Ukubuyela Ukuze Sakhe Uxabiso
1 Ukubuyela ngokunentsingiselo ngokuqhubekayo kukhuthaza kuze kufak’ isandla ekukhuleni komninimzi ukuze abe likholwa. Ngawaphi amacebiso asebenzisekayo esinokuwakhumbula xa sibuyela kwabo babonakalise umdla?
2 Okokuqala, lungiselela kakuhle. Oku kuqala kwakutyelelo lokuqala. Njani? Ngokugcina iingxelo ezichanileyo zomdla obonakalisiweyo. Bhala igama lomninimzi, umbandela eniwuxubushileyo, intsabelo nayo nayiphi na impapasho oyihambisileyo. Yandula ke uhlole ingxelo yakho yendlu ngendlu ngaphambi kokuba ubuyele, uze ukucingisise ngomthandazo oko uza kukuthetha.
3 Ngoku ke ulungele ukubuyela. Yintoni onokuyithetha? Ukuba ububuze umninimzi umbuzo kutyelelo lwakho lokuqala, usenokuyisekela kuloo mbandela incoko xa ubuyela. Ngokomzekelo, ukuba kutyelelo lokuqala ubuxubushe ngeentsikelelo zoBukumkani bukaThixo, usenokubuza lo mbuzo “Kutheni uThixo evumele ubungendawo?”
Xa ubuyela, wakuba uzazisile, usenokuthi:
◼ “Ukugqibela kwethu ukuthetha, sixubushe isizathu sokuba uThixo oluthando evumele ubungendawo obungaka namhlanje. Ngaba ukhe wacinga ngokubhekele phaya ngoku? [Vumela impendulo.] Ngaba ucinga ukuba ngokwenene uThixo ulukhathalele uluntu? [Vumela impendulo.] Phawula oko iBhayibhile ikuthethayo kuYohane 3:16.” Emva kokufunda le ndinyana, unokutsalela ingqalelo kumacandelo athile akwisahluko 12 sencwadi Iindaba Ezilungileyo—Zokonwabisa Wena aphuhlisa izizathu zokuba uThixo enyamezele ubungendawo namhlanje.
4 Omnye umbuzo ohlokoz’ ingcinga osenokuwubuza kutyelelo lokuqala ngothi: “Ukuba uThixo wayefuna abantu baphile ngonaphakade, kutheni abantu besaluphala baze bafe?” Xa ubuyela, unokubabonisa impendulo yeBhayibhile kuloo mbuzo njengokuba ifumaneka kumaRoma 5:12. Emva kokuba usifundile esi sibhalo, bhekisela kwisiqendu sokuqala kwiphepha 35 sencwadi Ngaba Obu Bomi Kuphela Kwabo?, esixubusha isizathu esiyintloko sokuba abantu baluphale baze bafe.
5 Ukuba kutyelelo lwakho lokuqala ubuxubushe ngethemba lobomi obungunaphakade kumhlaba ocociweyo waza washiya incwadi Iindaba Ezilungileyo—Zokonwabisa Wena umbuzo omhle osenokulusekela kuwo utyelelo lwakho lokubuyela usenokuba ngothi: “Yintoni esifanele siyenze ukuze sifanelekele ukuphila ubomi obungunaphakade?” Xa ubuyela, unokuthetha ngeengongoma ezithile ezikwisahluko 14 saloo ncwadi.
6 Nasi isilumkiso. Yilumkele imibuzo oyibuzayo xa ubuyela. Ukubuza ukuba “Ngaba uyifundile incwadi endikushiyele yona?” okanye “Ngaba usandikhumbula?” okanye “Ngaba usakhumbula ukuba besithetha ngantoni ukugqibela kwam ukuza apha?” kumfaka engxakini umninimzi. Imibuzo enjalo ayidli ngakuba namiphumo mihle. Kwelinye icala, yiba nobuhlobo, ube bhetyebhetye uze ubethe koomofu. Ezi mpawu ziya kusenza sinandipheke isigidimi.
7 Ezi ntshumayelo nezinye zisenokusetyenziselwa ukuhlakulela uxabiso kwiintliziyo zabanomdla. Kutheni ungazibekeli usukelo lobuqu lokwenza nokuba libuyelo elinye veki nganye? Sebenzisa la macebiso asengqiqweni acetyiswe ngasentla, uze uthethe nabavakalisi abanamava abaya kukunceda. Uvuyo lwakho luya kwanda njengoko usakhela phezu komdla obuboniswe ekuqaleni ngokwenza amabuyelo aphumelelayo.