‘Ukuthiywa Ziintlanga Zonke’
1 Kwiminyaka yakutshanje sonke kusivuyisile ukuva iingxelo ezichwayitisayo ezingeentsikelelo ezimangalisayo ezinanditshwa ngabantu bakaYehova ehlabathini jikelele. Ukuvulwa komsebenzi ngokusemthethweni eMalawi emva kweminyaka engama-26 yengcinezelo enenkohlakalo kwasibangela iinyembezi zovuyo. Kwatsho kwee qabu sakuva ngokuwa kobuKomanisi obungahloneli thixo kwiMpuma Yurophu okwaphumela ekukhululweni kwamawaka abazalwana bethu kwidyokhwe yabo yengcinezelo. Sasilinde ngenkxalabo njengokuba kwakucelw’ umngeni inkululeko yethu yonqulo eGrisi; savuya sakufumana uloyiso oluzukileyo kwinkundla ephakamileyo eYurophu. Kusichulumancisile ukuva iingxelo ezingolwando olukhulu lwamasebe oMbutho awenze kwaveliswa uncwadi oluninzi lwabo bafuna inyaniso. Sabamb’ ongezantsi kukuva ukuba kwabhaptizwa abantu abangaphezu kwama-7 400 kwindibano yaseKiev, eUkraine. Ewe, le nkqubela imangalisayo kumsebenzi woBukumkani isenze sanemincili ngakumbi!
2 Nangona unobangela wokuvuya kwethu ulungile, kufuneka silumkele ukuvuya ngokugqith’ emgceni. Ungcelele lweengxelo ezimnandi lunokusibangela sigqibe kwelokuba ukuchaswa kweendaba ezilungileyo kuyaphela yaye abantu bakaYehova bayamkelwa ehlabathi jikelele. Ukucinga okunjalo kunokusikhohlisa. Ngoxa siye soyisa ngokwanelisayo saza safikelela umlinganiselo othile wempumelelo ekunciphiseni imiqobo ephazamisana neendaba ezilungileyo kwamanye amazwe, asimele silibale ukuba ulwalamano lwethu olusisiseko nehlabathi alukaguquki. Njengabalandeli bakaYesu, ‘asingabehlabathi.’ Ngenxa yoko, ngokuqinisekileyo ‘siya kuthiywa ziintlanga zonke.’ (Yoh. 15:19; Mat. 24:9) Lo gama nje isekho le nkqubo yezinto, akukho nto iza kuguqula lo mgaqo usisiseko othi “bonke abathanda ukuhlala ngokuhlonela uThixo kuKristu Yesu baya kutshutshiswa.”—2 Tim. 3:12.
3 Imbali ingqina ubunyaniso besi silumkiso. Ngoxa uYesu, umSeki wobuKristu, wanikela ubungqina obumangalisayo phambi kwabalawuli abanamandla nabalawulwa babo, wayephathwa kakubi mihla le yaye wayesoloko esemngciphekweni wokubulawa. Nangona abapostile bakhe banceda abantu abaninzi bangabafundi, banesabelo ekubhalweni kweZibhalo ZamaKristu ZesiGrike, yaye babonakalisa izipho zomoya ezimangalisayo, nabo bathiywa baza baphathwa kakubi. Phezu kwako nje ukuziphatha kakuhle nokuthanda kwawo abamelwane, abaninzi babewagqala onke amaKristu ‘njengehlelo’ ‘elalichasiwe ezindaweni zonke.’ (IZe. 28:22) Ngoxa ibandla lamaKristu ehlabathini lonke namhlanje belisetyenziswa nguYehova ngokumangalisayo ukuze liphumeze ukuthanda kwakhe, liye laqhubeka lichaswa yaye linyeliswa ngawo onke amalungu ale nkqubo ingendawo yezinto. Asikho isizathu sokulindela ukuba loo nkcaso iphele.
4 Kwinkulungwane yokuqala, uSathana wayetshutshisa abafundi bakaYesu ngeendlela ezahlukeneyo. Abachasi abanentiyo bababeka izityholo zobuxoki ezazibanyelisa. (IZe. 14:2) Benza izisongelo zenkohlakalo bezama ukuboyikisa. (IZe. 4:17, 18) Izihlwele ezineengcwangu zazama ukubavala umlomo. (IZe. 19:29-34) Bavalelwa ngaphandle kwesizathu. (IZe. 12:4, 5) Ngokufuthi abatshutshisi babebhenela kugonyamelo. (IZe. 14:19) Kwiimeko ezithile abathile abamsulwa babulawa ngabom. (IZe. 7:54-60) Umpostile uPawulos wanyamezela phantse zonke ezi ndlela zokuphathwa kakubi. (2 Kor. 11:23-27) Abachasi babexhakamfula naliphi na ithuba ukuze baphazamise umsebenzi wokushumayela nokuze babandezele abo bathembekileyo.
5 Namhlanje uSathana usebenzisa amaqhinga afanayo. Siye sabekwa izityholo zobuxoki, sityholwa ngelokuba silihlelo okanye unqulo olulahlekisiweyo. Kwamanye amazwe, abasemagunyeni baye bathi uncwadi lwethu ludala uqhushululu baza baluvala. Ukuhlonela kwethu ubungcwele begazi kuye kwagculelwa ekuhleni kwaza kwacelw’ umngeni. Ngeminyaka yee-1940, amahlokondiba aneengcwangu ecatshukiswe yimbambano yokukhahlela indwe ahlasela abazalwana bethu, ebangxwelerha, yaye etshabalalisa izinto zabo. Amawaka aphoswa entolongweni ngenxa yembambano yobundilele. Kumazwe obuzwilakhe abazalwana bethu babebekwa izityholo zobuxoki kusithiwa bangcatsha umbuso, nto leyo eyaphumela ekubeni amakhulu abo athuthunjiswe ngenkohlakalo aze abulawelwe ezintolongweni nakwiinkampu zoxinaniso. Ingcinezelo ibingayekeleli, nto leyo ebonisa ngokuphandle ukuba sithiywe ngaphandle kwesizathu.—Bona incwadi Abavakalisi, isahluko 29.
6 Yintoni Esiyifunjethelwe Likamva? Ngoxa abantu bakaYehova maxa wambi besenokufumana isiqabu kwingcinezelo kwezinye iindawo zehlabathi, kodwa yona imeko ayikaguquki. UMtyholi usacatshukiswe kukuthotywa kwakhe ngowe-1914. Uyazi ukuba ixesha analo lincinane. Ngokuqinisekileyo umsindo wakhe uza kuba mkhulu njengokuba imbandezelo enkulu isondela. Uzimisele ukulwa noKumkani osetroneni, uKristu Yesu, yaye uzimisele ukulwa kude kube sekugqibeleni. Yena needemon zakhe banokuwukhuphela umsindo wabo kuphela kubantu bakaYehova abalapha emhlabeni, abo ngokuthembekileyo “bayigcinayo imithetho kaThixo, abanobungqina bukaYesu Kristu.”—ISityhi. 12:12, 17.
7 Ngoko njengokuba sikhangele kwikamva, kufuneka silindele izinto zokwenene. Akukho sizathu sakucinga ukuba uMtyholi uza kurhoxa okanye anikezele. Intiyo anayo ngathi nathe wayifaka kweli hlabathi inokuvela nanini na naphi na. Kumazwe amaninzi inkululeko yethu yokushumayela iye yakhuselwa kuphela emva kokuzama ithuba elide. Loo nkululeko isenokuphela nanini na, kuphela isalondolozwe ngabalawuli abathile abakhoyo ngelo xesha abanovelwano okanye yimithetho ethile. Ngequbuliso kusenokuvela iinguqu ezimangalisayo, ezibangela isiphithiphithi nokusetyenziswa kakubi kwamalungelo abantu.
8 Le mpumelelo nenkululeko esiyinandiphayo ngoku kumazwe athile isenokuphela ngesiquphe, nto leyo enokushiya abazalwana bethu bekulaa mpatho-mbi babekuyo ngaphambili. Singaze sizivumele ukuba siyekelele umxakatho kumoya wokungakhathali, sicinga ukuba iintshaba zethu zoyisakele. Intiyo yeli hlabathi isenokungasoloko ibonakaliswa ngokupheleleyo, kodwa yona yendele. ILizwi likaThixo liphela libonisa ukuba njengokuba isiphelo sisondela inkcaso yehlabathi iya kwanda kunokuba inciphe. Ngoko kufuneka siphaphe, sibe ‘nobulumko njengeenyoka, sibe njengamahobe ukungabi nabuqhinga.’ (Mat. 10:16) Sifanele siqonde ukuba kufuneka ‘silwe ngamandla’ kude kube sekupheleni, yaye undoqo lunyamezelo ukuze sisinde.—Yuda 3; Mat. 24:13.
9 Kwindawo yehlabathi esiphila kuyo, umsebenzi usenokwanda ngaphandle kokuthintelwa okubonakalayo ngabachasi. Oku kunokusenza sithandabuze enoba sikho kusini na isizathu sokuxhalaba ngokunzulu. Sekunjalo, kufuneka siphaphe. Iimeko zisenokuguquka ngequbuliso. Bengabhungisanga, abachasi basenokusebenzisa imbambano ethile baze bayisebenzisele ukuchasa thina. Abawexuki basathe gqolo befuna into abangayikhalazela. Abefundisi abanomsindo abaziva besongelwa ngumsebenzi wethu basenokusinyelisa ekuhleni. Ukuceba kwethu ukwakha iHolo yoBukumkani ekuhlaleni kusenokuqhwaya ingxwaba-ngxwaba ephazamisa bonke elumelwaneni. Kusenokupapashwa iingxelo ezinyembayo, ezisinika igama elibi. Oosomaqhuzu basekuhlaleni basenokuthetha kakubi ngathi ebantwini, bebangela ukuba abamelwane bethu basichase xa sibatyelele. Nkqu nabantu esibathandayo kwiintsapho zethu basenokucaphuka baze basitshutshise. Ngoko kufuneka silumke, siqonda ukuba eli hlabathi linobutshaba kakhulu, yaye bunokuvela nanini na.
10 Kufanele Kusichaphazele Njani Oku? Konke oku kuchaphazela ukucinga kwethu nendlela esilijonga ngayo ikamva. Ngayiphi indlela? Ngaba oku kufanele kusenze sibe phakuphaku, sisoyika oko kuya kufuneka sikunyamezele? Ngaba sifanele siyekelele kumsebenzi wethu wokushumayela kuba abathile elumelwaneni bephazanyiswa nguwo? Ngaba sikho isizathu esivakalayo sokukhathazeka xa sinyeliswa ngokungekho sikweni? Ngaba ngokungaphephekiyo ukuphathwa kakubi kuya kusiphanga uvuyo lwethu ekukhonzeni uYehova? Ngaba kukho nakuphi na ukungaqiniseki ngemiphumo? Unotshe! Ngoba?
11 Singaze sisilibale isibakala sokuba isigidimi esisivakalisayo asisosethu, kodwa sesikaYehova. (Yer. 1:9) Sibophelelekile ukuba sithobele esi sibongozo: “Nqulani igama lakhe, zaziseni ezintlangeni izenzo zakhe, . . . ehlabathini lonke.” (Isa. 12:4, 5) Uye wakunyamezela ukuphathwa kakubi kwabantu bakhe ngenxa yenjongo ethile, eyile, ‘ukuba laziswe igama lakhe ehlabathini lonke.’ (Eks. 9:16) Senza umsebenzi esiwuyalelwe nguYehova, yaye nguye osinika inkalipho yokuthetha ngokungafihlisi. (IZe. 4:29-31) Lo ngowona msebenzi ubalulekileyo, uyingenelo nongxamisekileyo onokwenziwa kule mihla yokugqibela yale nkqubo indala.
12 Olu lwazi lusinika inkalipho yokuba sime singagungqi xa sijamelene nenkcaso kaSathana neyeli hlabathi. (1 Pet. 5:8, 9) Ukwazi ukuba uYehova unathi kusenza ‘sikhaliphe size somelele,’ sikhupha naluphi na uloyiko xa siphambi kwabatshutshisi bethu. (Dut. 31:6; Heb. 13:6) Ngoxa siya kusoloko sizama ukuba nobuchule, sisebenzise ingqiqo nobulumko xa sisongelwa ngabachasi, siya kukwenza kucace ukuba sizimisele ‘ukuva uThixo kunokuba sive abantu’ xa kucelwa umngeni unqulo lwethu. (IZe. 5:29) Xa kukho ithuba elifanelekileyo lokuba sizithethelele, siya kwenjenjalo. (1 Pet. 3:15) Noko ke, asiyi kuchitha ixesha lethu siphikisana nabachasi abangoontamo-lukhuni abanomdla wokonakalisa udumo lwethu kuphela. Kunokuba sicaphuke okanye sizame ukuziphindezela xa besinyelisa okanye besibeka izityholo zobuxoki, ‘masibayeke.’—Mat. 15:14.
13 Ukunyamezela kwethu iimvavanyo kuyamvuyisa uYehova. (1 Pet. 2:19) Simele senze ntoni ukuze sifumane loo nkoliseko? Ngaba simele sizivumele ukuba sikhonze sidakumbile kuba sithiyiwe yaye sichaswa? Akunjalo konke konke! UYehova uthembisa ukuvuza ukuthobela kwethu ‘ngovuyo noxolo.’ (Roma 15:13) Phezu kwako nje ukubandezeleka okuqatha, uYesu wahlala onwabile ngenxa “yovuyo olwalubekwe phambi kwakhe.” (Heb. 12:2) Nakuthi oku kuyinyaniso. Ngenxa yokuba umvuzo wokunyamezela kwethu umkhulu, sishukunyiselwa ukuba ‘sivuye sigcobe’ ngoxa sithwaxwa ziimvavanyo ezicinezelayo. (Mat. 5:11, 12) Kwanangamaxesha obunzima, olu vuyo lusibangela sidumise size sizukise uYehova ngokumela isigidimi soBukumkani.
14 Ngaba kukho nakuphi ukungaqiniseki ngomphumo, nto leyo esenza sibe phakuphaku okanye sithandabuze? Hayi, umphumo wongquzulwano phakathi kwentlangano kaYehova nehlabathi likaSathana kudala kwenziwa isigqibo ngawo. (1 Yoh. 2:15-17) Kungakhathaliseki ukuba inkcaso iqatha okanye inkulu kangakanani na, uYehova uya kusenza soyise. (Isa. 54:17; Roma 8:31, 37) Nangona sivavanywa ngokupheleleyo, ayikho into enokusithintela ukuba singawufumani umvuzo. Asinasizathu ‘sakuxhalela nto,’ kuba uYehova usinike uxolo ephendula izikhungo zethu.—Fil. 4:6, 7.
15 Ngoko siyambulela uYehova ngamaxesha onke sisiva iingxelo zokuba abazalwana bethu bakhululwe kwintshutshiso okanye banikwe inkululeko yokushumayela kwimimandla apho bebebekelwe imiqathango ngaphambili. Siyavuya xa iimeko eziguqukayo zivula amathuba amatsha okuba amawaka abantu abanyanisekileyo bafumane isigidimi soBukumkani. Sibulela ngokwenene xa uYehova ekhetha ukusinika uloyiso xa sijamelene nabachasi abanentiyo. Siyazi ukuba uya kuwusikelela aze awandise umsebenzi wethu nangayiphi na indlela eyimfuneko ukuze aphakamise indlu yakhe yonqulo lokwenyaniso aze anike abantu ‘abanqwenelekayo’ bazo zonke iintlanga ithuba lokungena kuyo.—Hag. 2:7; Isa. 2:2-4.
16 Kwangaxeshanye, sazi mhlophe ukuba utshaba lwethu, uSathana, lunamandla gqitha, yaye luya kusichasa kude kube sekupheleni. Usenokuhlasela ngendlela ebonakalayo, okanye echuliweyo nekhohlisayo. Intshutshiso isenokuvela ngequbuliso kwiindawo ebesisazi kukho uxolo kuzo kwixa elidluleyo. Abachasi abangendawo basenokuba neengcwangu yaye bangayekeleli kwimigudu yabo yokusicinezela ngokungekho sikweni. Ngexesha elifanelekileyo bonke abanjalo baya kucacelwa lelokuba ‘balwa noThixo,’ yaye uza kubatshabalalisa. (IZe. 5:38, 39; 2 Tes. 1:6-9) Okwangoku, kungakhathaliseki ukuba simele sinyamezele ntoni na, sizimisele ukuhlala somelele ekukhonzeni uYehova ngokunyanisekileyo nasekushumayeleni isigidimi soBukumkani. Singabona bantu bonwabileyo emhlabeni, abaziyo ukuba ‘sakuba sicikidekile, siya kusamkela isithsaba sobomi.’—Yak. 1:12.