Kuphaphele Ukuhambisa Amaphephancwadi Ebudeni BukaOktobha
1 Ebudeni bukaOktobha sinethuba lokuhambisa IMboniselo noVukani! ngomrhumo kubantu abaninzi kangangoko kunokwenzeka. Ukuphaphela ukuhambisa amaphephancwadi kuquka ukuchitha ixesha siwafunda ngenyameko nokucinga ngendlela amanqaku anokuba nomtsalane ngayo kubantu abakwintsimi yethu.
2 Okokuqala, wazi kakuhle amanqaku abalaseliswa ngaphandle. Khetha amanqaku ovakalelwa kukuba asenokuba nomtsalane kubantu abakwintsimi yakho. Ngaba abantu balapho banenkolo enye yonqulo? Ziziphi ezona zinto bazixhalabeleyo? Ucinga ngoku, ufanele ukwazi ukulungiselela intshumayelo ephumelelayo. Phawula ezi zingezantsi.
3 Ukuba uhambisa “IMboniselo” kaOktobha 1, usenokubalaselisa inqaku elithi “IBhayibhile—Ngokwenene Ixabiseke Kangakanani?” Unokuthi:
◼ “Phantse ikhaya ngalinye apha ekuhlaleni lineBhayibhile. Abaninzi abanayo bavakalelwa kukuba iqulethe okuthile okuxabisekileyo.” Usenokwandula ke ubuze umbuzo ongqalileyo, onjengalo: “Ucinga ukuba yintoni eyenza iBhayibhile ikhetheke kangaka?” okanye, “Ucinga ukuba yintoni eya kunceda abantu abangakumbi bangenelwe kwiBhayibhile?” Akuba umninimzi ephendule, usenokuqhubeka namagqabaza afanelekileyo, anjengala: “Kukho ubungqina obuninzi bokuba iBhayibhile iphefumlelwe nguThixo ibe isisikhokelo sethu esinokuthenjwa. Iqulethe ulwazi olunokusikhokelela kubomi obungunaphakade. [Funda uYohane 17:3.] Eli nqaku likule Mboniselo licacisa indlela onokuyisebenzisa ngokobuqu ngayo iBhayibhile ekufumaneni iimpendulo kwimibuzo yakho ngekamva. Ndiya kukuvuyela ukulungiselela ukuba urhumele eli phephancwadi ngomnikelo wee-R30,00 kuphela ngonyaka.” Ukuba umninimzi akawamkeli umnikelo womrhumo, mkhuthaze athabathe amaphephancwadi amabini. Ngale ndlela usenokuqalisa umzila wamaphephancwadi.
4 Xa usebenzisa “IMboniselo” kaOktobha 15, usenokukhetha intshayelelo elula enjengale:
◼ “Phantse wonk’ ubani ukhe wafelwa ngamthandayo. Eli nqaku linalo mbuzo: ‘Iyintoni Imeko Yabafi?’ Ucinga ukuba kwenzeka ntoni xa umntu esifa? [Vumela impendulo.] Ukuba ungathanda ukwazi indlela iBhayibhile ewuphendula ngayo loo mbuzo, ndingakuvuyela ukukushiyela eli phephancwadi. Kule nyanga sihambisa eli phephancwadi lihle kuwonke wonke ngomrhumo wee-R30,00 ngonyaka.” Lungiselela ukuhambisa iphecana elithi Liyintoni Ithemba Ngabafileyo Obathandayo? ukuba umninimzi ukhetha umbandela omfutshane ngakumbi.
5 U-“Vukani!” kaNovemba 8 uxubusha ngobungqina obuninzi obubonisa ukusilela konqulo lobuxoki. Usebenzisa amanqaku axubusha ngokuba unqulo lufanele luthabathe icala kwiimfazwe kusini na, usenokubuza lo mbuzo:
◼ “Ukuba uYesu ebekho namhlanje, ucinga ukuba ebeya kuvakalelwa njani ngalo lonke ugonyamelo olusingqongileyo? [Vumela impendulo.] UYesu wasifundisa ukuba sithande bonke abantu, nkqu neentshaba zethu. Ukanti, iinkonzo ezininzi ezithi zingamaKristu zithabath’ icala kwiingxwabangxwaba zobupolitika. Ucinga ukuba oko kubachaphazela njani abantu abafuna ukuphila ngoko kwafundiswa nguYesu? [Vumela impendulo.] Le nkupho kaVukani! ixubusha loo mbuzo uphazamisayo ize ichaze indlela uBukumkani bukaThixo obuya kusinikela ngayo isicombululo.”
6 Qinisekisa ukuba unikela umrhumo kumzi ngamnye, kwanaxa ungakwazi ukuxubusha iBhayibhile. Apho abantu bangakwaziyo ukuhlawulela umrhumo, thembisa ukubazisela amaphephancwadi rhoqo xa efika. Ebudeni bukaOktobha sonke masibe nesabelo ngenzondelelo ekusasazeni aba lindixesha bahle benyaniso.