Buyela Ngovuyo Ukuze Uncede Abanomdla
1 Wonke ubani onesabelo kumsebenzi wendlu ngendlu unqwenela ukunceda abantu abanomdla. Ngokunikela olo ncedo, sifumana uvuyo olunzulu nolwaneliseko. (Thelekisa INdumiso 126:5, 6.) Oku kufuna ukuba silungiselele.
2 Ukulungiselela sikuqalisa ngokugcina inkcazelo eneenkcukacha kwingxelo yethu yendlu ngendlu. Phawula umbandela eniwuxubushileyo kutyelelo lokuqala nentsabelo yomninimzi. Kusenokude kufuneke uphawule nendlela oya kuyiqalisa ngayo incoko xa ubuyela.
3 Ngokomzekelo, ukuba ubuthethe ngoMthandazo weNkosi ekuqaleni waza wahambisa incwadana enemifanekiso ethi “Urhulumente,” ngokufutshane usenokuthetha into enjengale:
◼ “Kutyelelo lwam oludluleyo, siye saxubusha ngendlela ukuthanda kukaThixo okuya kwenziwa ngayo emhlabeni yaye kuya kubakho uxolo kuzo zonke iinkalo zobomi. Kwincwadana enemifanekiso endikushiyele yona, phawula oko ikuthethayo kwiphepha 29 ngezinye iintsikelelo uBukumkani bukaThixo obuya kuzizisela uluntu.”
4 Ukuba umntu ebetyekele ekubeni angakholelwa kuThixo, thetha into enjengale:
◼ “Xa bendilapha ngaphambili, besixubusha ngengongoma eyavezwa nguPawulos kumaHebhere 3:4, enikela izizathu ezisengqiqweni zokugqiba kwelokuba umele abekho uMenzi onobulumko wezinto zonke.” Sifunde kwakhona esi sibhalo uze ubhekisele kwiphepha 4 ukuya kwele-9 lale ncwadana inemifanekiso ethi Ngaba Ngokwenene uThixo Usikhathalele?, uqala apho ibiphele khona intshumayelo yangaphambili. Buza umbuzo wandule ufunde isiqendu, uvumela umninimzi awuphendule lo mbuzo. Ukuba kunokwenzeka, mcele aze neyakhe incwadana enemifanekiso nize niwuqwalasele kunye lo mbandela.
5 Ukuba umninimzi ebebonakala anelisekile, zizinto eziphathekayo okanye zezinye izinto, ebudeni botyelelo lwakho lokuqala, usenokubhekisela kwakhona kwiphecana elithi Ngaba Eli Hlabathi Liya Kusinda? uze ufunde oko kubhalwe kwiphepha 6. Buza umninimzi enoba uyanqwenela kusini na ukuphila kwiparadisi esemhlabeni entle. Ukukunceda ngakumbi uqonde enoba unomdla, usenokucela amagqabaza akhe kumfanekiso okhuthazayo okanye kumagqabaza akwiphephancwadi olisebenzisayo.
6 Le ntshayelelo ikwanye nesisiseko isenokusetyenziswa kunye nenqaku enisenokuba niye nalixubusha kwiMboniselo okanye kuVukani! Bhekisela kwinqaku obulibalaselise kutyelelo lwakho lokuqala wandule ukhankanye enye ingongoma enika umdla kwakwinqaku elikwalinye okanye kwenye inkupho onayo. Ukuba kunokwenzeka, funda isibhalo kunye naye uze ucele amagqabaza omninimzi. Yandula ke umkhuthaze umninimzi ukuba arhumele la maphephancwadi.
7 Sifuna ukuba ngabangqalileyo kumnikelo womrhumo ebudeni bukaMeyi. Kutheni ungakhuthazi abantu abathabatha imizila yamaphephancwadi ukuba bawarhumele la maphephancwadi? Apho abantu bebebonakalise umdla kwinyaniso okanye bamkela uncwadi kuthi kwixesha elidluleyo, nabo bakhuthaze ukuba barhumele.
8 Khumbula ukuba usukelo lwakho kukuqalisa isifundo seBhayibhile. Ngokuqhelekileyo kufuna amatyelelo aliqela ukuze kwakhiwe umdla ukusa kwelo nqanaba. Bonisa inkxalabo onayo ngomninimzi ngokubuyela ngokukhawuleza kangangoko kunokwenzeka.
9 Iindaba ezilungileyo esizivakalisayo zibangela uvuyo olukhulu. (Luka 2:10) Xa abantu abanomdla besabela kwimigudu yethu, oko ngokuqinisekileyo kubangela sivuye. (Fil. 4:1) Masifumane olu vuyo ngokubuyela ukuze sincede abanomdla esibafumana entsimini.