Ukuba Nesabelo Ngokuphumelelayo Kubulungiseleli Bethu Obusindis’ Ubomi
1 Umpostile uPawulos wayeyenza intshumayelo yakhe yeendaba ezilungileyo ivisisane neemeko ukuze ‘asindise inxenye.’ (1 Kor. 9:19-23) Ngokufanayo, siya kuphumelela ngakumbi kubulungiseleli bethu ukuba sikuphaphele ukuqonda izinto umninimzi anomdla kuzo yaye sikulungele ukuyenza ingxubusho yethu ivisisane neentswelo zakhe. Oku akunakuba nzima xa unikela IMboniselo noVukani! okanye enye yeencwadana ezinemifanekiso zethu.
2 Emva kokuzazisa, usenokuqalisa ngokuthetha ngamazwi akho into enjengale:
◼ “Abantu abaninzi baphelelwe lithemba ngenxa yokuba oorhulumente behlabathi babonakala bengenako ukuzisa izicombululo eziluncedo kwiingxaki zemihla yethu. Bambi bade bababeke ityala oorhulumente ngeengxaki zabo. Ngaba ucinga ukuba unokubakho urhulumente onokuzinyamekela ngokwanelisayo iintswelo zethu? [Vumela impendulo.] Ngaba uyazi ukuba sinedinga elinokuthenjwa lorhulumente oya kuziphelisa ngokuqinisekileyo zonke iingxaki esijamelana nazo?” Yiphulaphule ngenyameko impendulo yomninimzi. Ngokuxhomekeka koko akuthethayo, kulungele ukuguqukela kwenye yeentshumayelo eziliqela ezahlukahlukeneyo.
3 Ukuba kumagqabaza omninimzi ubonakala ezibanga engumKristu, ngoko sinokumbuza enoba uyawenza umthandazo othi “Bawo wethu osezulwini,” okanye uMthandazo weNkosi. Ukuba uyavuma, sisenokuwucengceleza lo mthandazo ungumzekelo size siphele kwindawo ethi, “Mabufike ubukumkani bakho. Makwenziwe ukuthanda kwakho nasemhlabeni, njengokuba kusenziwa emazulwini.” (Mat. 6:9, 10) Oku kungqina ukuba ngaminazan’ ithile ukuthanda kukaYehova kuya kwenziwa apha emhlabeni. Ngoko kusenokubhekiselwa kwinqaku elifanelekileyo kwiMboniselo okanye kuVukani! okanye kwenye yeencwadana zethu ezinemifanekiso enokuthanani nale ngongoma, njengakwiphepha 3 kwethi Urhulumente Oya Kuzisa IParadisi.
4 Ukuba umninimzi ubonakala engakholelwa kuThixo, unokubhekisela kumaHebhere 3:4 wandule utyhile kwiphepha 4 kwincwadana enemifanekiso ethi Ngaba Ngokwenene UThixo Usikhathalele? Funda isiqendu sokuqala nesesibini uze ubuze umbuzo osekupheleni kwephepha. Okanye usenokunxibelelanisa umbandela ofanelekileyo okumaphephancwadi angoku.
5 Ukuba umninimzi ubonakala anelisekile bubomi bakhe, usenokubuza lo mbuzo:
◼ “Kutheni simele sikuqwalasele ngokunzulu okuthethwa yiBhayibhile ngekamva loorhulumente?” Sinokwandula sisebenzise inkcazelo efumaneka kwincwadi ethi Ukuqiqa kwiphepha-307 nelama-308, sikhankanya ngokufutshane isizathu esinye okanye ezingakumbi kwezisibhozo ezinikelweyo kuyo. Ukuba umninimzi ubonakalisa umdla, sebenzisa iphecana elithi Ngaba Eli Hlabathi Liya Kusinda?, uqala kwisiqendu sokuqala kwiphepha 2, ukuze uqhubele phambili ngencoko.
6 Utyelelo lwakho lokuqala aluyi kuphumelela ngokupheleleyo ukuba akuwuhlokozi umdla womninimzi ngotyelelo olulandelayo. Ngoko ke, qiniseka ukuba ubuza umbuzo obangel’ umdla uze uthembise ukuwuphendula xa ubuyela.
7 Kumbandela ongasentla, khetha oziva unako ukuthetha ngawo ngokukhululekileyo. La macebiso wenze avisisane nentsimi yakho. Qhelana namanqaku eencwadana ezinemifanekiso, wamaphecana nowamaphephancwadi oza kuwasebenzisa ukuze ngokukhawuleza ukwazi ukuvisisanisa ingxubusho yakho neentswelo zomninimzi. Ngamana sonke singazilungiselela ngenkuthalo iintshumayelo zethu “ngenxa yeendaba ezilungileyo” size ngaloo ndlela sibe nesabelo ngokuphumelelayo kobu bulungiseleli busindisa ubomi.—1 Kor. 9:23.