘sihlale siyigadile’ indlela esihamba ngayo, sihambele kude kwiindlela zokuzonwabisa ezonakalisayo. (Efe. 5:15, 16; INdu. 11:5) Kwanaxa ukuzonwabisa ngokwako kusenokuba kwamkelekile, kodwa izinto ezenziwa apho zisenokungamkeleki.​—1 Pet. 4:1-4.

¹⁸ Zikho iindlela zokuzihlaziya nokuzonwabisa eziwafaneleyo amaKristu. Amaninzi aye ancedakala ngokulandela isiluleko seZibhalo namacebiso amahle afumaneka kwiincwadi zethu.

¹⁹ Ngamanye amaxesha, iintsapho eziliqela zisenokumemana ukuze zizonwabise. Okanye abazalwana noodade banokumenyelwa emtshatweni okanye kwelinye itheko. (Yoh. 2:2) Umntu omemileyo umele azi yonke into eyenzekayo. Kucacile ukuba kufuneka uthi qwa xa umeme abantu abaninzi. Ukungahoyi okudla ngokubakho kwezo mbutho kuye kwabangela ukuba abanye bayitsibe imida yokuziphatha ebekelwe amaKristu, batya baza basela ngokugqithiseleyo de benza nezinye izono ezinzulu. Ecinga ngoku, amaKristu aqondayo aye anobulumko bokumema abantu abambalwa kuze kungahlalwa ixesha elide kakhulu. Ukuba kukho utywala, mabusetyenziswe ngendlela efanelekileyo. (Fil. 4:5) Ukuba kwenziwa konke okusemandleni ukuze kuqinisekwe ukuba iimbutho zamaKristu ziyafaneleka kwaye ziyakhuthaza elukholweni, ukutya neziselo azizukuba yeyona nto iphambili.

²⁰ Kuyinto entle ukwenzela abanye ububele. (1 Pet. 4:9) Xa simema amanye amaKristu emakhayeni ethu ukuze afumane isidlo, izimuncumuncu, ukuhlaziyeka, okanye eze kubutha, sifuna ukucinga ngabo basenokuba bahlelelekile. (Luka 14:12-14) Xa simenywe kwezi mbutho, sifanele siziphathe ngendlela echazwe kwisiluleko esikuMarko 12:31. Kuhle ukubuxabisa ngalo lonke ixesha ububele obenzelwayo.

²¹ AmaKristu ayayivuyela intabalala yezipho ezivela kuThixo. Avuyiswa nakukwazi ukuba ‘afanele atye, asele aze onwabe ngenxa yokusebenza kwawo nzima.’ (INtshu. 3:12, 13) Xa ‘yonke into siyenzela ukuzukisa uThixo,’ abaninimzi kwaneendwendwe baza konwaba xa becinga ngendlela abaye bakhuthazwa ngayo kwezi mbutho.

IMICIMBI YESIKOLO

²² Abantwana bamaNgqina KaYehova bayancedakala ngokufumana imfundo esisiseko. Xa besahamba isikolo bancedwa bakwazi ukufunda nokubhala kakuhle. Ezinye izifundo abazifundiswayo zinokubanceda kakhulu bakwazi ukwenza imisebenzi eyenziwayo kwintlangano. Xa besafunda bamele benze umgudu okhethekileyo ‘wokukhumbula uMdali wabo Ozukileyo’ ngokubeka ukukhonza uThixo kwindawo yokuqala.​—INtshu. 12:1.

²³ Ukuba ungumKristu osahamba isikolo, kufuneka ulumke, ungachithi ixesha nolutsha lwehlabathi kunganyanzelekanga. (2 Tim. 3:1, 2) Ekubeni uYehova esilungiselele izinto ezinokusikhusela, zininzi izinto onokuzenza ukuze uphephe impembelelo yehlabathi. (INdu. 23:4; 91:1, 2) Ngoko, ukuze uyiphephe le mpembelelo, wasebenzise amalungiselelo kaYehova.​—INdu. 23:5.

²⁴ Ukuze ahluke ehlabathini ngoxa esesikolweni, amaNgqina aselula aye akhetha ukungazenzi izinto ezingenanto yakwenza nezifundo. Abanye abafundi kunye nootitshala basenokungasiqondi isizathu soko. Kodwa ke, eyona nto ibalulekileyo kukukholisa uThixo. Oku kuthetha ukuba uza kusebenzisa isazela sakho esiqeqeshwe yiBhayibhile uze uzimisele ukuba ungangeneli ukhuphiswano lwehlabathi okanye imicimbi yokuthanda ilizwe. (Gal. 5:19, 26) Xa nisithobela isiluleko esisekelwe kwiZibhalo esivela kubazali abangamaKristu, kwaye ninxulumana nabantu abaqhuba kakuhle ebandleni, niza kutsho nikwazi ukubambelela kwimilinganiselo kaYehova yobulungisa.

IMPANGELO NABAHLOBO

²⁵ Iintloko-ntsapho zinembopheleleko eziyinikwa ziZibhalo yokondla iintsapho zazo. (1 Tim. 5:8) Nangona kunjalo, njengabalungiseleli ziyazi ukuba impangelo iza emva kwezilangazelelo zoBukumkani. (Mat. 6:33; Roma 11:13) Ngenxa yokuzinikela kuThixo nangokwaneliseka kukutya nesinxibo, ziyawaphepha amaxhala nemigibe yokuphila ubomi bokuthanda izinto eziphathekayo.​—1 Tim. 6:6-10.

²⁶ Onke amaKristu azinikele kuThixo aphangelayo afanele acinge ngemigaqo yeZibhalo. Ukusebenza ngokunyaniseka kuthetha ukungavumi ukwenza imisebenzi eyaphula umthetho kaThixo okanye engquzulana nomthetho welizwe. (Roma 13: 1, 2; 1 Kor. 6:9, 10) Sihlala sibuqonda ubungozi bokuba nabahlobo abangalunganga. Njengamajoni kaKristu, siyakuphepha ukungena kumashishini aphula imigaqo kaThixo okanye abeka ubuhlobo bethu noThixo engozini. (Isa. 2:4; 2 Tim. 2:4) Kananjalo asinanto isidibanisa notshaba lukaThixo, “iBhabhiloni Enkulu.”​—ISityhi. 18:2, 4; 2 Kor. 6:14-17.

²⁷ Ukuthobela imilinganiselo kaThixo yobulungisa kuza kusithintela ukuba singasebenzisi ubuzalwana bethu ukuze siqhube amashishini ethu okanye eminye iminqweno yethu engenanto yakwenza noBukumkani. Injongo yokunxulumana kwethu nabanye kwiintlanganiso zebandla nakwiindibano zesiphaluka nezengingqi kukukhonza uYehova. Sizondla ngokutya esikufumana kuye okuqinisa ukholo yaye ‘siyakhuthazana.’ (Roma 1:11, 12; Heb. 10:24, 25) Unxulumano olunjalo lufanele luphelele kwizinto ezisinceda sikhonze uThixo.

UKUHLALA SIMANYENE NJENGAMAKRISTU

²⁸ Imilinganiselo kaYehova yobulungisa ikwafuna ukuba abantu bakhe ‘bahlale bemanyene bencedwa ngumoya oyingcwele, beseluxolweni.’ (Efe. 4:1-3) Kunokuba bafune ukuzanelisa bona, ngamnye ufuna ukwenza okuza kulungela abanye. (1 Tes. 5:15) Ngokuqinisekileyo nawe uye wafumanisa ukuba kunjalo kwibandla lakho. Kungakhathaliseki ukuba sinaliphi ibala, siloluphi uhlanga, sihlala phi, sinemali okanye sifunde kangakanani, sonke silawulwa yimilinganiselo yobulungisa efanayo. Kwanabantu bangaphandle baye balubona olu phawu lubalaseleyo lwabantu bakaYehova.—1 Pet. 2:12.

²⁹ Ebethelela nangakumbi isizathu sokuba simanyane, umpostile uPawulos wathi: “Mnye umzimba, mnye nomoya, njengokuba nabizelwa kwithemba elinye; inye iNkosi, lunye ukholo, lunye ubhaptizo; mnye uThixo noTata wabo bonke abantu, onegunya phezu kwabo bonke, obasebenzisa bonke ukwenza izinto nokubo bonke.” (Efe. 4:4-6) La mazwi agxininisa imfuneko yokuba siziqonde ngendlela efanayo iimfundiso zeBhayibhile ezisisiseko nezinzulu, ngaloo ndlela sibonisa ukuba siyaluqonda ulongamo lukaYehova. Eneneni, uYehova uye wanika abantu bakhe ulwimi olusulungekileyo lwenyaniso olusenza sikhonze simanyene.—Zef. 3:9.

³⁰ Umanyano noxolo lwebandla lamaKristu zingumthombo wokuhlaziyeka kubo bonke akhonza uYehova. Siye sakubona ukuzaliseka kwesithembiso sikaYehova esithi: “Ndiza kubamanyanisa, njengeegusha ebuhlanti.” (Mika 2:12) Sifuna ukulugcina olo manyano ngokuthi sibambelele kwimilinganiselo kaYehova yobulungisa.

³¹ Bayavuya abo baye bamkelwa kwibandla likaYehova elicocekileyo! Ukuze sibizwe ngegama likaYehova sifanele sincame konke esinako. Ekubeni sinobuhlobo obuxabisekileyo noYehova, siza kuzimisela ukubambelela kwimilinganiselo yakhe yobulungisa size sikhuthaze nabanye ukuba benjenjalo.—2 Kor. 3:18.